ក្រុម Cambodia All Stars តែងតាំង​ប្រធាន​ក្រុម​២​នាក់​ត្រៀម​ប៉ះ​ក្រុម Muangthong United របស់​ថៃ

សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) បានបញ្ជាក់​ថ្មីៗ​ថា​នឹង​រៀបចំ​កម្មវិធី​ប្រកួត​បាល់ទាត់​មិត្តភាព​អន្តរជាតិ​មួយ​រវាង​ក្រុម Cambodia All Stars ជាមួយ​ក្រុមបាល់ទាត់ Muangthong United សមាជិក​ក្នុង​ពានរង្វាន់​លី​គ​កំពូល​ប្រទេស​ថៃ ខណៈ​ក្រុម​ទាំង​២​ធ្លាប់បាន​ជួបគ្នា​២​លើក​ហើយ​កាលពី​ឆ្នាំ​២០១៧ កន្លងទៅ​។



ក្រុម Cambodia All Stars លើក​នេះ​ដឹកនាំ​ដោយ​លោក ភា សុភ​ត្រា គ្រូបង្វឹក​របស់​ក្រុម​ក្រសួងការពារជាតិ ខណៈ​ថ្នាក់ដឹកនាំ​ក្រុម​ផ្សេងទៀត​មាន​លោក ឈូក ពិសិដ្ឋ តែងតាំង​ជា​អ្នកចាត់ការ​ទូទៅ លោក អ៊ុំ សាវង្ស គ្រូ​ជំនួយ លោក ហោ សុខ​ហេង គ្រូ​ជំនួយ លោក យឿ​ម សារ៉ាន់ គ្រូ​ជំនួយ លោក ស៊ឹម ម៉េង​ហៃ គ្រប់គ្រង​សម្ភារៈ និង​លោក នី លក្ខណា គ្រប់គ្រង​សម្ភារៈ​។



ក្រុម Cambodia All Stars លើក​នេះ​ត្រូវបាន​លោក ភា សុភ​ត្រា ជ្រើសរើស​កីឡាករ​ដាក់​បញ្ជី​បញ្ជូន​ទៅកាន់​សហព័ន្ធ​កីឡាបាល់ទាត់​កម្ពុជា រួចមក​ហើយដោយ​ក្នុងនោះ​រង់ចាំ​តែ​ថ្ងៃ​ប្រកាស​ផ្លូវការ​តែប៉ុណ្ណោះ​។ ចំណែក​គម្រោង​នៃ​ថ្ងៃ​ប្រមូល​ផ្តុំ​គឺ​នឹង​ចាប់ផ្តើម​ពីថ្ងៃ​ទី​៤ ខែវិច្ឆិកា ឆ្នាំ​២០១៩ តទៅ ខណៈ​ក្រុម​នេះ​ត្រៀម​ប្រកួត​មិត្តភាព​កម្តៅ​សាច់ដុំ ជាមួយ​ក្រុម African All Stars (​បណ្តុំ​កីឡាករ​មកពី​ទ្វីបអាហ្វ្រិក​ដែល​ប្រកប​អាជីព​បាល់ទាត់​នៅ​កម្ពុជា​)​នៅ​ថ្ងៃទី​៦ ខែកុម្ភៈ ឆ្នាំ​២០១៩ ខាងមុខ​។



​ក្រុម Cambodia All Stars គឺជា​ការ​ប្រមូលផ្ដុំ​កីឡាករ​ល្អៗ​នៅក្នុង​លី​គ​កំពូល​កម្ពុជា ទាំង​កីឡាករ​ខ្មែរ​និង​បរទេស ខណៈ​ក្រុម​នេះ​ធ្លាប់បាន​ប្រកួត​មិត្តភាព​៥​លើក​រួច​មក​ហើយ​។ លោក ប្រាក់ សុវណ្ណារ៉ា និង លោក ទេព ឡុង​រចនា ក៏​ធ្លាប់​មាន​បទពិសោធន៍​ដឹកនាំ​ក្រុម​មួយ​នេះដែរ​ខណៈ​ចុងក្រោយ​លោក Leonardo Vitorino គឺជា​គ្រូបង្វឹក​ម្តង​។ ក្រុម Cambodia All Stars ត្រូវបាន​សហព័ន្ធ​កីឡាបាល់ទាត់​កម្ពុជា បង្កើតឡើង​នៅ​ចុងឆ្នាំ​២០១៥ មកម្ល៉េះ​។

