ស្នងការនគរបាលខេត្តកំពង់ស្ពឺ ត្រៀមលក្ខណៈ ដើម្បីជួយអន្តរាគមន៍សង្គ្រោះលើករណីគ្រោះអគ្គិភ័យ ជូនដល់បងប្អូនប្រជាពលរដ្ឋ អាជីវករ អ្នកវិនិយោគទុនគ្រប់ពេលវេលា

កំពង់ស្ពឺ ៖ កងកម្លាំងនគរបាលជំនាញផ្នែកបង្ការសង្គ្រោះ និងពន្លត់អគ្គិភ័យ នៃស្នងការដ្ឋាននគរបាលខេត្តកំពង់ស្ពឺ បានត្រៀមលក្ខណៈរួចជាស្រេច (២៤ម៉ោងលើ២៤ម៉ោង) ដើម្បីអន្តរាគមន៍បាញ់ទឹកពន្លត់គ្រោះអគ្គិភ័យនានាដែលកើតឡើងជាយថាហេតុក្នុងខេត្តកំពង់ស្ពឺ និងខេត្ត ដែលមានព្រំប្រទល់ជាប់គ្នាផងដែរ នារដូវប្រាំងឆ្នាំនេះ។

ការប្ដេជ្ញាថា នឹងសង្គ្រោះពលរដ្ឋ អាជីវករ អ្នកវិនិយោគទុនតាមរោងចក្រ សហគ្រាសរបស់ស្នងការនគរបាលខេត្តកំពង់ស្ពឺនេះ គឺជាការរួមចំណែកក្នុងកិច្ចការសង្គម អនុវត្តតាមតួនាទី ភារកិច្ច ប្រតិបត្តិការ ត្រៀម២៤/២៤ម៉ោង ដើម្បីជួយអន្តរាគមន៍សង្គ្រោះលើករណីគ្រោះអគ្គិភ័យជូនដល់បងប្អូនប្រជាពលរដ្ឋ គ្រប់ស្រទាប់វណ្ណៈដោយមិនប្រកាន់និន្នាការ ពូជសាសន៍ឡើយ។

លោកឧត្ដមសេនីយ៍ត្រី អ៊ុម ប៊ុនធឿន ស្នងការរងទទួលផែនបង្ការ ពន្លត់អគ្គិភ័យ នៃស្នងការនគរបាលខេត្តកំពង់ស្ពឺ បានលើកឡើងថា «កន្លងមកយើងធ្លាប់ឮតែពាក្យចចាមអារ៉ាមថា រថយន្តពន្លត់អគ្គិភ័យតែងតែយឺតយ៉ាវ អស់ទឹក គ្មានប្រេង បាញ់តែផ្ទះអត់ឆេះ(ផ្ទះអ្នកមានលុយ) ប៉ុន្តែសម្រាប់ខេត្តកំពង់ស្ពឺ ពាក្យនេះដូចជាមិនត្រូវបានឮតាមខ្យល់តាមទឹកនោះទេ»។

លោកស្នងការរង បានបន្ថែមថា «ដោយមានការយកចិត្តទុកដាក់ខ្ពស់ និងការគោរពវិន័យ គោរពតាមបទបញ្ជា ក្រមសីលធម៌ សុជីវធម៌ ធ្វើឲ្យវប្បធម៌ នៃការបែងចែករើសអើងរលាយសាបសូន្យមិនមានជីវិតរស់នៅលើទឹកដីខេត្តកំពង់ស្ពឺឡើយ»។

លោកឧត្ដមសេនីយ៍ត្រី អ៊ុម ប៊ុនធឿន ស្នងការរងទទួលផែនបង្ការ ពន្លត់អគ្គិភ័យ បានលើកឡើងទៀតថា «ជាការសំណូមពរក្នុងរដូវប្រាំងឆ្នាំនេះ សូមបងប្អូនប្រជាពលរដ្ឋ លោក លោកស្រី ជានាយកក្រុមហ៊ុន សិប្បកម្ម អាជីវកម្ម សហគ្រាស រោងចក្រ ទីតាំងស្ថានីយប្រេងឥន្ធនៈ ហ្គាស៍ ទីតាំងងាយរងគ្រោះបញ្ហាអគ្គិភ័យ ត្រូវមានការប្រុងប្រយ័ត្នខ្ពស់លើវិធានការបង្ការ សង្គ្រោះបឋម ដូចជាត្រៀមបំពង់ឧបករណ៍សម្រាប់ពន្លត់អគ្គិភ័យ ត្រៀមរថយន្តអគ្គិភ័យផ្ទាល់ខ្លួន (បើមាន) ប៉ុន្តែមិនត្រូវមានការបារម្ភនោះពេកទេ»។

