កំពង់ឆ្នាំង ៖ បុរសម្នាក់ បានស្លាប់ដោយសារគ្រោះថ្នាក់គោយន្តកន្ត្រៃក្រឡាប់សង្កត់ពីលើ ដែលហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង៨និង៥០នាទី ព្រឹក ថ្ងៃទី៣០ ខែមករា ឆ្នាំ២០១៩ លើផ្លូវជាតិលេខ៥៣Aចំណុច អូរចន្លុះ ស្ថិតក្នុងភូមិអញ្ចាញរូង ឃុំអញ្ចាញរូង ស្រុកបរិបូរណ៍ ខេត្តកំពង់ឆ្នាំង។
សមត្ថកិច្ចនគរបាលមូលដ្ឋានបាននិយាយឲ្យដឹងថា ជនរងគ្រោះស្លាប់ក្នុងហេតុការណ៍គ្រោះថ្នាក់ខាងលើនេះមាន ឈ្មោះ ម៉ៅ គឿង ភេទប្រុស អាយុ៣៧ឆ្នាំ មានមុខរបរដើរជីកអណ្ដូងស្នប់ រស់នៅក្នុងភូមិ ព្រៃកកោះ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។ ដោយនៅមុនពេលកើតហេតុ គេបានឃើញជនរងគ្រោះ បើកគោយន្តកន្ត្រៃរបស់ខ្លួនក្នុងល្បឿនលឿន ស្រាប់តែមកដល់កន្លែងកើតហេតុ បានដាច់រ៉ូទិលកង់ខាងស្តាំ បណ្តាលឲ្យគោយន្តកន្ត្រៃរបស់គាត់ក្រឡាប់ធ្លាក់ពីលើផ្លូវ សង្កត់ពីលើស្លាប់ភ្លាមៗនៅនឹងកន្លែងតែម្តង។
ក្រោយពេលកើតហេតុ សមត្ថកិច្ចបានធ្វើការពិនិត្យរួចរាល់ ក៏បានប្រគល់សពជូនគ្រួសារ យកមកលំនៅឋានធ្វើបុណ្យទៀនតាមប្រពៃណី។ ដោយឡែក គោយន្តកន្ត្រៃ ត្រូវបានសមត្ថកិច្ចនាំយកមករក្សាទុកនៅអធិការនគរបាលស្រុកបរិបូណ៌ រង់ចាំក្រុមគ្រួសារមកទទួលយក៕
Source: Kampuchea Thmey Daily
0 Comments