ប្រដាល់ ៖ ការប្រកួតជម្រុះដណ្តើមខ្សែក្រវាត់ជើងឯកCarabao រដូវកាលទី៨ ទម្ងន់៥៧គីឡូក្រាម នៅសង្វៀនទូរទស្សន៍SEA TV កាលពីរសៀលថ្ងៃទី០២ ខែកុម្ភៈ ឆ្នាំ២០១៩ ដែលជាការប្រកួត ជុំទី២ របស់អ្នកប្រដាល់កម្ពុជា លាភ រដ្ឋា ក្លិបដីឡូរិ៍មានរិទ្ធ ខេត្តបន្ទាយមានជ័យ និង តាញ់មករា សមាគមកីឡាប្រដាល់ក្រសួងការពារជាតិនោះ ពួកគេទាំងពីររកបាន៣ពិន្ទុបន្ថែមដូចគ្នា។
លាភ រដ្ឋា គេបានប្រើពេល៤ទឹក ទើបផ្ដួលអ្នកប្រដាល់ថៃ Banda Sak ឲ្យបោះបង់ចោលការប្រកួតក្នុងទឹកទី៤។ Banda Sak ត្រូវរដ្ឋា ទាត់ឲ្យខូចជើងដួលក្រោកលែងរួច ហើយនៅក្នុងទឹកទី៣ មុនខូចជើងនេះ អ្នកប្រដាល់ថៃរូបនេះ ត្រូវរដ្ឋា ដាល់ចំមុខដួលដាច់ផ្ងារក្រោយ ត្រូវអាជ្ញាកណ្ដាលរាប់ដល់៨ ម្តងរួចមកហើយ។
ជាមួយនឹងជ័យជម្នះនេះ បានធ្វើឲ្យ លាភ រដ្ឋា ក្នុងពីរប្រកួតឈ្នះទាំង២ប្រកួតបាន៦ពិន្ទុ ហើយ Banda Sak ពីរប្រកួតដូចគ្នាទទួលបាន២ពិន្ទុ ដោយសារវាយចាញ់ទាំង២ប្រកួត។
ចំពោះ តាញ់ មករា គេបានផ្ដួលអ្នកប្រដាល់ថៃPhrakay Phat ក្នុងទឹកទី១ប៉ុណ្ណោះ។ តាញ់ មករា បានទាត់ឲ្យ Phrakay Phat ខូចជើងដែរ ដែលធ្វើឲ្យអ្នកប្រដាល់ថៃរូបនេះ បោះបង់ការប្រកួតត្រឹមតែមួយទឹកនោះ។
ជាមួយនឹងជ័យជម្នះនេះ ទាំង តាញ់ មករា និង លាភ រដ្ឋា គឺពួកគេទាំងពីររកបាន៣ពិន្ទុបន្ថែមដូចគ្នា សម្រាប់ការប្រកួតជម្រុះខ្សែក្រវាត់ជើងឯកCarabao រដូវកាលទី៨ ទម្ងន់៥៧គីឡូក្រាម លើកទី២របស់ខ្លួន។ ចំណែក Banda Sak និង Phrakay Phat ទទួលបាន២ពិន្ទុម្នាក់។
ដោយឡែក ការប្រកួតរវាងអ្នកប្រដាល់រួមជាតិវិញ ពុទ្ធ ភារិន្ទ អ្នកប្រដាល់ក្លិបពុទ្ធសេរីវង្សកីឡា ប្រកួតចាញ់ រឿន សុខលី អ្នកប្រដាល់ក្លិបការិយាល័យទី៥កងទ័ពជើងគោក ដោយពិន្ទុ ហើយ ឡុង បេនលឿន អ្នកប្រដាល់ក្លិបសាលវ័ន្តកីឡា វាយឈ្នះ នួន រ៉ាថេប អ្នកប្រដាល់ក្លិបតាឯកដំបងដែកមានរិទ្ធដោយពិន្ទុ។
