ឡៅ​ចន្ទ្រា ស្វាគមន៍​Khum Phit ជម្រះ​បញ្ជី​គ្នា​នៅ​សង្វៀន​បាយ័ន​ស្ទឹងមានជ័យ

អ្នក​ប្រដាល់​ជើង​ខ្លាំង​កម្ពុជា​ឡៅ ចន្ទ្រា ក្លិប​កងពលតូច​ទ័ព​ឆ័​ត្រ​យោង​៩១១ ទទួល​ស្វាគមន៍ Khum Phit ដែល​មកជួប​ជម្រះបញ្ជី នៅលើ​សង្វៀន​គូ​បូ​តា​បាយ័ន​ស្ទឹងមានជ័យ នា​យប់​ថ្ងៃ​សុក្រ​ទី​០៧ ខែ​ធ្នូ​ឆ្នាំ​២០១៨​នេះ។

Khum Phit នេះ គេ​ធ្លាប់​មក​ប្រកួត​នៅ​ស្រុក​ខ្មែរ​ប៉ុន្មាន​លើក​ហើយ​កន្លងមក គេ​វាយ​ចាញ់​ឡៅ ចន្ទ្រា​ដោយ​ពិន្ទុ​នៅលើ​សង្វៀន​SEATV កាលពី​ខែតុលា​កន្លងទៅនេះ ។​អ្នក​ប្រដាល់​ថៃ​រូបនេះ ក៏​ធ្លាប់​វាយ​ចាញ់​រឿង សោ​ភ័​ណ្ឌ ក្លិប​មកុដ​រាជសីហ៍ ដោយ​ពិន្ទុ​ដែរ​។ យ៉ាងណា Khum Phit ជា​ជើង​ខ្លាំង​មួយរូប​នៅ​ស្រុកថៃ និង​ជា​ម្ចាស់​ខ្សែក្រវាត់​ផងដែរ​។​នេះ​បើតាម​ប្រវត្តិ​របស់​Khum Phit ។​
​
ទោះជា​យ៉ាងណា ការប្រកួត​លើក​នេះ ឡៅ ចន្ទ្រា មិនអាច​ធ្វេសប្រហែស​នឹង​Khum Phit បានឡើយ ព្រោះ​អ្នក​ប្រដាល់​ថៃ​រូបនេះ មិន​សាមញ្ញ​នោះទេ ឆ្លងតាម​ការជួបគ្នា​កន្លងមក​នោះ ។
​
យ៉ាងណា​សម្រាប់​ការជួបគ្នា​រវាង​ឡៅ ចន្ទ្រា និង Khum Phit នេះ គេ​រំពឹងថា ឡៅ ចន្ទ្រា នឹង​ឈ្នះ​ការប្រកួត​នេះ ។ ដូច្នេះ​ចាំមើល តើ Khum Phit អាច​សងសឹក​យកឈ្នះ​ឡៅ ចន្ទ្រា បាន​វិញ​ឬ​អត់ សម្រាប់​ជំនួប​លើក​ទី​២​នេះ ? ។​
​
ឡៅ ចន្ទ្រា មាន​កំណត់​ត្រា​ប្រកួត​ចំនួន​១១១​លើក ឈ្នះ​១០១​លើក ចាញ់​១០​លើក មិនដែល​ស្មើ​។​ចំណែក Khum Phit​នេះ មាន​ប្រវត្តិ​ប្រកួត​តែ​ចំនួន​៧០​លើក​ប៉ុណ្ណោះ ក្នុងនោះ​វាយ​ឈ្នះ​៥៧​លើក ចាញ់​១១​លើក និង​ស្មើ​០២​លើក ។​
​
ចំពោះ​ការប្រកួត​ជម្រុះ​ដណ្តើម​ខ្សែក្រវាត់​ជើងឯក​លេខ​១​គូ​បូ​តា​ទម្ងន់​៥៤​គីឡូក្រាម ដែលជា​ការប្រកួត​ជុំ​ចុងក្រោយ​របស់​រិ​ទ្ធ អាទិត្យ អ្នក​ប្រដាល់​ក្លិប​អាណាចក្រ​គុន​ខ្មែរ​និង អ្នក​ប្រដាល់​ថៃ Kaoreanthong Pctchchinda ។​
​
