ភ្នំពេញ ៖ ជនសង្ស័យម្នាក់ ត្រូវបាននគរបាលចាប់ដាក់ខ្នោះ ខណៈលួចម៉ូតូគេ ហើយរត់គេចខ្លួនជាង១ខែ។
ការឃាត់ខ្លួន នេះ នៅវេលាម៉ោង១០ព្រឹក ថ្ងៃទី០៩ ខែមករា ឆ្នាំ២០១៩ នៅផ្លូវបេតុងក្រុម៩ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ។
គួររំលឹកថា កាលពីវេលាម៉ោង០០និង៣០នាទី ថ្ងៃទី០៥ ខែធ្នូ ឆ្នាំ២០១៨ នៅចំណុចផ្ទះលេខ១៧ ផ្លូវលេខ៥ក្រុមទី៤ភូមិ ក្រោលគោសង្កាត់ គីឡូម៉ែត្រលេខ៦ មានករណីលួចម៉ូតូមួយគ្រឿង ម៉ាកហុងដា F-T-R ពណ៌ទឹកក្រូច ពាក់ស្លាកលេខភ្នំពេញ ១CK ៤១៣០ ០១គ្រឿង។
ជនរងគ្រោះ ឈ្មោះ ទូច ម៉ាថេង ភេទប្រុស អាយុ២២ឆ្នាំ មុខរបរកម្មការិនី បច្ចុប្បន្នស្នាក់នៅទីតាំងកើតហេតុ។ បន្ទាប់ពីជនសង្ស័យធ្វើសកម្មភាពជាក់ស្ដែង សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ ញ៉ែម ហៃ ហៅ ហៃ ភេទប្រុស អាយុ១៨ឆ្នាំ មុខរបរ រត់តុការ ស្នាក់នៅផ្ទះលេខ ផ្លូវ ភូមិ មិត្តភាព សង្កាត់ឫស្សីកែវ ខណ្ឌឫស្សីកែវ ។
លុះដល់វេលាម៉ោង១០ព្រឹក ថ្ងៃទី០៩ ខែមករា ឆ្នាំ២០១៩ កម្លាំងជំនាញខណ្ឌ និងប៉ុស្តិ៍ ធ្វើការស្រាវជ្រាវឃាត់ខ្លួនជនសង្ស័យម្នាក់ទៀត ឈ្មោះ ម៉េត វឿន ភេទប្រុស អាយុ៣៩ឆ្នាំ មុខរបរគ្មាន ស្នាក់នៅបន្ទប់ជួល គ្មានលេខ ផ្លូវបេតុង ក្រុម៩ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ។ ឃាត់នៅចំណុចបន្ទប់ជួល ផ្លូវបរតុង ក្រុមទី៩ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ។
សមត្ថកិច្ចឲ្យដឹងថា នៅថ្ងៃ០៤ ខែធ្នូ ឆ្នាំ២០១៨ ជនរងគ្រោះបានទុកម៉ូតូនៅក្នុងបន្ទប់ជួលលេខ១៧ចាក់សោ ហើយចេញទៅធ្វើការយប់ រហូតភ្លឺម៉ោង៦និង៣០នាទីព្រឹក ថ្ងៃទី៥ ខែធ្នូ ឆ្នាំ២០១៨ ទើបត្រឡប់មកបន្ទប់ស្នាក់នៅវិញ ឃើញទ្វាបន្ទប់ចំហ រកមើលម៉ូតូ ស្រាប់តែបាត់តែម្តង បន្ទាប់មកជនរងគ្រោះបានមកដាក់ពាក្យបណ្តឹងនៅប៉ុស្តិ៍រដ្ឋបាល ក្រោយពីបានទទួលពាក្យបណ្ដឹងហើយ កម្លាំងជំនាញខណ្ឌ និងប៉ុស្តិ៍ បានបើកការស្រាវជ្រាវ រហូតឈានទៅឃាត់ខ្លួនជនសង្ស័យម្នាក់ លុះនៅថ្ងៃទី៩ ខែមករា ឆ្នាំ២០១៩ ម៉ោង១០ព្រឹក បានឃាត់ម្នាក់ទៀត។
អធិការដ្ឋាន កំពុងបន្តការស្រាវជ្រាវរកបក្ខពួក និងម៉ូតូរបស់ជនរងគ្រោះមកវិញ ចំណែកជនសង្ស័យដែលឃាត់ បានកសាងសំណុំរឿងបញ្ជូនតាមនីតិវិធី៕
Source: Kampuchea Thmey Daily
0 Comments