ភ្នំពេញ ៖ មនុស្សប្រុស ស្រីចំនួន៨នាក់ ត្រូវបានប៉ូលិសនៃមន្ទីរប្រឆាំងការជួញដូរមនុស្ស និងការពារអនីតិជន សហការជាមួយនគរបាលមូលដ្ឋានឃាត់ខ្លួន ក្នុងប្រតិបត្តិការចុះបង្ក្រាបទីតាំងម៉ាស្សាមួយកន្លែង ដែលសង្ស័យថា បានបង្កប់សេវាកម្មផ្លូវភេទ។
ប្រតិបត្តិការខាងលើ បានធ្វើឡើងកាលពីវេលាម៉ោង៧និង៤០នាទីយប់ថ្ងៃអង្គារ ទី៨ ខែមករា ឆ្នាំ២០១៩ នៅចំណុចផ្ទះម៉ាស្សាយីហោ បាតដៃសម្រួលសរសៃបែបបុរាណខ្មែរ ផ្ទះលេខ ៨៧A តាមបណ្តោយផ្លូវលេខ១៣៨ ស្ថិតក្នុង ភូមិ៥ ក្រុម៧ សង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ។
ម្ចាស់ទីតាំងត្រូវបានគេស្គាល់ ឈ្មោះសុខ រតនា ភេទប្រុស អាយុ២៧ឆ្នាំ និងឈ្មោះ ដួង ស្រីពៅ ភេទស្រី អាយុ២៦ឆ្នាំ ស្នាក់នៅកន្លែងកើតហេតុ។
សមត្ថកិច្ចបានឲ្យដឹងថា ក្នុងប្រតិបត្តិការនេះ មានការចូលរួមពីអនុប្រធាននាយកដ្ឋានការជួញដូរមនុស្ស និងកម្លាំងនគរបាលមូលដ្ឋាន ដោយធ្វើការឃាត់ខ្លួននារីជាជនរងគ្រោះចំនួន៥នាក់ ម្ចាស់ទីតាំងប្តីប្រពន្ធ២នាក់ រួមទាំងបុរសម្នាក់ជាភ្ញៀវ។
ក្រោយឃាត់ខ្លួននារីជាជនរងគ្រោះត្រូវបាននាំយកទៅមន្ទីរប្រឆាំងការជួញដូរមនុស្សធ្វើការអប់រំ ដោយឡែកជនសង្ស័យ ត្រូវបានកសាងសំណុំរឿងបញ្ជូនទៅតុលាការចាត់ការបន្ត។ ចំពោះ ទីតាំងត្រូវបានសមត្ថកិច្ចបិទទ្វារបណ្ដោះអាសន្ន៕
Source: Kampuchea Thmey Daily
0 Comments