កំពង់ឆ្នាំង ៖ មនុស្សប្រុស/ស្រី២នាក់ រងរបួសធ្ងន់ និងស្រាល ដោយសារហេតុការណ៍គ្រោះថ្នាក់ចរាចរណ៍មួយ ដោយម៉ូតូ២គ្រឿងបុកគ្នា។
ករណីខាងលើនេះ បានកើតឡើងនៅលើផ្លូវជាតិលេខ៥ ស្ថិតក្នុងភូមិត្រពាំងអញ្ចាញ ឃុំស្វាយជ្រំ នៅម៉ោងជិត១២ថ្ងៃត្រង់ ថ្ងៃទី៣០ ខែមករា ឆ្នាំ២០១៩។
សមត្ថកិច្ចនគរបាលមូលដ្ឋាននៅកន្លែងកើតហេតុបានឲ្យដឹងថា ម៉ូតូទាំងគ្រឿងនេះ ធ្វើដំណើរក្នុងទិសដៅស្របគ្នា ដោយម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខកំពង់ឆ្នាំង1B.0763 បើកខាងមុខ និងម៉ូតូម៉ាកហុងដាសេ១២៥ ពាក់ស្លាកលេខ កំពង់ឆ្នាំង1D.8746 បើកពីក្រោយ។ លុះដល់ចំណុចកើតហេតុ ម៉ូតូស្ត្រីរងគ្រោះដែលបើកនៅខាងមុខ បានបត់ឆ្លងផ្លូវទៅខាងឆ្វេងដៃ បណ្តាលឲ្យម៉ូតូនៅខាងក្រោយដែលបើកដោយបុរសរងគ្រោះក្នុងល្បឿនលឿន ទៅបុកពីក្រោយពេញមួយទំហឹងតែម្ដង។
នៅក្នុងហេតុការណ៍គ្រោះថ្នាក់ចរាចរណ៍នេះ បណ្តាលឲ្យបុរសម្នាក់រងរបួសធ្ងន់ និងស្ត្រីម្នាក់ទៀតរងរបួសស្រាល។ តែគេមិនបានស្គាល់ឈ្មោះជនរងគ្រោះទាំង២នាក់នោះទេ ពីព្រោះក្រោយពេលកើតហេតុភ្លាមៗនោះ ត្រូវបានគេដឹកចេញពីកន្លែងកើតហេតុយកទៅព្យាបាលនៅមន្ទីរពេទ្យ៕
Source: Kampuchea Thmey Daily
0 Comments