លោកស្នងការរងបញ្ជាក់ថា កម្លាំងនគរបាលជំនាញផ្នែកបង្ការ ពន្លត់អគ្គិភ័យ បានត្រៀមមធ្យោបាយសង្គ្រោះគ្រប់គ្រាន់ដើម្បីត្រៀមចាំជួយអន្តរាគមន៍ក្នុងករណីកើតមានគ្រោះអគ្គិភ័យ ដែលកើតមានជាយថាហេតុ ២៤ម៉ោង លើ២៤ម៉ោង ប៉ុន្តែមិនអាចយកទៅត្រៀមចាំនៅទីតាំងផ្ទះរបស់ លោក លោកស្រី ឧកញ៉ា ណាមួយនោះបានទេ។

លោកឧត្ដមសេនីយ៍ត្រី បន្ថែមថា «ករណីបន្ទាន់ទំនាក់ទំនងតាមលេខទូរស័ព្ទទាន់ហេតុការណ៍របស់ស្នងការដ្ឋាននគរបាលខេត្តកំពង់ស្ពឺ 097 778 0018 និងលេខទូរស័ព្ទលោកស្នងការរង អគ្គិភ័យ 098 889 228។

សូមរម្លឹកថា កងកម្លាំងនគរបាលជាតិ មានតួនាទី ភារកិច្ចក្នុងការអនុវត្ត និងត្រៀមខ្លួនជានិច្ចក្នុងកិច្ចប្រតិបត្តិការជួយអន្តរាគមន៍ និងសង្គ្រោះករណីផ្សេងៗ រួមទាំងគ្រោះអគ្គិភ័យដែលកើតឡើងជាយថាហេតុ។

បច្ចុប្បន្ន កម្លាំងនគរបាលជំនាញ បង្ការ ពន្លត់អគ្គិភ័យ នៃស្នងការដ្ឋាន នគរបាលខេត្តកំពង់ស្ពឺ បានធ្វើការហ្វឹកហាត់ ត្រៀមលក្ខណៈសម្បត្តិគ្រប់គ្រាន់លើកិច្ចការជំនាញរបស់ខ្លួន និងបានម្ចាស់ការជួយសង្គ្រោះអន្តរាគមន៍ភ្លាមៗក្នុងករណីចាំបាច់ និងមានការស្នើសុំឲ្យជួយអន្តរាគមន៍តាមស្ថានភាពជាក់ស្ដែង។

សូមបញ្ជាក់ថា កន្លងទៅហេតុការណ៍គ្រោះអគ្គិភ័យកើតនៅតាមបណ្ដាក្រុង ស្រុកក្នុងភូមិសាស្ត្រខេត្តកំពង់ស្ពឺ ត្រូវបានជួយធ្វើអន្តរាគមន៍ភ្លាមៗ ដូចជាករណី ឆេះផ្ទះនៅស្រុកគងពិសី ករណីឆេះរថយន្តដឹកប្រេង នៅស្ថានីយប្រេងឥន្ធនៈ សូគីមិច ក្រុងច្បារមន ឆេះកម្ទេចក្រណាត់នៅក្បែររោងចក្រ ករណីឆេះស្មៅ នៅក្បែរបងរោងចក្រ ករណីឆេះរថយន្តឆ្លងចរន្តអគ្គិសនីនៅតាមផ្លូវជាតិ ករណីឆេះឡសម្ងួតស្រូវនៅស្រុកឧដុង្គ មិនតែប៉ុណ្ណោះ កងកម្លាំងរថយន្តពន្លត់អគ្គិភ័យបានចេញជួយការងារលាងសម្អាតតាមដងផ្លូវសាធារណៈ តាមការស្នើសុំឲ្យដោយមិនប្រកាន់លើកិច្ចការ និន្នាការ ពណ៌សម្បុរជាតិសាសន៍ ឬការរើសអើងឋានៈ អ្នកក្រអ្នកមានទីតាំងឆ្ងាយជិតនោះទេ៕