ការស៊ើបអង្កេត​ប្រឆាំង​អំពើពុករលួយ​របស់​អា​រ៉ាប៊ីសាអ៊ូឌីត​ បានបញ្ចប់​ជាមួយ​ការឃុំខ្លួន​មនុស្ស​រាប់សិប​នាក់

ប្រទេស​អារ៉ាប៊ីសាអ៊ូឌីត​ បានប្រកាស​កាលពី​ថ្ងៃ​ពុធ​អំពី​ការបញ្ចប់​ការស៊ើបអង្កេត​ប្រឆាំង​អំពើពុករលួយ​ទម្រង់​ខ្ពស់​មួយ​ដែល​បាន​បង្កើន​ប្រាក់កម្រៃ​រដ្ឋ​ជាង​១០០​ពាន់​លាន​ដុល្លារ​និង​បាន​ឃុំខ្លួន​មនុស្ស​រាប់សិប​នាក់​។​

ការបង្ក្រាប​លើ​អំពើពុករលួយ​ដែល​បានចាប់ផ្តើម​នៅក្នុង​ឆ្នាំ​២០១៧​បាន​នាំ​ឲ្យ​ព្រះអង្គម្ចាស់ រដ្ឋមន្ត្រី​និង​អ្នកជំនួញ​រាប់រយ​នាក់​ត្រូវ​ជាប់ឃុំ​នៅក្នុង​សណ្ឋាគារ​ប្រណីត Ritz-Carlton ក្នុង​រាជធានី​រី​យ៉ា​ដ​របស់​ប្រទេស​អារ៉ាប៊ីសាអ៊ូឌីត​។​

មនុស្ស​មួយចំនួន​ត្រូវបាន​ឃុំខ្លួន​អស់​រយៈពេល​ជាច្រើន​សប្តាហ៍​នៅក្នុង​សណ្ឋាគារ​មួយ​នេះ​ប៉ុន្តែ​ភាគច្រើន​ត្រូវបាន​ដោះលែង​វិញ​បន្ទាប់ពី​បាន​យល់ព្រម​លើ​ការទូទាត់​ហិរញ្ញវត្ថុ​ដ៏​សំខាន់​។​

យោងតាម​សេចក្តីថ្លែងការណ៍​របស់​ទីភ្នាក់ងារ​ព័ត៌មាន Saudi Press Agency (SPA) បាន​ឲ្យ​ដឹងថា ការស៊ើបអង្កេត​អំពើពុករលួយ​បានបញ្ចប់​កាលពី​ថ្ងៃ​ពុធ​ដោយមាន​ការយល់ព្រម​ពី​ព្រះមហាក្សត្រ Salman​។​

សេចក្ដីថ្លែងការណ៍​បាន​និយាយថា “​ព្រះរាជអាជ្ញា​សាធារណៈ​បាន​បដិសេធ​ដោះស្រាយ​សំណុំរឿង​របស់​បុគ្គល​ចំនួន​៥៦​នាក់​ដោយសារតែ​មានកា​រ​ចោទប្រកាន់​ពីបទ​ព្រហ្មទណ្ឌ​ប្រឆាំងនឹង​ពួកគេ​រួចទៅហើយ​”​។​

ករណី​របស់​មនុស្ស​ចំនួន​ប្រាំ​បីនាក់​បន្ថែមទៀត​ត្រូវបាន​បញ្ជូនទៅ​ព្រះរាជអាជ្ញា​សាធារណៈ​បន្ទាប់ពី​ពួកគេ​បាន​បដិសេធ​ឈានដល់​ការដោះស្រាយ​។​
SPA បាន​រាយការណ៍​ថា “​ដំណោះស្រាយ​ត្រូវបាន​ធ្វើឡើង​ជាមួយ​មនុ​ស្ស​ចំនួន​៨៧​នាក់​បន្ទាប់ពី​ការឆ្លើយ​សារភាព​របស់​ពួកគេ​ចំពោះ​ការចោទប្រកាន់​ប្រឆាំងនឹង​ពួកគេ​”​។​

ក្នុងអំឡុងពេល​នៃ​ការស៊ើបអង្កេត ទឹកប្រាក់​ជាង​៤០០​ពាន់​លាន​រី​យ៉ា​ល់​អារ៉ាប៊ីសាអ៊ូឌីត (១០៧​ពាន់​លាន​ដុល្លារ​) ត្រូវបាន​រកឃើញ​ដោយ​រដ្ឋ​នៅក្នុង​ទម្រង់​អចលនទ្រព្យ ក្រុមហ៊ុន សាច់ប្រាក់​និង​ទ្រព្យសម្បត្តិ​ផ្សេងទៀត​។​

តួលេខ​នេះ​គឺ​ដូចគ្នា​ទៅនឹង​ការប្រកាស​កាលពី​ឆ្នាំមុន​ដោយ​អគ្គរាជអាជ្ញា​ដែល​នៅពេល​នោះបាន​និយាយថា ជនសង្ស័យ​ចំនួន​៥៦​នាក់​នៅតែ​កំពុងស្ថិត​ក្នុងការ​ឃុំឃាំង​៕ AFP

​

Source: Kampuchea Thmey Daily