កំពត ៖ កំណើនភ្ញៀវទេសចរជាតិ និងអន្តរជាតិបាននឹងកំពុងកើនឡើងជាបន្តបន្ទាប់ ពីមួយឆ្នាំទៅមួយឆ្នាំសម្រាប់ខេត្តកំពតវិញនៅក្នុងឆ្នាំ២០១៨ កន្លងទៅនេះ មានទេសចរជាតិ និងអន្តរជាតិ បានមកកម្សាន្តច្រើនជាងឆ្នាំ២០១៧ រាប់ម៉ឺននាក់នេះដោយប្រទេសមានសុខសន្តិភាព សន្តិសុខ សុវត្ថិភាពសាធារណៈ សណ្តាប់ធ្នាប់សង្គមល្អ។
ដោយផ្អែកលើសក្តានុពលនិងធនធានសម្បូរបែបទាំងនេះ បានធ្វើឲ្យខេត្តកំពតក្លាយជាគោលដៅមួយប្រកបដោយភាពទាក់ទាញបំផុតនៅក្នុងចំណោមខេត្តជាប់សមុទ្រទាំងបួននោះជាក់ស្តែង ឆ្នាំ២០១៨ កន្លងទៅនេះមានភ្ញៀវទេសចរជាច្រើនបានមកទស្សនាកម្សាន្តក្នុងទឹកដីខេត្តកំពតមានចំនួន១,៦២៩,៥៣០នាក់ កើនឡើង១,៨០% បើប្រៀបធៀបនឹងឆ្នាំ២០១៧ ដែលភ្ញៀវមានចំនួនត្រឹមតែ១,៦០០,៦២០នាក់ប៉ុណ្ណោះ។ នេះបើតាមរបាយការណ៍ឆ្នាំ២០១៨ របស់មន្ទីរទេសចរណ៍ខេត្តកំពត។
បើយោងតាមរបាយការណ៍ដដែលនោះ បានបង្ហាញថា នៅក្នុងចំណោមនោះ ទេសចរអន្តរជាតិ មានចំនួន១៦៧,៧៣៥នាក់ កើនឡើង ចំនួន៣,៤៣% ទេសចរក្នុងស្រុក មានចំនួន១,៤៦១,៧៩៥នាក់ កើនឡើង ចំនួន១,៦២% បើធៀបនឹងឆ្នាំ២០១៧។
ខេត្តកំពតមានប្រជាប្រិយភាពណាស់ មានទេសចរអន្តរជាតិ មកទស្សនារហូតដល់៨២ជនជាតិ ហើយទេសចរជនជាតិវៀតណាម មានសន្ទុះកើនឡើងខ្ពស់ជាងគេ ស្ថិតនៅក្នុងលំដាប់លេខ១ គឺមានចំនួន៥៦,៩១៥នាក់, អាឡឺម៉ង់ឈរលំដាប់លេខ២ មានចំនួន៦,២៧៦នាក់, អង់គ្លេស លេខ៣ មានចំនួន៦,១៧១នាក់, បារាំងលេខ៤ មានចំនួន៦,០៤៣នាក់, ចិនលេខ៥ មានចំនួន៥,២៩០នាក់, កាណាដាលេខ៦ មានចំនួន៥,២៨៦នាក់, អូស្ត្រាលីលេខ៧ មានចំនួន៥,២២៧នាក់, អាមេរិកលេខ៨ មានចំនួន៥,០៩៥នាក់, ហូឡង់លេខ៩ មានចំនួន៤,៧១៤នាក់ និងរុស្ស៊ីលេខ១០ មានចំនួន៤,៦៧៨នាក់។
លោក សយ ស៊ីណុល ប្រធានមន្ទីរទេសចរខេត្តកំពតបានឲ្យដឹងថា នៅក្នុងឆ្នាំ២០១៨កន្លងទៅនេះ កំណើនភ្ញៀវមានការកើនឡើងក៏ពិតមែន ប៉ុន្តែចំនួននេះនៅតិចណាស់ ហើយលោកសង្ឃឹមថា នៅឆ្នាំ២០១៩នេះ ភ្ញៀវទេសចរនឹងកាន់តែកើនឡើងច្រើនជាងឆ្នាំណាៗទាំងអស់ព្រោះ ខេត្តកំពតនឹងត្រូវធ្វើជាម្ចាស់ផ្ទះ នៃការរៀបចំពិធីបុណ្យសមុទ្រ ខណៈការអភិវឌ្ឍខេត្ត និងការអភិវឌ្ឍតំបន់ទេសចរណ៍កើនឡើងយ៉ាងសំបូរបែបផងដែរនោះ។
គួរបញ្ជាក់ថា ខេត្តកំពតមានរមណីយដ្ឋានទេសចរណ៍ ចំនួន១៧កន្លែង ក្នុងនោះមានរមណីយដ្ឋានវប្បធម៌ប្រវត្តិសាស្ត្រ៥កន្លែង រមណីយដ្ឋានវប្បធម៌២កន្លែង និងរមណីយដ្ឋានធម្មជាតិ១០កន្លែង ប៉ុន្តែក្នុងនោះ មានរមណីយដ្ឋានចំនួន៣កន្លែង ពុំទាន់រៀបចំអភិវឌ្ឍន៍ដើម្បីទទួលភ្ញៀវទេសចរមកកម្សាន្តនៅឡើយ មានកោះសេះ, កែបថ្មី និងភ្នំដូង។
ក្រៅពីសំណង់ចាស់ៗ បន្សល់ទុកពីជំនាន់អណានិគមបារាំង ដែលត្រូវបានកែលម្អ លាបពណ៌ បំពាក់ភ្លើងបំភ្លឺ គួរឲ្យទាក់ទាញ ក្រុងកំពតបាននឹងកំពុងអភិវឌ្ឍន៍លើវិស័យទេសចរណ៍ជាច្រើន ដូចជា ការបង្កើនចំនួនទូកជិះកម្សាន្តតាមដងព្រែក និងជាពិសេស សកម្មភាពទេសចរណ៍លក្ខណៈជាកីឡាមាន កីឡាជិះក្ដាររំអិលលើទឹក “ដូងទេរ” ទូកកាយ៉ាក់ (Kayaking) ខ្សែរ៉កឆ្លងព្រែក Zipline “River Park” កីឡាប៉ោងខ្យល់បណ្ដែតទឹក រមណីយដ្ឋានធម្មជាតិកោះតាដា រមណីយដ្ឋានសំបូរព្រៃចាកជាដើម ដែលទាំងអស់នេះ សុទ្ធតែជាកន្លែងទាក់ទាញដល់ភ្ញៀវជាតិនិងអន្តរជាតិមកទស្សនាយ៉ាងច្រើនកុះករផងដែរ៕
Source: Kampuchea Thmey Daily
0 Comments