បាត់ដំបង ៖ ប្រភពពីប្រជាពលរដ្ឋ និងមតិមហាជន រួមនឹងក្រុមឈ្មួញមួយចំនួនផងនោះ បានបង្ហើបប្រាប់កម្ពុជាថ្មីឲ្យដឹងថា ច្រករបៀង នៅតាមបន្ទាត់ព្រំដែន គឺក្នុងស្រុកកំរៀង,ភ្នំព្រឹក, និងសំពៅលូនជារៀងរាល់យប់ និងថ្ងៃ ក្រុមឈ្មួញធំៗមួយចំនួន តែងតែដឹករាល់ទំនិញ និងប្រេងសាំងគេចពន្ធ ជាពិសេសតាមច្រកអន្តរជាតិដូង ក្នុងស្រុកកំរៀង ដោយមានការឃុបឃិតពី លោក ឡេង សុខ មេគយច្រកទ្វាអន្តរជាតិដូង ដើម្បីផលប្រយោជន៍ខ្លួន ធ្វើឲ្យបាត់បង់ចំណូលថវិការបស់រដ្ឋ យ៉ាងសន្ធឹកសន្ធាប់ក្នុង១ឆ្នាំៗ។
ប្រភពបានត្អូញត្អែរជាមួយការរិះគន់ចំៗថា ចាប់តាំងពី លោក យូ ហេង មកកាន់តំណែងជាប្រធានសាខាគយខេត្តបាត់ដំបង កាលពីរសៀលថ្ងៃទី២៣ ខែមករា ឆ្នាំ២០១៩ មក កាន់តែបណ្តោយឲ្យលោក ឡេង សុខ មេគយច្រកទ្វាអន្តរជាតិដូង ប្រព្រឹត្តអំពើកេងប្រវ័ញ្ចថវិការដ្ឋ តាមរយៈការឲ្យក្រុមឈ្មួញ នាំទំនិញគេចពន្ធកាន់តែលើសដើម គឺមិនបានចាត់វិធានការទប់ស្កាត់អំពើពុករលួយរបស់លោក ឡេង សុខ ដែលជាមេគយច្រកទ្វារអន្តរជាតិដូងនៅឡើយទេ។
ប្រភពបន្តដោយដាក់ការសង្ស័យថា ប្រហែលជា លោក ឡេង សុខ មេគយច្រកទ្វារអន្តរជាតិដូងផ្តល់លាភសក្ការៈដល់ លោក យូ ហេង មេគយសាខាខេត្តដែលទើបមកកាន់តំណែងថ្មីខ្លះហើយមើលទៅ ទើបនៅតែបន្តឲ្យ លោក ឡេង សុខ ប្រើតួនាទី និងអំណាចរបស់ខ្លួន ឃុបឃិតឲ្យឈ្មួញធំៗមួយចំនួន នាំចូលទំនិញ និងប្រេងសាំងគេចពន្ធ ឬបង់ពន្ធមិនគ្រប់បែបនេះ។
បើយោងតាមប្រភព១ផ្សេងទៀតបានបង្ហើបដែរថា លោក យូ ហេង ប្រធានសាខាគយខេត្តបាត់ដំបងថ្មីរូបនេះ ត្រូវបានមតិមហាជនរិះគន់ចំៗថា លោក មានជំនាញខាងប្រព្រឹត្តអំពើពុករលួយយ៉ាងពេញបន្ទុក កាលពីនៅធ្វើជាប្រធានសាខាគយខេត្តឧត្ដរមានជ័យ នាពេលកន្លងមក។
ដោយឡែក ប្រភពពីមន្ត្រីគយ និងភ្នាក់ងារគយខេត្តបាត់ដំបងមួយចំនួនផ្សេងទៀត ក៏បានខ្សឹបឲ្យអ្នកសារព័ត៌មានយើងដឹងផងដែរថា កាលពីជំនាន់ លោក ឈុណ សុភមង្គល នៅធ្វើជាប្រធានសាខាគយខេត្តបាត់ដំបង បានបើកដៃ និងឃុបឃិតឲ្យ លោក ឡេង សុខ ដែលជាមេគយច្រកទ្វារអន្តរជាតិដូង ក្នុងស្រុកកំរៀង ឃុបឃិតឲ្យឈ្មួញនាំចូលទំនិញគេចពន្ធ និងទំនិញបង់ពន្ធមិនគ្រប់ រួមនឹងទំនិញខុសច្បាប់យ៉ាងច្រើនផ្សេងទៀត។
ប្រភពដែលជាមន្ត្រីតូចតាចដដែលសង្ឃឹមថា លោក យូ ហេង ជាមេគយខេត្តថ្មីនេះ នឹងទប់ស្កាត់អំពើពុករលួយរបស់ លោក ឡេង សុខ ឥឡូវនេះ មិនត្រឹមតែមិនទប់ស្កាត់នោះទេ កាន់តែបន្ថែមល្បឿន នៃអំពើពុករលួយកាន់តែខ្លាំងឡើង ដែលធ្វើឲ្យមន្ត្រីតូចតាចអាក់អន់ចិត្តទៅវិញ។
