កម្លាំងគណៈបញ្ជាការឯកភាពខណ្ឌដូនពេញ ចេញប្រតិបត្តិការចុះធ្វើរដ្ឋបាលទ្រង់ទ្រាយធំ នៅតំបន់មិនរៀបរយ ឃាត់ខ្លួនជនសង្ស័យ១៥នាក់

ភ្នំពេញ ៖ កម្លាំងគណៈបញ្ជាការឯកភាពខណ្ឌដូនពេញ ដែលដឹកនាំដោយលោកអភិបាលខណ្ឌដូនពេញ បានចុះធ្វើរដ្ឋបាលនៅតំបន់អនាធិបតេយ្យ ដែលសម្បូរដោយជនប្រមូលផ្ដុំប្រើប្រាស់ញៀនថ្នាំនិងអ្នកជួញដូរ ឈានដល់ការបង្ក្រាបបានជនសង្ស័យប្រុសនិងស្រីជាច្រើននាក់ រួមទាំងវត្ថុតាង ដែលអាចប្រព្រឹត្តិបទល្មើសផ្សេងៗមួយចំនួនផងដែរ។

ជាក់ស្ដែង នៅថ្ងៃពុធ ១០រោច ខែបុស្ស ឆ្នាំច សំរឹទ្ធិស័ក ព.ស២៥៦២ រាជធានីភ្នំពេញ ថ្ងៃទី៣០ ខែមករា ឆ្នាំ២០១៩ វេលាម៉ោង១៤និង០០នាទី ដោយបានការសម្របសម្រួលពី លោក ស៊ិន វិរៈ ព្រះរាជអាជ្ញារង អមសាលាដំបូងរាជធានីភ្នំពេញ កម្លាំងគណៈបញ្ជាការឯកភាពខណ្ឌដូនពេញ ដឹកនាំដោយ លោក សុខ ពេញវុធ អភិបាលខណ្ឌដូនពេញ លោកវរសេនីយ៍ឯក ទៀង ច័ន្ទសារ អធិការនគរបាលខណ្ឌដូនពេញលោកវរសេនីយ៍ឯក ថោង ពិសិដ្ឋ មេបញ្ជាការកងរាជអាវុធហត្ថខណ្ឌដូនពេញ លោកវរសេនីយ៍ឯក ប៊ុន សន្យា នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ, លោក ឆាយ ធីរិទ្ធ ចៅសង្កាត់ស្រះចក លោក ឌួង ស៊ីម មេភូមិទី៣ បានដំណើរការត្រួតពិនិត្យរដ្ឋបាលនៅចំណុច ទីតាំងអនាធិបតេយ្យ និងសំណង់មិនរៀបរយក្នុងភូមិទី២ ភូមិទី៣ សង្កាត់ស្រះចក ខណ្ឌដូនពេញ រាជធានីភ្នំពេញ កម្លាំងចូលរួមសរុបចំនួន១៧៩នាក់ ក្នុងនោះកម្លាំងនគរបាលចំនួន១០៦នាក់ កម្លាំងកងរាជអាវុធហត្ថចំនួន២៦នាក់ កម្លាំងរដ្ឋបាលខណ្ឌ សង្កាត់ចំនួន៥៣នាក់។

សមត្ថកិច្ចចម្រុះ ដែលចុះធ្វើរដ្ឋបាល នៅសំណង់អនាធិបតេយ្យនោះ ឃាត់ខ្លួនជនសង្ស័យជាបន្តបន្ទាប់ ស្ថិតនៅក្នុងភូមិ២ និងភូមិ៣ សង្កាត់ស្រះចក ខណ្ឌដូនពេញ រាជធានីភ្នំពេញ ដែលទីតាំងចុះធ្វើរដ្ឋបាលនោះ ត្រូវសមត្ថកិច្ចអះអាងថា ជាសំណង់មិនរៀបរយ ជាជម្រករបស់ក្រុមចែកចាយ ជួញដូរ និងប្រើប្រាស់គ្រឿងញៀន។

សមត្ថកិច្ចបានបញ្ជាក់ថា ការឃាត់ខ្លួនទាំងអស់ចំនួន១៥នាក់ ក្នុងនោះ មានស្រី៨នាក់ផងដែរ គឺសង្ស័យពួកគេថា ជាជនប្រើប្រាស់គ្រឿងញៀន ហើយត្រូវបញ្ជូនទៅកាន់អធិការដ្ឋាននគរបាលខណ្ឌដូនពេញ ដើម្បីបន្តនីតិវិធីសាកសួរ។

ជាមួយគ្នានេះ សមត្ថកិច្ច ក៏បានរុះរើ ជម្រកអនាធិបតេយ្យ ដែលធ្វើអំពីឈើ ប្រក់ស័ង្កសី និងតង់ចំនួន៨ខ្នង បន្ទប់ជួល៤បន្ទប់ ដែលបន្ទប់នីមួយៗ ធ្វើអំពីឈើ ប្រក់ស័ង្កសី ជាជម្រកសម្រាប់ប្រើប្រាស់គ្រឿងញៀន។

សូមបញ្ជាក់ថា សមត្ថកិច្ចដែលចុះប្រតិបត្តិការនោះមាន៣គោលដៅគោលដៅទី១ត្រួតពិនិត្យ បាន៥៤ខ្នងផ្ទះ គោលដៅ២ ត្រួតពិនិត្យបាន២៥ខ្នងផ្ទះ និងគោលដៅ៣ ត្រួតពិនិត្យបានចំនួន១៥ ខ្នងផ្ទះ រហូតដល់វេលាម៉ោង១៧និង០០នាទីថ្ងៃខែឆ្នាំដដែលទើបបញ្ចប់៕