ភ្នំពេញ ៖ ដើម្បីលើកសោភណភាពរាជធានីភ្នំពេញ ឲ្យកាន់តែមានភាពស្រស់បំព្រង សមជាទីក្រុងដែលជាបេះដូង នៃព្រះរាជាណាចក្រកម្ពុជា ឃើញថា រដ្ឋបាលរាជធានីភ្នំពេញ ពីមួយថ្ងៃទៅមួយថ្ងៃ ពីមួយខែ ទៅមួយខែ គឺបានយកចិត្តទុកដាក់ណាស់ ក្នុងការតុបតែងរាជធានីឲ្យមានការទាក់ទាញភ្ញៀវទេសចរជាតិ អន្តរជាតិ មកដើរលេងកម្សាន្តនៅក្នុងរាជធានីភ្នំពេញរបស់យើង។
ជាក់ស្តែងនៅពេលបច្ចុប្បន្ននេះ រាជធានីភ្នំពេញ បានបង្អួតរាងមិនចាញ់ទីក្រុងរបស់បណ្តាប្រទេសមួយចំនួននៅលើសាកលលោកឡើយ ដោយទីក្រុងភ្នំពេញបាននិងកំពុងកសាងអគារខ្ពស់ៗជាច្រើន ការអភិវឌ្ឍហេដ្ឋារចនាសម្ព័ន្ធដូចជា ការស្ថាបនាស្ពានអាកាសស្អេកស្កះ ដើម្បីកាត់បន្ថយការកកស្ទះចរាចរណ៍ជាដើម។
ក្រៅពីនេះ រាជធានីភ្នំពេញ នៅមានសួនច្បារ ដែលមានស្មៅ ផ្ការីកស្គុះស្គាយ ជាច្រើនកន្លែងថែមទៀត។ អ្វីដែលល្អ អ្វីដែលជាការគយគន់ ថ្មីមួយទៀតនោះ គឺរាជធានីភ្នំពេញរបស់យើងមានដើមផ្កាសាគូរ៉ា ជាច្រើនដើមថែមទៀត ដែលពេលនេះបានកំពុងចេញផ្កាបង្អួតរាងឲ្យអ្នកទេសចរណ៍បានឃើញ តាមបណ្ដោយដងទន្លេសាប។ អញ្ចឹងទេ បងប្អូនភ្ញៀវទេសចរកម្ពុជាទាំងឡាយ មិនចាំបាច់ទិញសំបុត្រទៅមើលនៅជប៉ុនទេ មើលត្រឹមស្រុកយើងបានហើយ កំពុងចេញផ្កាបង្អួតរាង គួរជាទីគយគន់ណាស់៕
Source: Kampuchea Thmey Daily
0 Comments