ប្រភពបានបន្តថា បញ្ហានេះ គឺជារឿងដែល លោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជា លោក គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា មិនគួរបណ្ដែតបណ្ដោយតទៅទៀតទេ ព្រោះទង្វើរបស់ លោក យូ ហេង ដែលជាមេគយសាខាខេត្តបាត់ដំបង ទើបកាន់ដំណែងថ្មីនេះ ធ្វើឲ្យរដ្ឋខាតបង់ចំណូលថវិការដ្ឋយ៉ាងច្រើនក្នុងមួយខែៗ។
ប្រភពពីមន្ត្រីគយតូចតាចនៅខេត្តបាត់ដំបងដដែលបានបញ្ជាក់ទៀតថា លោក ឡេង សុខ ជាមន្ត្រីដុះស្លែ បម្រើការងារនៅច្រកទ្វារអន្តរជាតិដូងមិនតិចជាង២០ឆ្នាំនោះទេ ព្រោះ លោក ឡេង សុខ ចេះលុតក្រាបជាមួយប្រធានសាខាគយខេត្តបាត់ដំបងគ្រប់ជំនាន់ ដើម្បីឲ្យមានឱកាសប្រព្រឹត្តអំពើពុករលួយយ៉ាងក្រអឺតក្រទម គ្មានអ្នកទប់ស្កាត់បាន។
ប្រភពពីមន្ត្រីដដែលបានបន្តថា កាលជំនាន់ លោក ឈុណ សុភមង្គល ធ្វើជាប្រធានសាខាគយខេត្តបាត់ដំបង គឺ លោក ឡេង សុខ ល្បីល្បាញខាងប្រព្រឹត្តអំពើពុករលួយតាមច្រើនរូបភាព ហើយនៅពេលដែល លោក យូ ហេង មកធ្វើជាប្រធានសាខាគយខេត្តបាត់ដំបង កាលពីថ្ងៃទី២៣ ខែមករា ឆ្នាំ២០១៩ គឺ លោក ឡេង សុខ នៅតែល្បីល្បាញខាងពុករលួយដដែល ចង់លើសដើមផង។
ពាក់ព័ន្ធនឹងរឿងរ៉ាវខាងលើនេះ កម្ពុជាថ្មី មិនអាចសុំការបកស្រាយពីមន្ត្រីគយទាំងពីររូបបានថាយ៉ាងណានោះទេ នៅថ្ងៃទី១៨កុម្ភៈនេះ ពាក់ព័ន្ធនឹងការចោទប្រកាន់ពីរាល់ប្រភពខាងលើ ដោយស្វែងរកប្រភពសម្រាប់ទំនាក់ទំនងគ្មាន។
បើទោះបីបែបណា គ្រប់ប្រភពបានសំណូមពរ និងអំពាវនាវឲ្យ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ចាត់វិធានការស៊ើបអង្កេតលើរឿងអាស្រូវពុករលួយរបស់លោក ឡេងហេង មេគយច្រកទ្វារអន្តរជាតិដូង ស្រុកកំរៀង ខេត្តបាត់ដំបងជាបន្ទាន់ផង ព្រោះបច្ចុប្បន្ន លោកឡេង សុខ នៅតែបន្តសកម្មភាពឃុបឃិតឲ្យឈ្មួញនាំចូលទំនិញគេចពន្ធទំនិញខុសច្បាប់ និងទំនិញបង់ពន្ធមិនគ្រប់យ៉ាងពេញបន្ទុក ធ្វើឲ្យរដ្ឋកាន់តែបាត់បង់ចំណូលយ៉ាងច្រើនក្នុង១ឆ្នាំៗ។
គួរបញ្ជាក់ថា ក្នុងរឿងរ៉ាវខាងលើនេះ កម្ពុជាថ្មី នឹងបន្តស្វែងរកប្រភពសាមី ដើម្បីសុំការបកស្រាយពីលោកមន្ត្រីគយទាំងពីរ ដែលរាល់ប្រភពបានចោទប្រកាន់ពាក់ព័ន្ធនឹងប្រព្រឹត្តអំពើពុករលួយ ប្រសិនជាសាមីខ្លួនមិនមានការពាក់ព័ន្ធដូចការចោទប្រកាន់របស់រាល់ប្រភពនោះទេ សាមីខ្លួនអាចសំណូមពរដល់ការិយាល័យកម្ពុជាថ្មី ស្រាយបំភ្លឺជូនលោកទាំងពីរវិញ តាមអ្វីដែលកម្ពុជាថ្មីទទួលបាន៕
Source: Kampuchea Thmey Daily
0 Comments