ភ្នំពេញ ៖ រថយន្តម៉ាក ហ៊ីយ៉ាន់ដាយបុកជាមួយម៉ូតូ ០១គ្រឿង ម៉ាកហុងដាខ្លឹប(គុប)បណ្តាលឲ្យមនុស្សស្លាប់ម្នាក់ កាលពីវេលាម៉ោង១៤ និង០០នាទី ត្រូវនឹងថ្ងៃទី២៤ ខែមករា ឆ្នាំ២០១៩ ត្រង់ចំណុចមុខក្លោងទ្វារវត្តច័ន្ទបុរីវង្ស លើផ្លូវជាតិលេខ៥ ស្ថិតនៅភូមិគ្រួស សង្កាត់សំរោង ខណ្ឌព្រែកព្នៅ រាជធានីភ្នំពេញ។
សមត្ថកិច្ចមូលដ្ឋានបានឲ្យដឹងថា គ្រោះថ្នាក់ចរាចរណ៍នេះរវាងរថយន្តម៉ាក ហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ3E-0678 ធ្វើដំណើរលើផ្លូវជាតិលេខ៥ ក្នុងទិសដៅពីជើងទៅត្បូង លុះមកដល់កន្លែងកើតហេតុបានបុកជាមួយម៉ូតូ ០១គ្រឿង ម៉ាកហុងដាខ្លឹប(គុប) ពណ៌ទឹកប៊ិច ពាក់ស្លាកលេខកណ្តាល1A-9719 ធ្វើដំណើរលើផ្លូវជាតិលេខ៥ ក្នុងទិសដៅកើតទៅលិច(បត់ឆ្លងផ្លូវ) ត្រូវរថយន្តបុកអូសប្រមាណជាង១០ម៉ែត្រ របូតម៉ាស៊ីនចេញពីតួ។
អ្នកបើកបររថយន្តឈ្មោះ សរ អ៊ូរ ភេទប្រុស អាយុ ២១ឆ្នាំ ស្នាក់នៅផ្ទះលេខ១១០ ភូមិពាន់វត្ត ឃុំប្រាសាទ ស្រុកកំពង់ត្របែក ខេត្តព្រៃវែង(អ្នកបើកបរឃាត់ខ្លួន)។ អ្នកបើកបរម៉ូតូឈ្មោះ ទូច ព្រឹម ភេទប្រុស អាយុ ៧៥ឆ្នាំ ស្នាក់នៅភូមិបាសិទ្ធិ ឃុំម្កាក់ ស្រុកអង្គស្នួល ខេត្តកណ្តាល(ស្លាប់) ក្រោយកើតហេតុត្រូវបានសាច់ញាតិយកទៅធ្វើបុណ្យតាមប្រពៃណី។
សមត្ថកិច្ចបញ្ជាក់ថា ករណីនេះបណ្តាលឲ្យមនុស្សស្លាប់ម្នាក់ ខូចខាតរថយន្ត និងម៉ូតូមួយគ្រឿង។ ករណីនេះកម្លាំងបានប្រគល់ឲ្យជំនាញការិយាល័យនគរបាលចរាចរណ៍ផ្លូវគោក៕
Source: Kampuchea Thmey Daily
0 Comments