ព្រះសីហនុ ៖ រថយន្តប៉ែនកង់១០មួយគ្រឿង ត្រូវអ្នកបើកបរ បើកទៅបុកចំក្បាលរថភ្លើង ជាហេតុបណ្ដាលឲ្យក្បាលរថភ្លើង ដែលកំពុងតែរត់ក្នុងល្បឿនលឿនផងនោះ បានរអិលធ្លាក់ពីលើផ្លូវដែកបត់ក្បាលមកចំហៀង ដោយឡែករថយន្តបែនក៏បានជ្រុលធ្លាក់ផ្លូវទៅមុខលែងរួចដែរ។ អ្នកបើកបររថយន្តបែន បន្ទាប់ពីបានបង្កហេតុហើយនោះ បានរត់គេចខ្លួនបាត់។ ករណីគ្រោះថ្នាក់ចរាចរណ៍រថយន្តបុករថភ្លើងនេះ មិនមានអ្នករងរបួសនោះទេ។
ហេតុការណ៍នេះ បានកើតមានឡើងនៅម៉ោង១០និង១៥នាទី ថ្ងៃទី១១ ខែកុម្ភៈ ឆ្នាំ២០១៩ លើផ្លូវដែក ត្រង់ចំណុចផ្លូវលំ ស្ថិតក្នុងភូមិព្រែកទាល់ ឃុំទឹកថ្លា ស្រុកព្រៃនប់ ខេត្តព្រះសីហនុ។ នៅកន្លែងកើតហេតុនេះដែរ គេមិនឃើញមាន ដាក់ប៉ារ៉ាស់បិទបើកផ្លូវនៅចំណុចរថភ្លើងបើកឆ្លងកាត់នោះទេ។
សមត្ថកិច្ចបានឲ្យដឹងថា រថយន្តបែនដឹកដីនេះ ម៉ាក HYUNDAI ពណ៌ ទឹកប្រាក់ គ្មានស្លាកលេខ អ្នកបើកបរ មិនស្គាល់អត្តសញ្ញាណមានទិសដៅពីលិចឆ្ពោះទៅកើត លុះដល់ចំណុចកើតហេតុមិនដឹងជាតៃកុងរថយន្តមិនប្រយ័ត្ន ឬមួយជាន់ហ្វ្រាំងមិនស៊ីនោះទេ បានជាទៅបុកនឹង រថភ្លើងដែលកំពុងរត់លើផ្លូវដែកមានទិសដៅពីខេត្តព្រះសីហនុ ឆ្ពោះទៅភ្នំពេញ បណ្ដាលឲ្យធ្លាក់ក្បាលរថភ្លើងចេញពីលើផ្លូវដែក។
សមត្ថកិច្ចបានឲ្យដឹងថា ក្រោយកើតហេតុ វត្ថុតាងរថយន្តបង្កហេតុបានយកមករក្សាទុកនៅអធិការដ្ឋាននគរបាលស្រុកព្រៃនប់។ ដោយឡែករថភ្លើង ក្រុមជាងកំពុងធ្វើការជួសជុលនៅកន្លែងកើតហេតុ។
សូមបញ្ជាក់ផងដែរថា តំបន់ ដែលមានបញ្ហាគ្រោះថ្នាក់ ចរាចរណ៍នេះ កន្លងមក តែងតែកើតមានគ្រោះថ្នាក់ចរាចរណ៍ញឹកញាប់ផងដែរ រវាងរថយន្តបុករថភ្លើង ឬរថភ្លើងបុករថយន្ត រថភ្លើងបុកសត្វពាហនៈរបស់អ្នកភូមិ ព្រោះថាចំណុចកើតហេតុនេះ អាជ្ញាធរ មិនមានដាក់ប៉ារ៉ាស់បិទបើក ពេលរថភ្លើងមកដល់ទេ(ព្រោះផ្លូវរថភ្លើងឆ្លងកាត់ លើផ្លូវលំ)។
សមត្ថកិច្ចបានឲ្យដឹងដែរថា ក្នុងភូមិសាស្ត្រស្រុកព្រៃនប់ ទីតាំង ដែលរថភ្លើងបើកឆ្លងកាត់មាន ប៉ារ៉ាស់ បិទមានចំនួន២កន្លែង ១.នៅចំណុច ឆ្លងកាត់ផ្លូវជាតិលេខ៤ ត្រង់ចំណុចព្រំប្រទល់ភូមិសំរុងលើឃុំសំរុង និង ភូមិបឹងវែងឃុំវាលរេញ។ ២ . ឆ្លងកាត់ផ្លូវជាតិលេខ៣ ត្រង់ចំណុចព្រំប្រទល់ភូមិទួលឃុំទឹកល្អក់ និង ភូមិកំពង់ចិនឃុំទឹកថ្លា៕
Source: Kampuchea Thmey Daily
0 Comments