កណ្តាល ៖ នារីម្នាក់ បានស្លាប់យ៉ាងអាណោចអាធ័ម នៅក្នុងទឹកជាមួយនឹងម៉ូតូ និងម្នាក់ទៀតរងរបួសធ្ងន់សន្លប់ស្ដូកស្ដឹងនៅលើផ្លូវ ដោយសាររថយន្តស្លាកយីហោនាគឆ្លងខេត្ត ដែលបើកបរដោយជនប្រមឹកហោះបំបុកម៉ូតូ ក្នុងទិសដៅផ្ទុយគ្នា។
ករណីគ្រោះថ្នាក់ចរាចរណ៍នេះ បានកើតឡើងនៅព្រលប់ថ្ងៃទី១៥ ខែកុម្ភៈ ឆ្នាំ២០១៩ ឆ្នាំ២០១៩ វេលាម៉ោង៦និង៣០នាទី លើផ្លូវជាតិលេខ១ ចន្លោះគីឡូម៉ែត្រលេខ៤៤_៤៥ ត្រង់ចំណុចព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល។
នគរបាលចរាចរណ៍ស្រុកកៀនស្វាយបានឲ្យដឹងថា ជនរងគ្រោះជិះម៉ូតូម៉ាកHONDA DREAM ១២៥ ស៊េរី២០១៦ ពណ៌ខ្មៅ ពាក់ស្លាកលេខ ឧ.មានជ័យ 1B-3846បើកបរដោយ ឈ្មោះ វិរៈ សុម៉ានី ភេទស្រី អាយុ២៤ឆ្នាំ ជនជាតិខ្មែរ មានទីលំនៅ ភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្តាល(របួសធ្ងន់) អ្នករួមដំណើរ ឈ្មោះ ឃឹម សុឃីន ភេទស្រី អាយុ២៩ឆ្នាំ មានទីលំនៅភូមិអូរតាពុកលើ សង្កាត់ប៉ៃលិន សង្កាត់ប៉ៃលិន ក្រុងប៉ៃលិន(ស្លាប់)។
រថយន្តបង្កម៉ាកTOYOTA LEXUS 300 ពណ៌ស ពាក់ស្លាកលេខ ភ្នំពេញ 2AL-2506 ពាក់ស្លាកយីហោ(នាគឆ្លងខេត្ត) អ្នកបើកបរ ឈ្មោះ សាន តយ ភេទប្រុស អាយុ៣៦ឆ្នាំ មានទីលំនៅភូមិបឹងត្រយាប សង្កាត់/ខណ្ឌសែនសុខ រាជធានីភ្នំពេញ។
សាក្សីឃើញហេតុការណ៍បានប្រាប់ថា មុនពេលគ្រោះថ្នាក់ រថយន្ត(នាគឆ្លងខេត្ត) បង្កបើកបរ ក្នុងទិសដៅពីអ្នកលឿងទៅភ្នំពេញ មកដល់ចំណុចកើតហេតុខាងលើ បានបើកប្រជែងរថយន្ត០១គ្រឿងទៀតដែលបើកនៅពីមុខ។ ពេលកំពុងប្រជែង ស្រាប់តែជនរងគ្រោះជិះម៉ូតូក្នុងទិសដៅផ្ទុយគ្នាបើកបរប្រកាន់ស្តាំបានបើកបរមកដល់ ក៏ត្រូវអ្នកបើកបររថយន្តនាគឆ្លងខេត្ត បុកចំពីមុខពេញទំហឹងបណ្តាលឲ្យខ្ទាតម៉ូតូ និងអ្នកជិះពីក្រោយ ផ្លោងធ្លាក់ចូលទៅក្នុងព្រែកស្លាប់តែម្តង។ ចំណែកអ្នកបើកម៉ូតូរបួសធ្ងន់នៅលើផ្លូវជាតិ។
ចំពោះអ្នកបើកបររថយន្តមានសភាពស្រវឹងស្រាជោកជាំ ត្រូវប្រជាពលរដ្ឋចាប់ខ្លួនប្រគល់ឲ្យសមត្ថកិច្ច។ ក្រោយពីបង្កគ្រោះថ្នាក់ នគរបាលចរាចរណ៍ស្រុក បានចុះទៅកន្លែងកើតហេតុ ហើយទំនាក់ទំនងទៅក្រុមគ្រួសារឲ្យមកយកសពជនរងគ្រោះទៅធ្វើបុណ្យ ចំណែករថយន្តបង្ក និងតៃកុងរួមនឹងម៉ូតូជនរងគ្រោះ យកមករក្សាទុកនៅអធិការដ្ឋាននគរបាលស្រុកកៀនស្វាយ ដើម្បីដោះស្រាយតាមផ្លូវច្បាប់៕
Source: Kampuchea Thmey Daily
0 Comments