ភ្នំពេញ ៖ លោកឧត្ដមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថរាជធានីភ្នំពេញ បានបើកកិច្ចប្រជុំ ដើម្បីផ្សព្វផ្សាយនូវ អនុសាសន៍ ១០ចំណុច របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលថ្លែងក្នុងពិធី អបអរសាទរខួប ២០ឆ្នាំ នៃថ្ងៃកំណើតកងទ័ពជើងគោក ថ្ងៃទី២៤ ខែមករា ឆ្នាំ២១០៩ ជូនដល់នាយទាហាន កងរាជអាវុធហត្ថរាជធានីភ្នំពេញទាំងអស់ បានយល់ជ្រួតជ្រាប ដើម្បីយកទៅអនុវត្តនិងផ្សព្វផ្សាយបន្ត ព្រមទាំងបាន ផ្សព្វផ្សាយផែនការ ការពារសន្តិសុខ សណ្ដាប់ធ្នាប់ ជូនបងប្អូនប្រជាពលរដ្ឋ ក្នុងឱកាសបុណ្យចូលឆ្នាំថ្មីប្រពៃណី ចិន-វៀតណាម ដែលនឹងឈាន មកដល់ក្នុងពេលខាងមុខនេះ។
ក្នុងឱកាសប្រជុំនាពេលនោះផងដែរ លោកឧត្ដមសេនីយ៍ឯក រ័ត្ន ស្រ៊ាង បានឆ្លៀតឱកាស ដាស់តឿនក្រើនរំលឹក នូវវិន័យសណ្ដាប់ធ្នាប់ របស់កងយោធពលខេមរភូមិន្ទ សភាពការណ៍នយោបាយជាតិ និងអន្តរជាតិ ព្រមទាំងលើកឡើងអំពីគំនិតទុច្ចរិត របស់ក្រុមក្បត់ជាតិ ដែលមានទណ្ឌិត សម រង្សី ជាមេចលនាបះបោរ និងមានជនបរទេសនៅពីក្រោយ តែងតែញុះបង្កចលាចល បំផ្លាញសុខសន្តិភាពក្នុងសង្គមកម្ពុជា,បន្ទច់បង្អាក់នូវការអភិវឌ្ឍជាតិ ជាពិសេស តែងតែលាបពណ៌រាជរដ្ឋាភិបាលស្របច្បាប់ ដែលកើតឡើងដោយការបោះឆ្នោត ដើម្បីបោកបញ្ឆោតពលរដ្ឋស្លូតត្រង់ឈានទៅរកការធ្វើបដិវត្តពណ៌ បម្រើឲ្យមហិច្ឆតាជនបរទេស។
ថ្មីៗនេះទៀតសោត ទណ្ឌិត សម រង្សី បានញុះញង់ម្តងហើយៗម្តងទៀត ប្រកាសឲ្យកងកម្លាំងប្រដាប់អាវុធ ក្រោកឡើងប្រឆាំងនឹងរាជរដ្ឋាភិបាលស្របច្បាប់ ដែលដឹកនាំដោយ សម្ដេចអគ្គមហាសេនាបតី តេជោ ហ៊ុន សែន ជានាយករដ្ឋមន្ត្រី ដែលប្រសូតចេញពីការបោះឆ្នោត ពីសំណាក់ប្រជាពលរដ្ឋស្ទើរពេញនគរ។ ការញុះញង់នេះ ក៏ត្រូវបាននាយឧត្ដមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស ធ្វើការថ្កោលទោសដាច់អហង្ការ ចំពោះការអំពាវនាវរបស់ ទណ្ឌិត សម រង្សី។
ព្រមជាមួយគ្នានោះ អាវុធហត្ថរាជធានីភ្នំពេញទាំងអស់ បានសម្តែងនូវការគាំទ្រពេញទំហឹង ចំពោះការថ្កោលទោស របស់នាយឧត្ដមសេនីយ៍ សៅ សុខា ទៅលើសម្តីញុះញង់របស់ទណ្ឌិត សម រង្សី និងបានប្រកាសត្រៀមខ្លួនជាស្រេច រង់ចាំទទួលគ្រប់បទបញ្ជារបស់នាយឧត្ដមសេនីយ៍ ប្ដេជ្ញាការពារដាច់ខាត រាជរដ្ឋាភិបាលស្របច្បាប់ ដឹកនាំដោយ សម្ដេចអគ្គមហាសេនាបតី តេជោ ហ៊ុន សែន នាយឧត្ដមសេនីយ៍ ផុតលេខផ្កាយមាស៥ ជានាយករដ្ឋមន្ត្រី ដែលបង្កើតឡើងតាមរយៈការបោះឆ្នោតទូទាំងប្រទេស៕
Source: Kampuchea Thmey Daily
0 Comments