កំពង់ឆ្នាំង ៖ សព្វថ្ងៃនេះ នៅតាមបណ្តោយផ្លូវជាតិលេខ៥ ក្នុងខេត្តកំពង់ឆ្នាំង គេឃើញមានការដាក់លក់ផើងផ្កា ដែលជាការរកឃើញថ្មី ដោយគេបានប្រើកន្សែងពោះគោ និងកំណាត់ភួយ រួមនឹងស៊ីម៉ងត៍ ផលិតបានជាផើងផ្កាយ៉ាងស្រស់ស្អាត ដាក់តាំងលក់ហូរហែ។
អ្នកប្រកបមុខរបរនេះបានឲ្យដឹងថា ពួកគាត់កំពុងតែមោទនភាព នឹងផលិតផលដែលបានរកឃើញថ្មីនេះ ព្រោះលក់ដាច់ តែបានច្រើន។
លោក ស៊ឹម ប្រុស អាយុ៤២ឆ្នាំ រស់នៅក្នុងភូមិអណ្តូងជ្រៃ ឃុំអណ្ដូងស្នាយ ស្រុករលាប្អៀរ ជាអ្នកផលិតផើងផ្កា នៅព្រឹកថ្ងៃទី១៨ ខែកុម្ភៈ ឆ្នាំ២០១៩នេះ បាននិយាយឲ្យដឹងថា ការធ្វើផើងផ្កា ដែលបា នឃើញតាមបណ្តាញសង្គម ហ្វេសប៊ុក ដែលគេយកកន្សែងពោះគោ ឬ យកកំណាត់ភួយ មកជ្រលក់នឹងស៊ីម៉ងត៍ ធ្វើផើងផ្កា នោះគឺគ្រាន់តែធ្វើជាលក្ខណៈគ្រួសារទេ ការផលិតបែបនោះមិនមានគុណភាពឡើយ អាចនឹងបែកដាច់ចេញពីគ្នា។
ចំណែកគាត់ចេះផលិតផើងផ្កាតាមបែបថ្មីនេះពីប្រទេសម៉ាឡេស៊ី ខណៈដែលគាត់បានទៅធ្វើជាកម្មករសំណង់នៅទីនោះ ត្រូវបានមេជាងបង្ហាត់ឲ្យគាត់ចេះអំពីរបៀបធ្វើផើង ផ្កាតាមបែបសម័យមួយនេះ ចំពោះការធ្វើដោយកន្សែងពោះគោ គឺមិនមានគុណភាពទេ ដោយសារតែទឹកស៊ីម៉ងត៍ វាកាត់អំបោះ ឲ្យពុកផុយ គឺពេលបែក វានឹងដាច់ចេញពីគ្នា។
ចំណែកការធ្វើរបស់គាត់ គឺយកវត្ថុធាតុម្យ៉ាង ដែលមិនងាយដាច់ចេញពីគ្នាឡើយ បើធ្លាក់វាគ្រាន់តែស្រាំប៉ុណ្ណោះ គឺត្រូវយកក្រណាត់ស្វិត មកធ្វើ ទើបមានគុណភាព។ សព្វថ្ងៃ គាត់ធ្វើយឺតបន្តិចមែន ប៉ុន្តែគុណភាពផើងផ្ការបស់គាត់រឹងមាំល្អ និងមានអ្នកមកទិញជាច្រើន។ ដោយឡែក បច្ចុប្បន្ននេះគាត់កំពុងតែផលិតនូវផើងផ្កាមួយបែបទៀត ជា របៀបកំណាត់គល់ឈើ ដែលមានភាពស្រស់ស្អាតនិងទាក់ទាញជាងមុន។
ចំណែកអ្នកលក់ផើងផ្កា ស្ត្រី ឈ្មោះ ពេជ សុភាស់ នៅភូមិត្រពាំងអញ្ចាញ ឃុំស្វាយជ្រំ ស្រុករលាប្អៀរ វិញបាននិយាយឲ្យដឹងផងដែរថា បច្ចុប្បន្ននេះ គាត់ក៏ដូចជាអ្នកលក់ផើងលក់ផ្កាតាមបែបសម័យថ្មីនេះ គឺដាច់ច្រើន ព្រោះតែអតិថិជនមានចំណូលចិត្ត។
សូមបញ្ជាក់ថា នៅតាមបណ្តោយផ្លូវជាតិលេខក្នុងខេត្តកំពង់ឆ្នាំង ចាប់ពីស្រុករលាប្អៀរ ផ្នែកខាងត្បូង ដល់ស្រុករលាប្អៀរផ្នែកខាងជើង កន្លែងដែលមានលក់វត្ថុអនុស្សាវរីយ៍ សុទ្ធតែមានតាំងលក់ផើងផ្កាសម័យថ្មីនេះ ហើយផើងផ្កានេះមានអតិថិជនទិញជាច្រើន សម្រាប់យកទៅដាំផ្កាលំអតាមគេហដ្ឋានរបស់ពួកគាត់ ព្រោះផើងផ្កានេះមានក្បាច់ប្លែក និងមានពណ៌ចម្រុះយ៉ាងស្រស់ស្អាត៕
Source: Kampuchea Thmey Daily
0 Comments