ភ្នំពេញ ៖ លោក Ho Ren Hua នាយកក្រុមហ៊ុន ធីដាប់ប៊លយូភីស៊ី អ៊ីនវេសមិន (ខេមបូឌា) ឯ.ក បានថ្លែងថា ដោយសារតម្រូវការ វត្ថុធាតុដើម ដំឡូងមី ឲ្យបានគ្រប់គ្រាន់ក្នុងការកែច្នៃក្រុមហ៊ុនរបស់លោក គម្រោងបង្កើតចម្ការ និងដាំដំឡូងមីនៅលើផ្ទៃដីចំនួន៤.០០០ហិកតា នៅស្រុកសំរោង ខេត្តឧត្តរមានជ័យ ដោយខ្លួនឯង ដើម្បីធានានូវនិរន្តរភាព នៃការផ្គត់ផ្គង់។
ការលើកឡើងរបស់ប្រធានក្រុមហ៊ុន លោក Ho Ren Hua បានធ្វើឡើង ក្នុងជំនួបជាមួយ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃអង្គារ ៣កើត ខែបុស្ស ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី០៨ ខែមករា ឆ្នាំ២០១៩ នៅទីស្ដីការក្រសួង។
នាឱកាសនោះ លោកនាយកក្រុមហ៊ុន បានជម្រាបជូន លោករដ្ឋមន្ត្រី ថា ក្រុមហ៊ុនមានប្រភពមកពីប្រទេសថៃ និងបានបោះទុនវិនិយោគលើវិស័យកសិ-ឧស្សាហកម្មនៅកម្ពុជា ដោយក្រុមហ៊ុនបានទទួលគោលការណ៍បង្កើតរោងចក្រកែច្នៃដំឡូងមី ពីក្រសួងឧស្សាហកម្ម និងសិប្បកម្ម តាំងពីចុងឆ្នាំ២០១៧ មកម្ល៉េះ។ បច្ចុប្បន្ន ក្រុមហ៊ុន កំពុងបញ្ចប់ការសាងសង់រោងចក្រ និងត្រៀមលក្ខណៈក្នុងការដំណើរការកែច្នៃក្នុងពេលឆាប់ៗខាងមុខ។
នៅក្នុងឆ្នាំ២០២០ ក្រុមហ៊ុនមានគម្រោងពង្រីកការកែច្នៃដំឡូងមីពី៤០.០០០ ទៅ ៥០.០០០តោន និងបង្កើនការកែច្នៃរហូតដល់ ២០០.០០០តោន នៅពេលអនាគត។ ទន្ទឹមនឹងនេះ ក្រុមហ៊ុនក៏មានគម្រោងបង្កើតចម្ការ និងដាំដំឡូងមីនៅលើផ្ទៃដីចំនួន៤.០០០ហិកតា នៅស្រុកសំរោង ខេត្តឧត្តរមានជ័យ ដោយខ្លួនឯង ដើម្បីធានានូវនិរន្តរភាព នៃការផ្គត់ផ្គង់។
នាឱកាសនោះ លោករដ្ឋមន្ត្រី បានសម្ដែងនូវក្តីសាទរចំពោះក្រុមហ៊ុន ដែលបានបោះទុនវិនិយោគនៅកម្ពុជា ហើយ លោករដ្ឋមន្ត្រី ក៏សូមគាំទ្រដល់ការបង្កើតចម្ការ និងដាំដំឡូងមីនៅកម្ពុជាផងដែរ។
លោករដ្ឋមន្ត្រី បានណែនាំក្រុមហ៊ុនឲ្យអនុវត្តនូវផលិតកម្មតាមកិច្ចសន្យា ដោយធ្វើការកំណត់ទីតាំងដាំដុះដែលមានសក្ដានុពលសម្រាប់ដំណាំដំឡូងមី ទន្ទឹមនឹងនេះបណ្តាខេត្តដែលមានព្រំប្រទល់ជាប់ខេត្តឧត្តរមានជ័យក៏មានសក្ដានុពលសម្រាប់ដំណាំនេះផងដែរ។
ជាចុងក្រោយ លោករដ្ឋមន្ត្រី បានណែនាំដល់ក្រុមហ៊ុន បន្តសហការជាមួយមន្ត្រីពាក់ព័ន្ធ ដើម្បីពិភាក្សាពីនីតិវិធីនានាក្នុងការគាំទ្រដល់ការវិនិយោគនេះទទួលបានជោគជ័យ៕
Source: Kampuchea Thmey Daily
0 Comments