ភ្នំពេញ ៖ ជនសង្ស័យម្នាក់ ត្រូវបានកម្លាំងប៉ុស្តិ៍នគរបាលរដ្ឋបាលស្រះចកឃាត់ខ្លួនដោយពាក់ព័ន្ធករណីលួចម៉ូតូនៅវេលាម៉ោង៥និង៣០នាទីទៀបភ្លឺថ្ងៃអង្គារ ៩រោច ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៩ ខែមករា ឆ្នាំ២០១៩ ត្រង់ចំណុចរង្វង់មូលគួចកាណុងកាំភ្លើងជ្រុងខាងកើត ផ្លូវព្រះមុន្នីវង្ស ភូមិ១៨ សង្កាត់ស្រះចក ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យឈ្មោះ ឡាំ ញឿន ភេទប្រុស អាយុ២២ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិបំរ៉ុងថ្នល់ការ ឃុំវិហារសួគ៌ ស្រុកខ្សាច់កណ្តាល ខេត្តកណ្តាល។
វត្ថុតាងចាប់យករួមមាន ទី១-ម៉ូតូមួយគ្រឿង ម៉ាក HONDA ZOOMER X ពណ៌សលាយទឹកក្រូច ពាក់ស្លាកលេខ ភ្នំពេញ 1GL-6448 លេខតួ 5161377 និងលេខម៉ាស៊ីន016137 (ប្រគល់ឲ្យជនរងគ្រោះយកទៅរក្សាទុកជាបណ្តោះអាសន្ន)។ ចំណែកជនរងគ្រោះ ឈ្មោះ លីន សម្បត្តិ ភេទប្រុស អាយុ៦០ឆ្នាំ ជនជាតិខ្មែរ មុខរបរនៅផ្ទះ ស្នាក់នៅផ្ទះលេខ២៤១ ផ្លូវលេខK៥ ភូមិចុងខ្សាច់ សង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ។
សមត្ថកិច្ចបន្តថា មុនពេលកើតហេតុ នៅពីថ្ងៃទី២៩ ខែមករា ឆ្នាំ២០១៩ វេលាម៉ោង៥ទៀបភ្លឺជនរងគ្រោះឈ្មោះ លីន សម្បត្តិ ភេទប្រុស អាយុ៦០ឆ្នាំ បានជិះម៉ូតូ HONDA ZOOMER X ពណ៌សលាយទឹកក្រូច ពាក់ស្លាកលេខ ភ្នំពេញ 1GL-6448 មកហាត់ប្រាណនៅរង្វង់មូលគួចកាណុង ពេលធ្វើដំណើរមកដល់បានចតម៉ូតូទុកនៅចិញ្ចើមផ្លូវរង្វង់មូលគួចកាណុងជ្រុងខាងកើត ដោយបានចាក់សោកត្រឹមត្រូវ រួចក៏ដើរហាត់ប្រាណជាធម្មតា ពេលជនរងគ្រោះដើរហាត់ប្រាណបណ្តើរមើលមកម៉ូតូរបស់ខ្លួនបណ្តើរ ស្រាប់តែឃើញជនសង្ស័យឈ្មោះ ឡាំ ញឿន ភេទប្រុស អាយុ២២ឆ្នាំ ឡើងអង្គុយលើម៉ូតូកំពុងធ្វើសកម្មភាពលួចកាច់.កម៉ូតូរបស់ខ្លួន ភ្លាមនោះជនរងគ្រោះបានស្រែកផ្អើលឆោឡោចោរៗ ខណៈនោះជនសង្ស័យបានរត់គេចខ្លួនកាត់តាមសួនច្បារទៅទិសខាងជើង ត្រូវជនរងគ្រោះ រួមជាមួយអ្នកជិតខាងហាត់ប្រាណក្បែរគ្នា ធ្វើការឃាត់ខ្លួនជនសង្ស័យ រួមនឹងម៉ូតូនាំមកប្រគល់ឲ្យសមត្ថកិច្ចប៉ុស្តិ៍នគរបាលរដ្ឋបាលស្រះចក ដើម្បីធ្វើការសាកសួរតែម្តង។ ចំពោះសោក.កម៉ូតូ ត្រូវជនសង្ស័យបោះចោលបាត់រកមិនឃើញ។ ចំណែកម៉ូតូម៉ាកខាងលើ ប្រគល់ឲ្យជនរងគ្រោះយកទៅរក្សាទុកជាបណ្តោះអាសន្នវិញ៕
Source: Kampuchea Thmey Daily
0 Comments