សម្រាប់​ជំនួប​ជុំ​ចុងក្រោយ​របស់​រិ​ទ្ធ អាទិត្យ និង Kaoreanthong គឺ​រិ​ទ្ធ អាទិត្យ​គ្រាន់តែ​ប្រកួត​បង្គ្រប់កិច្ច​ប៉ុណ្ណោះ តែ​ចំពោះ Kaoreanthong គេ​ត្រូវការ​ឈ្នះ​ដើម្បី​បាន​ឡើងទៅ​ប្រកួត​នៅ​វគ្គ​ពាក់កណ្តាល​ផ្តាច់ព្រ័ត្រ ។​
​
រវាង រិ​ទ្ធ អាទិត្យ និង Kaoreanthong មិនដែល​ប៉ះគ្នា​ទេ​កន្លងមក ។ តែ​យ៉ាងណា រិ​ទ្ធ អាទិត្យ ប្រហែលជា​មិនមាន​សំណាង​បានឈ្នះ​នោះទេ ព្រោះ​អ្នក​ប្រដាល់​ថៃ Kaoreanthong គេ​ខ្លាំង​ជាង​និង​មាន​ផ្លែ​ល្អ​ជាង ។
​
ក្នុងការ​ប្រកួត​ជម្រុះ​៤​ជុំ​កន្លងមកនេះ Kaoreanthong គេ​វាយ​ឈ្នះ​អ្នក​ប្រដាល់​កម្ពុជា​២​ប្រកួត និង​ចាញ់​២​ប្រកួត ។​ដូច្នេះ បើ​គេ​ឈ្នះ​រិ​ទ្ធ អាទិត្យ​មួយ​ប្រកួត​ទៀត គេ​អាច​នឹង​បាន​ឡើងទៅ​ពាក់កណ្តាល​ផ្តាច់ព្រ័ត្រ ។​
​
ចំណែក រិ​ទ្ធ អាទិត្យ​វិញ គេ​ប្រកួត​៤​ជុំ​ដូចគ្នា គឺ​ចាញ់​ទាំង​៤​ប្រកួត ។​ហេតុនេះ ការប្រកួត​លើកចុងក្រោយ​ជាមួយ Kaoreanthong​នេះ បើទោះជា​គេ​ឈ្នះ​ឬ​ចាញ់​ក៏ដោយ ក៏​នៅតែ​ជ្រុះ​ធ្លាក់​ដែរ ។ និយាយ​រួម រិ​ទ្ធ អាទិត្យ គេ​ប្រកួត​គ្រាន់តែ​បង្គ្រប់កិច្ច​ប៉ុណ្ណោះ ។​
​
តែ​ទោះជា​យ៉ាងណា សម្រាប់​ការជួបគ្នា​រវាង​រិ​ទ្ធ អាទិត្យ និង Kaoreanthong នេះ បើតាម​ការសន្និដ្ឋាន​មុន​នោះ គឺ​រិ​ទ្ធ អាទិត្យ មិនអាច​ឈ្នះ Kaoreanthong នេះ​បានឡើយ ព្រោះ​អ្នក​ប្រដាល់​ថៃ​រូបនេះ​គេ​ខ្លាំង​គួរសម​ដែរ ដោយ​អាច​យកឈ្នះ​ផាន ផាត់​យុទ្ធ និង​ចាន់ សាន់ នោះ ។​
​
សូមបញ្ជាក់ថា អ្នក​ប្រដាល់​មួយរូបៗ ទាំង​ខ្មែរ ទាំង​ថៃ និង​ឡាវ គឺ​ត្រូវ​ឆ្លងកាត់​ការប្រកួត​ក្នុង​ម្នាក់ៗ ចំនួន ៥ ប្រកួត​ម្នាក់ ហើយ​អ្នក​ដែលមាន​ពិន្ទុ​ច្រើន​២​រូប ក្នុង​មួយ​ពូ​ល ទាំង​ពូ​ល​ខ្មែរ និង ពូ​ល​ថៃ​-​ឡាវ នឹងត្រូវ​បាន​ឡើងទៅ​ប្រកួត​វគ្គ​ពាក់កណ្តាល​ផ្តាច់ព្រ័ត្រ​និង​ផ្តាច់ព្រ័ត្រ៕ ​

Source: Kampuchea Thmey Daily