អង្គការសហប្រជាជាតិកាលពីថ្ងៃសុក្របានអំពាវនាវសុំជំនួយជាទឹកប្រាក់ចំនួន៩២០លានដុល្លារអាមេរិកសម្រាប់ជនជាតិរ៉ូហ៊ីងយ៉ាប្រហែលមួយលាននាក់ ដែលកំពុងជ្រកកោននៅប្រទេសបង់ក្លាដែសបន្ទាប់ពីការបង្ហូរឈាមនៅក្នុងប្រទេសមីយ៉ាន់ម៉ាដែលកាន់សាសនាព្រះពុទ្ធ។
មនុស្សប្រហែល៧៤០,០០០នាក់នៃជនជាតិភាគតិចមូស្លីមមួយនេះបានភៀសខ្លួនទៅប្រទេសបង់ក្លាដែសដោយសារតែការបង្ក្រាបរបស់យោធានៅខែសីហាឆ្នាំ២០១៧ដែលត្រូវបានថ្កោលទោសដោយអង្គការសហប្រជាជាតិថាជាការបោសសម្អាតជនជាតិភាគតិច។
ពួកគេបានចូលរួមជាមួយជនជាតិរ៉ូហ៊ីងយ៉ាចំនួន៣០០,០០០នាក់ផ្សេងទៀតដែលកំពុងរស់នៅរួចទៅហើយនៅក្នុងជំរំដែលមានមនុស្សច្រើនកកកុញក្នុងស្រុក Cox's Bazar បន្ទាប់ពីអំពើហិង្សាលើកមុន។
នៅក្នុងសេចក្តីថ្លែងការណ៍រួមមួយ ភ្នាក់ងារជនភៀសខ្លួនអង្គការសហប្រជាជាតិ (UNHCR) និងអង្គការអន្តោប្រវេសន៍អន្តរជាតិ (IOM) បាននិយាយថា ពួកគេកំពុងស្វែងរកការរៃអង្គាសប្រាក់ចំនួន៩២០លានដុល្លារអាមេរិកដើម្បីឆ្លើយតបទៅនឹងតម្រូវការដ៏ធំរបស់ជនភៀសខ្លួនជាង៩០០,០០០នាក់មកពីប្រទេសមីយ៉ាន់ម៉ានិងជាង៣៣០,០០០នាក់ដែលជាជនជាតិបង់ក្លាដែសងាយរងគ្រោះនៅក្នុងសហគមន៍។
ជំនួយនិងសេវាកម្មសំខាន់ៗដូចជាម្ហូបអាហារ ទឹក អនាម័យនិងទីជម្រកគឺតំណាងឲ្យជាងពាក់កណ្តាលនៃតម្រូវការថវិកាក្នុងឆ្នាំនេះ។
សេចក្តីថ្លែងការណ៍ដដែលបានបន្ថែមថា “ផ្នែកសំខាន់ៗផ្សេងទៀតនៃការអំពាវនាវនេះគឺរួមមានសុខភាព ការគ្រប់គ្រងទីតាំង សកម្មភាពការពារដូចជាការការពារកុមារនិងការដោះស្រាយអំពើហិង្សាផ្លូវភេទនិងយេនឌ័រ ការចាក់ថ្នាំបង្ការនិងអាហារូបត្ថម្ភ”។
នេះគឺជាការអំពាវនាវលើកទី៣សម្រាប់ជំនួយដែលបានចេញរួមគ្នាដោយ UNHCR, IOM និងប្រទេសបង់ក្លាដេស។ ពួកគេបាននិយាយថា ស្ថានភាពជនភៀសខ្លួនបានប្រសើរឡើងយ៉ាងខ្លាំងដោយសារតែប្រាក់ដែលបានរៃអង្គាសកាលពីដើម។
សេចក្តីថ្លែងការណ៍រួមរបស់អង្គការសហប្រជាជាតិបាននិយាយថា កង្វះអាហារូបត្ថម្ភធ្ងន់ធ្ងរបានធ្លាក់ចុះពីកម្រិតអាសន្ននៅចុងឆ្នាំ២០១៧ ការចាក់ថ្នាំបង្ការរោគបានកើនឡើងដល់៨៩ភាគរយហើយស្ត្រីដែលសម្រាលកូននៅក្នុងមណ្ឌលសុខភាពបានកើនឡើងពី២២ភាគរយដល់៤០ភាគរយ៕ AFP
Source: Kampuchea Thmey Daily
0 Comments