ភ្នំពេញ ៖ កីឡាករជើងខ្លាំងឃុន ឌីម៉ា អ្នកប្រដាល់របស់ក្លិបកងរាជអាវុធហត្ថរាជធានីភ្នំពេញ ត្រូវគេផ្គូផ្គងឲ្យជួបកីឡាករថៃក្រៀងក្រៃ ត.សិលាឆ័យ ខណៈកីឡាករ សេន កុសល អ្នកប្រដាល់មកពីក្លឹបមោងឫស្សីមរតកគុនខ្មែរ ត្រូវជួបកីឡាករថៃស៊ែនសាក់ ប៉.យុទ្ធភូមិ រីឯកីឡាករធើន ធី អ្នកប្រដាល់ នៃក្លិបអង្គមានជ័យខេត្តសៀមរាប ជួបកីឡាករមកពីប្រទេសព័រទុយហ្គាល់Antonio Alberto នៅលើសង្វៀនស៊ីអិនស៊ី នាថ្ងៃទី១២ ខែមករា ឆ្នាំ២០១៩នេះ។
កីឡាករឃុន ឌីម៉ា ជើងខ្លាំងមកពីខេត្តបន្ទាយមានជ័យ ត្រូវគេកត់សម្គាល់ថា ប្រកួតឈ្នះច្រើនជាងចាញ់នៅលើសង្វៀនប្រដាល់ក្នុងស្រុក និងក្រៅស្រុក ហើយគេធ្លាប់ឈ្នះមេដាយមាសកីឡាករស៊ីហ្គេមកន្លងមកទៀតផង។ អញ្ចឹងហើយ ទើបអ្នកស្នេហាកីឡាប្រដាល់ភាគច្រើនកំពុងនាំគ្នាយល់ថា ឃុន ឌីម៉ា គេជាកីឡាករដែលមានសក្ដានុពល ហើយមានសមត្ថភាពគួរឲ្យសរសើរ ដោយម្នាក់ៗហាក់សម្ដែងនូវទំនុកចិត្តចង់ទស្សនាយ៉ាងខ្លាំងនៅគ្រប់ពេលកីឡាកររូបនេះឡើងរេញម្តងៗនោះ។
ក្នុងការជួបជាមួយកីឡាករថៃក្រៀងក្រៃ ត.សិលាឆ័យ ក៏ត្រូវបានអ្នកទស្សនាលើកឡើងថា មានភាគរយឈ្នះច្រើនលើកីឡាករថៃទៀតផង ព្រោះឃុន ឌីម៉ា ចេះក្បាច់គ្រប់ស្នៀត ហើយវាយមិនច្រឡោតនោះទេ។ ចាំមើលរវាងឃុន ឌីម៉ា និងកីឡាករថៃក្រៀងក្រៃ ត.សិលាឆ័យ នរណាជាអ្នកឈ្នះ?។
ចំណែកកីឡាករសេន កុសល ត្រូវជួបកីឡាករថៃស៊ែនសាក់ ប៉.យុទ្ធភូមិ ក្នុងប្រភេទទម្ងន់៥៧គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក តែកីឡាករថៃម្នាក់នេះធ្លាប់មកប្រកួតនៅសង្វៀនស្រុកខ្មែរច្រើនលើកមកហើយដែរ ស្នៀតខ្លាំងរបស់គេ គឺជើងទាត់ ជង្គង់ និងស្នៀតកាច់ផ្ដួល។
រីឯសេន កុសល កាលទើបលេច មុខដំបូង ហាក់ដូចជា វ៉ៃបានគ្រាន់បើ តែមួយរយៈនេះ គេហាក់ដូចជា ស្រុតចុះច្រើន ដោយគេឆាប់ស្រុតកម្លាំងគឺចាប់ពីចុងទឹកទី៣ ទៅកម្លាំងរបស់គេធ្លាក់ចុះខ្លាំងតែម្ដងដែលនេះបង្ហាញថាការហ្វឹកហាត់ របស់គេមិនបានគ្រប់គ្រាន់។ ចាំមើលការប្រកួតនេះសេន កុសល ជាអ្នកឈ្នះ ឬកីឡាករថៃស៊ែនសាក់ ប៉.យុទ្ធភូមិ?។
ដោយឡែក កីឡាករ ធឿន ធី ត្រូវជួបជាមួយកីឡាករមកពីប្រទេសព័រទុយហ្គាល់Antonio Alberto ក្នុងប្រភេទទម្ងន់៦០គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក ព្រោះ ធឿន ធី ជាកីឡាករជើងថ្មីទើបនិងឡើងកូដ ស្នៀតខ្លាំងរបស់គេ គឺកណ្ដាប់ដៃ និងកែង ដែលអាចវាយចេញរហ័សហើយចំគោលដៅ កីឡាករជើងថ្មី និងជើងចាស់ជាច្រើននាក់ដែលគេបានយកឈ្នះ ហើយបានឡើងមកប្រកួតលក្ខណៈមិត្តភាពអន្តរជាតិបែបនេះ។
ការប្រកួតនេះ ត្រូវបានអ្នកតាមដានប្រដាល់លើកឡើងថា រវាងកីឡាករ ធឿន ធី និងកីឡាករមកពីប្រទេសព័រទុយហ្គាល់Antonio Alberto ការឈ្នះចាញ់មានត្រឹមហាសិបភាគរយម្នាក់ប៉ុណ្ណោះ ព្រោះពួកគេមិនដែលជួបគ្នា ណាមួយកីឡាករកម្ពុជា ជាកីឡាករជើងថ្មីកម្លាំងស៊ុហ្វក៏នៅមិនទាន់ពេញដូចអ្នកប្រដាល់ដែលមានបទពិសោធន៍ជោកជាំ និងសង្វៀនដែរ។ ចាំមើលរវាង កីឡាករកម្ពុជា ធឿន ធី និងកីឡាករមកពីប្រទេសព័រទុយហ្គាល់Antonio Alberto នរណាជាអ្នកឈ្នះក្នុងការប្រកួតនេះ?៕
Source: Kampuchea Thmey Daily
0 Comments