ក្លិបបាល់ទាត់អាស៊ីអឺរ៉ុប សមាជិកពានរង្វាន់លីគកំពូលកម្ពុជា (Metfone Cambodian League) សំបូរទៅដោយកីឡាករយុវជននៅក្នុងក្លិប ខណៈថ្មីៗនេះក្លិបក៏បានបានរៀបចំចុះកិច្ចសន្យាជាមួយកីឡាករចំនួន១២នាក់ សុទ្ធតែជនជាតិខ្មែរមុនរដូវកាលថ្មីឆ្នាំ២០១៩ មកដល់ហើយលោក សុក វាសនា គ្រូបង្វឹកប្រចាំក្រុមកំពុងតែត្រូវការកម្លាំងបន្ថែម ព្រោះកីឡាករចាស់ៗមួយចំនួនបានចូលនិវត្តន៍និងចាកចេញពីក្លិបអស់។
លោក សុក វាសនា បានបញ្ជាក់ថា «ឆ្នាំនេះកីឡាករខ្មែរភាគច្រើនសុទ្ធតែយុវជន ដែលពុំសូវមានបទពិសោធក្នុងលីគអាជីព ដោយសារក្រុមមានកញ្ចប់ថវិកាតូច យើងពុំមានលទ្ធភាពនាំយកកីឡាករខ្មែរឆ្នើមៗមកចូលរួមទេ។ នេះជាផលលំបាកមួយសម្រាប់ក្រុម។ តែពួកយើងក៏មានមោទនភាព ដែលថ្នាក់ដឹកនាំសាកលវិទ្យាល័យ ពិសេសឯកឧត្តមប្រធានក្លិប ទោះមានភាពខ្វះខាតក៏គាត់នៅតែព្យាយាមជួយជ្រោមជ្រែង មិនថាតែក្លិបបាល់ទាត់យើង គឺស្ទើរគ្រប់ប្រភេទកីឡា ដើម្បីត្រៀមសម្រាប់ SEA Games ឆ្នាំ២០២៣»។
ថ្មីៗនេះក្លិបអាស៊ីអឺរ៉ុប បានចុះកិច្ចសន្យាជាមួយកីឡាករ១២នាក់ដើម្បីត្រៀមរដូវកាលថ្មីរបស់ខ្លួនស្របពេលកីឡាករទាំងអស់នោះមានមកពីព្រះខ័នរាជស្វាយរៀង៤រូប, សូលទីឡូអង្គរ២រូប, ការពារជាតិអាយុក្រោម១៩ឆ្នាំ២រូប, វេស្ទើន១នាក់, ណាហ្គាវើលដ៍១នាក់, វិសាខា១នាក់ និងក្រុមពាក់កណ្ដាលអាជីព១នាក់។ តំណាងក្លិបមួយនេះធ្លាប់បានលើកឡើងថា កូនក្រុមរបស់ខ្លួនកាលពីរដូវកាល២០១៨កន្លងទៅនៅសល់ប្រមាណជាង១០នាក់ប៉ុណ្ណោះ ដោយសារអ្នកខ្លះផ្លាស់ទ្រនំថ្មី និងមួយចំនួនទៀតបានបញ្ចប់អាជីព ស្របពេលថ្មីៗនេះក្លិបបានធ្វើតេស្តសមត្ថភាពកីឡាករយុវជនជាច្រើននាក់ហើយជម្រុះនៅសល់ជាង២០នាក់ មុនសម្រេចជ្រើសរើសយកអ្នកល្អចូលរួមក្នុងក្រុម។
បើនិយាយពីលទ្ធផលក្នុងពានរង្វាន់លីគកំពូលរបស់កម្ពុជា ក្រុមអាស៊ីអឺរ៉ុប បានបញ្ចប់រដូវកាលរបស់ខ្លួនដោយឈរចំណាត់ថ្នាក់លេខ៧ ក្នុងចំណោមសមាជិកទាំង១២ក្រុម គឺជាលទ្ធផលដ៏ល្អរបស់ក្លិបតាំងពីបង្កើតមក។ តាមរយៈកម្មវិធីប្រកួតសន្សំពិន្ទុ២២ប្រកួតក្រុមអាស៊ីអឺរ៉ុប បានយកឈ្នះគូប្រកួតបាន៨លើក ហើយស្មើគ្នាបាន៦លើកនិងចាញ់៨លើក ប៉ុណ្ណោះ។ បើនិយាយពីក្នុងពានរង្វាន់សម្តេចតេជោ ហ៊ុន សែន វិញក្រុមនេះបានធ្លាក់ចេញនៅវគ្គ១៦ក្រុមចុងក្រោយថ្នាក់ជាតិក្រោយចាញ់ក្រុមជើងឯកក្រសួងការពារជាតិដោយលទ្ធផលទាំង២ជើង១០ទល់២៕
Source: Kampuchea Thmey Daily
0 Comments