ក្លិប​បឹងកេត ចេញទៅ​រៀបចំ​កម្មវិធី​ចែករំលែក​បទពិសោធន៍​បាល់ទាត់​នៅ​ខេត្តកំពង់ចាម

ក្លិប​បាល់ទាត់​បឹងកេត សមាជិក​ពានរង្វាន់​លី​គ​កំពូល​កម្ពុជា (Metfone Cambodian League) បានប្រកាស​នៅ​ថ្ងៃ​ព្រ​ហ​ស្បតិ៍ សប្តាហ៍​នេះ​ថា​នឹង​រៀបចំ​កម្មវិធី​ចែករំលែក​បច្ចេកទេស​បាល់ទាត់ (Football Clinic) រយៈពេល​០២​ថ្ងៃ នៅ​ខេត្តកំពង់ចាម គឺ​នៅ​ថ្ងៃ​សៅរ៍ ទី ២៦ និង​អាទិត្យ ទី​២៧ ខែមករា ឆ្នាំ​២០១៩ ចុង​សប្ដាហ៍​នេះ​។

យោង​តាម​ការ​បញ្ជាក់​របស់​ក្លិប​បាន​លើក​ឡើ​ង​ថា​ ក្នុង​ដំណើរ​ឆ្ពោះ​ទៅ​កាន់​ខេត្ត​ដែល​ជា​មូលដ្ឋាន​កំណើត​របស់​ក្លិប​នេះ ក្រុម​បឹងកេត នឹងធ្វើ​ការប្រកួត​មិត្តភាព​ជាមួយនឹង​ក្រុមបាល់ទាត់​យុវជន​ភូមិ​រការ នៅក្នុង​ថ្ងៃ​សៅរ៍ ទី ២៦ វេលា​ម៉ោង​៣ និង ៣០​នាទី​រសៀល នៅ​ទីលាន​បាល់ទាត់​ខេត្តកំពង់ចាម ផងដែរ​។ សម្រាប់​ថ្ងៃទី ២៧ ខែមករា​វិញ ក្រុម​កីឡាករ និង​គ្រូបង្វឹក ក៏​នឹងចូលរួម​ចែករំលែក​បច្ចេកទេស​បាល់ទាត់ ដល់​យុវជន ចំនួន ៥០​នាក់ និង​ការលេង​ហ្គេម​កំសាន្ត​ថែម​ទៀតផង​។

លោក បែ មករា អ្នកចាត់ការ​ទូទៅ​ក្លិប​បឹងកេត បាន​លើកឡើងថា «​ចំណុច​សំខាន់​ទី​១ គឺ​យើង​ចង់​ចែករំលែក​បទ​ពិសោធ​ស្ដីពី​បាល់ទាត់​ដល់​ប្អូនៗ​នៅ​ខេត្តកំពង់ចាម ក៏ដូចជា​ខេត្ត​ផ្សេងៗ​ទៀត​ឲ្យ​យល់ដឹង​កាន់តែ​ទូលំទូលាយ​ពី​បាល់ទាត់​។ ទី​២ គឺ​បន្ទាប់ពី​ពង្រឹងពង្រីក​ពី​វិស័យ​បាល់ទាត់​នៅ​តាម​បណ្ដា​ខេត្ត​ហើយ យើង​ចង់​បង្ហាញខ្លួន​យើង​ឲ្យ​ហ្វេ​ន​ស្គាល់​បាន​ច្រើន​។ យើង​ក៏​ចង់​បង្ហាញថា យើង​ក៏​មាន​ប្រភព​ពី​ខេត្តកំពង់ចាម​ដែរ​»​។ សូម​រំលឹក​ថា ​កម្មវិធី​ចែករំលែក​បទពិសោធ​ន៍​បាល់ទាត់​នេះ​គឺជា​លើក​ទី​ពីរ​ហើយ​របស់​ក្លិប​បាល់ទាត់​បឹងកេត ក្នុងការ​ចូលរួម​ចែករំលែក​បច្ចេកទេស​បាល់ទាត់​ទៅដល់​យុវជន​នៅតាម​បណ្តា​ខេត្ត បន្ទាប់ពី​បានធ្វើ​ជោគជ័យ​នៅ​ខេត្តកំពត កាលពី​ឆ្នាំ២០១៧ ​កន្លងទៅ​។

ក្លិប​បឹងកេត ឡើង​មកលេង​ពានរង្វាន់​លី​គ​កំពូល​កម្ពុជា នៅ​ឆ្នាំ​២០១២ ហើយ​ធ្លាប់​ឈ្នះ​ជើងឯក​ចំនួន​៣​លើក​គឺ​នៅ​ឆ្នាំ​២០១២,២០១៦ និង​២០១៧ ខណៈ​នៅ​ឆ្នាំ​២០១៣ និង​២០១៤ ត្រឹម​ឈរជើង​ឯក​រង​។ នៅ​ឆ្នាំ​២០១៧ ក្រុម​នេះ​ឈ្នះ​ពានរង្វាន់ CNCC Cup 2017 ផងដែរ​។ ចំណែក​ពានរង្វាន់​នៅក្រៅ​ស្រុក​វិញ​ក្រុម​ដែល​មាន​ប្រភព​មកពី​ខេត្តកំពង់ចាម មួយ​នេះ​ធ្លាប់​ចេញទៅ​ប្រកួត​វគ្គ​ជម្រុះ​តាម​ពូ​ល​ពានរង្វាន់ AFC President's Cup នៅ​ឆ្នាំ​២០១៣ ធ្លាប់​ឡើង​ដល់​វគ្គ​ផ្ដាច់ព្រ័ត្រ​ពានរង្វាន់ Toyota Mekong Club Championship 2015 តែ​ចាញ់​ក្រុម Buriram United របស់​ថៃ និង​ប្រកួត​ក្នុង​ពានរង្វាន់​នៅ​ឆ្នាំ​២០១៦ និង​២០១៧ ផងដែរ​។ នៅ​ឆ្នាំ​២០១៨​និង​២០១៨ ក្រុម​នេះ​មានឈ្មោះ​ចេញទៅ​លេង​ពានរង្វាន់​លំដាប់​ទី២​ប្រចាំ​ទ្វីប​អាស៊ី​ AF Cup ផងដែរ​តែ​ធ្លាក់​ត្រឹម​វគ្គ​ជម្រុះ​តាម​ពូល​ដូច​គ្នា​៕

Source: Kampuchea Thmey Daily