សម្រាប់​លើក​នេះ​លោក ភា សុភ​ត្រា ជ្រើសរើស​ប្រធាន​ក្រុម​ចំនួន​២​នាក់ សម្រាប់​ដឹកនាំ​ក្រុម​លើ​ទីលាន គឺមាន​កីឡាករ​ក្លឹប​ព្រះខ័ន​រាជ​ស្វាយរៀង សឿ​យ វិសាល និង​កីឡាករ​ក្លឹប​ណាហ្គា​វើ​ល គួច សុ​កុម្ភៈ​។ ហេតុផល​ដែល​លោក​សម្រេចចិត្ត​រើស​ប្រធាន​ក្រុម​ដល់​ទៅ​២​នោះ​គឺ «​ឥឡូវនេះ​សម្រាប់​ប្រធាន​ក្រុម​គឺ​មាន ២​នាក់ ដោយសារ​ការរៀបចំ និង​របៀប​នៃ​ការ​លេង យើង​មានការ​ផ្លាស់ប្ដូរ​ដោយ​សេរី​។ អញ្ចឹង​ខ្ញុំ​ប្រហែលជា​ចែកជា ២​ក្រុម ដោយមាន​ប្រធាន​ក្រុមទី​១ និង​ប្រធាន​ក្រុមទី​២ ក្នុងនោះ​មាន សឿ​យ វិសាល និង គួច សុ​កុម្ភៈ ហើយ ខ្ញុំ​នឹងធ្វើ​ការរៀបចំ ការប្រកួត​វគ្គ​ទី​១ និង​វគ្គ​ទី​២ អ្នកជា​ប្រធាន​ក្រុម​»​។ លោក​ថា ការជ្រើសរើស​ពួកគេ ព្រោះ​អ្នក​ទាំងពីរ មានបទពិសោធន៍​ច្រើន និង​មាន​ភាពជា​គំរូ​ដ៏​ល្អ សម្រាប់​យុវជន​ជំនាន់​ក្រោយ​។



តាម​គម្រោង​ក្រុម Muangthong United របស់​ថៃ​នឹង​ប្រកួត​ជាមួយ​ក្រុម Cambodia All Stars នៅ​ថ្ងៃទី​៩ ខែកុម្ភៈ ឆ្នាំ​២០១៩ ខាងមុខ​។ គោលដៅ​នៃ​ការប្រកួត​រវាង​ក្រុម Muangthong United និង​ក្រុម Cambodia All Stars កាលពី​លើក​ទី​១​គឺ​ដើម្បី​ដកស្រង់​បទពិសោធន៍ រវាង​ក្រុម​ទាំង​២​ក៏ដូចជា​រឹត​ចំណងមិត្តភាព​រវាង​ប្រទេស​ទាំង ជាពិសេស​គឺ​ដើម្បី​ប្រមូល​ថវិកា​សម្រាប់​សកម្មភាព​ពង្រឹងសមត្ថភាព​កីឡាករ​បាល់ទាត់​វ័យក្មេង​កម្ពុជា​នៅ​ទូទាំង ២៥​រាជធានី​-​ខេត្ត​នានា​ក្នុង​ព្រះរាជាណាចក្រ​កម្ពុជា ក្នុងការ​ត្រៀមខ្លួន​ឆ្ពោះទៅកាន់​ការប្រកួត​ស៊ី​ហ្គេម​ឆ្នាំ​២០២៣ ដែល​កម្ពុជា​គ្រោង​ធ្វើ​ម្ចាស់ផ្ទះ​៕

Source: Kampuchea Thmey Daily