កណ្តាល ៖ លោក អ៊ី សុវណ្ណ ចៅក្រមស៊ើបសួរសាលាដំបូងខេត្តកណ្តាល នៅថ្ងៃទី០៩ ខែមករា ឆ្នាំ២០១៩ បានសម្រេចចេញដីកាឃុំខ្លួនបុរសយកកាំភ្លើងភ្ជង់ក្បាលប្រពន្ធ ដែលមិនព្រមចូលក្នុងឡានព្រោះតែដណ្តើមប្លង់ដីគ្នា ដាក់ពន្ធនាគារបណ្ដោះអាសន្ន ក្រោមបទចោទប្រកាន់ "ហិង្សាដោយចេតនាមានស្ថានទម្ងន់ទោស និងកាន់កាប់អាវុធដោយគ្មានការអនុញ្ញាត" ដែលប្រព្រឹត្តនៅថ្ងៃទី០៨ ខែមករា ឆ្នាំ២០១៩ វេលាម៉ោង១៥និង៣៥នាទី នៅចំណុច ភូមិព្រែកខ្សេវ ឃុំរកាខ្ពស់ ស្រុកស្អាង ខេត្តកណ្តាល តាមមាត្រា២១៨ មាត្រា៤៩០ នៃក្រមព្រហ្មទណ្ឌ។
ជនត្រូវចោទមានឈ្មោះ ឆាយ សាលាភ ភេទប្រុស អាយុ៣៣ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅភូមិ ព្រែកខ្សេវ ឃុំរកាខ្ពស់ ស្រុកស្អាង ខេត្តកណ្តាល។
ជនរងគ្រោះមាន ឈ្មោះ នួន ដានី ភេទស្រី អាយុ២៨ឆ្នាំ ជនជាតិខ្មែរ មុខរបរមេផ្ទះ ទីលំនៅភូមិ ព្រែកខ្សេវ ឃុំរកាខ្ពស់ ស្រុកស្អាង ខេត្តកណ្តាល។
លោកវរសេនីយ៍ សេង សុជាតិ អធិការនគរបាលស្រុកស្អាងបានប្រាប់ឲ្យដឹងថា កាលពីថ្ងៃទី០៣ ខែធ្នូ ឆ្នាំ២០១៨ ឈ្មោះ ឆាយ សាលាភ (ប្តី) និងឈ្មោះ នួន ដានី (ប្រពន្ធ) បានព្រមព្រៀងធ្វើកិច្ចសន្យាលែងលះគ្នា នៅសាលាឃុំរកាខ្ពស់។ លុះនៅថ្ងៃទី០៨ ខែមករា ឆ្នាំ២០១៩ វេលាម៉ោង១៥និង៣៥នាទី ឈ្មោះ ឆាយ សាលាភ បានជិះរថយន្តមួយគ្រឿង ម៉ាកតូយូតាព្រីស ពណ៌ទឹកប្រាក់ ពីភ្នំពេញ មកផ្ទះ ឈ្មោះនួន ដានី ស្ថិតក្នុងភូមិ ព្រែកខ្សេវ ឃុំរកាខ្ពស់ ស្រុកស្អាង ខេត្តកណ្តាល។ ពេលមកដល់ឈ្មោះ ឆាយ សាលាភ បានសួរ ឈ្មោះ នួន ដានី រកប្លង់ផ្ទះដែលស្ថិតនៅបូរីចំការដូង ដើម្បីដាក់លក់ផ្ទះ នៅការិយាល័យបូរីចំការដូង ពេលជាមួយគ្នានោះ ឈ្មោះនួន ដានី មិនទៅតាម ទើបឈ្មោះ ឆាយ សាលាភ កាន់កាំភ្លើងខ្លីអាមេបញ្ចូលគ្រាប់ភ្ជង់ឈ្មោះនួន ដានី រួចចាប់គ្រៀក ដើម្បីឲ្យចូលរថយន្តរបស់ខ្លួន ទន្ទឹមនឹងនោះមានប្រជាពលរដ្ឋជាច្រើននាក់បានឃាត់រថយន្ត ហើយដណ្តើមបានអាវុធពី ឈ្មោះ ឆាយ សាលាភ និងជួយឈ្មោះ នួន ដានី ចេញពីរថយន្តមកវិញ។ ចំណែកឈ្មោះ ឆាយ សាលាភ បានរត់គេចខ្លួន។
ពេលទទួលបានព័ត៌មានខាងលើ សមត្ថកិច្ចនគរបាលប៉ុស្តិ៍រកាខ្ពស់ សហការជាមួយកម្លាំងអន្តរាគមន៍ស្រុកស្អាង បានឃាត់ខ្លួន ឈ្មោះ ឆាយ សាលាភ បញ្ជូនមកអធិការដ្ឋាននគរបាលស្រុកស្អាង ដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ ឆាយ សាលាភ សារភាពថា ខ្លួនបានទិញអាវុធខ្លីនេះពីឈ្មោះរាក់ ភេទប្រុស អាយុ១៤ឆ្នាំ តម្លៃ៣០ដុល្លារ នៅចំណុចវាលខ្សាច់ ចាក់អង្រែលើ កាលពីឆ្នាំ២០១៦ ដើម្បីទុកនៅផ្ទះភូមិព្រែកខ្សេវ ឃុំរកាខ្ពស់ និងបានជិះរថយន្តយកអាវុធខ្លីខាងលើភ្ជង់គំរាមឈ្មោះនួន ដានី ពិតប្រាកដមែន។
ឈ្មោះឆាយ សាលាភ សារភាពបន្ថែមទៀតថា ខ្លួនពិតជាបានជក់គ្រឿងញៀនប្រភេទម៉ាទឹកកករយៈពេល០៦ខែកន្លងមកហើយ៕
Source: Kampuchea Thmey Daily
0 Comments