ព្រៃវែង ៖ នៅព្រឹកថ្ងៃ១៨ ខែកុម្ភៈ ឆ្នាំ២០១៩ លោក ជុំ សុភី ប្រធានមន្ទីរធនធានទឹក និងឧតុនិយមខេត្តព្រៃវែង បាននាំម៉ាស៊ីនបូមទឹក៦៥សេះ ចំនួន២គ្រឿង ដើម្បីបូមទឹកសង្គ្រោះស្រូវចំនួន៣២០ហិតា នៅឃុំមេសរប្រចាន់ ស្រុកពារាំង ដោយបូមពីទន្លេតូច បញ្ចូលបឹងទ្រាំង ដើម្បីឲ្យកសិករបូមបន្តបញ្ចូលស្រែ។
លោក គឹម ហេង មេឃុំមេសប្រចាន់ លោក ឈិត ឈឿន មេភូមិមេសប្រចាន់ លោក ចែម រឹម មេភូមិមេសប្រចាន់លើ បានសំណូមពរដល់មន្ទីរធនធានទឹក និងឧតុនិយមខេត្ត ស្នើសុំម៉ាស៊ីនបូមទឹកជួយសង្គ្រោះស្រូវប្រជាពលរដ្ឋនៅឃុំមេសប្រចាន់ ដែលកំពុងជួបគ្រោះរាំងស្ងួត។
បន្ទាប់ពីបានទទួលសំណើរបស់លោកមេឃុំរួចមក លោក ជុំ សុភី បានមានប្រសាសន៍ថា លោកបានចុះអន្តរាគមន៍ជាបន្ទាន់ ដោយបាននាំយកម៉ាស៊ីនបូមទឹកចាប់បូមថ្ងៃទី១៧ ខែកុម្ភៈ ឆ្នាំ២០១៩ ដោយ ការបូមនេះត្រូវបន្តរយៈពេល ជិត២ខែ ទើបកសិករអាចប្រមូលផលបាន។
លោកបានណែនាំដល់បងប្អូនប្រជាកសិករទាំងអស់ បន្ទាប់ពីប្រមូលផលរួច ត្រូវផ្អាកធ្វើស្រែមួយរយៈសិន ដោយផ្អែកលើការព្យាករឧតុនិយមបានបង្ហាញថា ចាប់ពីខែមេសា ដល់ខែឧសភា នៅឆ្នាំនេះ នឹងជួបការកង្វះទឹក ដូច្នេះត្រូវរង់ចាំរដូវវស្សាដែលមានភ្លៀងធ្លាក់គ្រប់គ្រាន់ទើបចាប់ផ្ដើមបង្កបង្កើនផលឡើងវិញ៕
Source: Kampuchea Thmey Daily
0 Comments