ភ្នំពេញ ៖ ជនសង្ស័យម្នាក់ ក្នុងចំណោមបក្ខពួក២នាក់ ត្រូវប្រជាពលរដ្ឋចាប់ប្រគល់ឲ្យសមត្ថកិច្ចបន្ទាប់ពីរូបគេ និងបក្ខពួកប្រើល្បិចចូលទិញកាហ្វេ រួចធ្វើសកម្មភាពលួចម៉ូតូស៊ូមើអ៊ិចមួយគ្រឿងបានសម្រេច កាលពីវេលាម៉ោង៤រសៀល ថ្ងៃទី៨ ខែមករា ឆ្នាំ២០១៩ ភូមិបាក់ទូក សង្កាត់ទួលសង្កែទី១ខណ្ឌឫស្សីកែវ។
ជនសង្ស័យ ឈ្មោះ សយ សុជាតិ ភេទប្រុស អាយុ១៩ឆ្នាំ ស្នាក់នៅបន្ទប់ជួល ភូមិបឹងសាឡាងសង្កាត់ឫស្សីកែវ ខណ្ឌឫស្សីកែវ រួមដំណើរដោយជនសង្ស័យម្នាក់ទៀត ជិះម៉ូតូឌុបគ្នាមួយគ្រឿង ម៉ាកនិក ពណ៌ខ្មៅ ពាក់ស្លាកលេខភ្នំពេញ1FZ. 0251។
ចំណែកជនរងគ្រោះ ឈ្មោះ កុយ ចន្ថា ភេទប្រុស អាយុ៥៣ឆ្នាំ ស្នាក់ភូមិបាក់ទូក សង្កាត់ទួលសង្កែទី១ ខណ្ឌឫស្សីកែវ ជាម្ចាស់ម៉ូតូម៉ាកស៊ូមើអ៊ិច ពណ៌ទឹកប្រាក់ ពាក់ស្លាកលេខភ្នំពេញ1Sk7647។
តាមសម្តីសាច់ញាតិជនរងគ្រោះឲ្យដឹងថា នៅមុនពេលកើតហេតុ ជនរងគ្រោះបានទុកម៉ូតូម៉ាកស៊ូមើអ៊ិចខាងលើ នៅមុខបន្ទប់ ក្បែរកន្លែងគេលក់កាហ្វេ ដោយមិនបានដកសោឡើយ ក្រោយមកស្រាប់មានសង្ស័យ២នាក់ ជិះម៉ូតូមួយគ្រឿងម៉ាកនិកខាងលើចូលមកទិញកាហ្វេមួយកែវនៅក្បែរផ្ទះជនរងគ្រោះ ដោយបក្ខពួកជនសង្ស័យម្នាក់ បានចូលមកទិញកាហ្វេមួយកែវ តែអ្នកលក់មិនទាន់បានលក់ឲ្យផង វាឃើញម៉ូតូស៊ូមើអ៊ិចនៅក្បែរនោះ ក៏ជិះគេចខ្លួនទៅទិសខាងជើងបាត់ ភ្លាមនោះជនសង្ស័យម្នាក់ខាងលើដែលនៅចាំបក្ខពួកធ្វើសកម្មភាពបម្រុងជិះម៉ូតូម៉ាកនិកដែលខ្លួនជិះមកគេចខ្លួនដែរ តែគេចមិនរួច ត្រូវសាច់ញាតិ និងម្ចាស់ម៉ូតូចាប់បានប្រគល់ឲ្យសមត្ថកិច្ចចាត់ការតាមនីតិវិធី៕
Source: Kampuchea Thmey Daily
0 Comments