•រឿង សារ័ត្ន វាយឈ្នះថៃ ក្នុងទឹកទី៤ ខណៈ សួង សុវណ្ណថា ចាញ់ធា នុរាជ ក្នុងទឹក៤ដែរ
រឿង សារ័ត្ន អ្នកប្រដាល់ជើងចាស់ក្លិបកងពលតូចទ័ពឆ័ត្រយោង៩១១ បានផ្ដួលអ្នកប្រដាល់ថៃSoeur Puon អោយចុះចាញ់ក្នុងទឹកទី៤ ក្នុងការជួបប្រកួតគ្នាជាលក្ខណៈមិត្តភាពអន្តរជាតិ កាលពីព្រឹកថ្ងៃទី០៣ ខែកុម្ភៈ ឆ្នាំ២០១៩ លើសង្វៀនBoostrong Fighter On Fire នៅ SEATV។
សារ័ត្ន បានប្រើស្នៀតកែងវាយចំសៀតផ្ការបស់Soeur Puon ធ្វើឲ្យអ្នកប្រដាល់ថៃរូបនេះ ដួលក្រោកលែងរួច ហើយបោះបង់ចោលការប្រកួត ក្រោយពីអាជ្ញាកណ្ដាលរាប់ដល់១០ហើយនោះ។
ចំពោះ សួង សុវណ្ណថា អ្នកប្រដាល់ក្លិបបូរីរាជសីហ៍មានរិទ្ធ បានវាយចាញ់អ្នកប្រដាល់ជើងចាស់ ធា នុរាជ ក្លិបមកុដរាជសីហ៍ក្នុងទឹកទី៤ បន្ទាប់ពី ធា នុរាជ ទាត់បកក្រោយមួយជើងចំកញ្ចឹង កនោះ។
ចំណែក ការប្រកួតរវាងអ្នកប្រដាល់ឡូញ វ៉ាន់ឌី ក្លិបវិបុលដារិទ្ធពោធិ៍សែនជ័យវិញនោះ គឺគេវាយចាញ់លីន វិរៈ អ្នកប្រដាល់ក្លិបបូរីរាជសីហ៍មានរិទ្ធដោយពិន្ទុ ខណៈដែលឫទ្ធិ សាស្ត្រាវុធ ក្លិបអាណាចក្រគុនខ្មែរ ឈ្នះ ឡុង លាងសៅ ក្លិបសាលវ័ន្តកីឡាដោយពិន្ទុដែរ។
•លន បញ្ញា និង ធឿន ធី ចាញ់ថៃ ក្នុងជម្រុះខ្សែក្រវាត់Wurkz ជុំទី២ដូចគ្នា
អ្នកប្រដាល់កម្ពុជា២រូប គឺលនបញ្ញា និង ធឿន ធី បានវាយចាញ់អ្នកប្រដាល់ថៃដូចគ្នា ក្នុងការប្រកួតជម្រុះជុំទី២ នៃព្រឹត្តិការណ៍ដណ្ដើមខ្សែក្រវាត់Wurkz រដូវកាលទី៣ ទម្ងន់៦០គីឡូក្រាម លើសង្វៀនSEA-TV កាលពីល្ងាចថ្ងៃទី០៣ ខែកុម្ភៈ ឆ្នាំ២០១៩។
លន បញ្ញា អ្នកប្រដាល់សមាគមកីឡាប្រដាល់ក្រសួងការពារជាតិ បានវាយចាញ់អ្នកប្រដាល់ថៃ Super Man ដោយពិន្ទុដាច់តែម្តង គឺ៥សូន្យ ដោយចៅក្រមទាំង៥រូបបានផ្តល់ពិន្ទុឲ្យថៃឈ្នះទាំងប្រាំរូប។
ចំណែក ធឿន ធី គេចាញ់ Chhai Yo ក្នុងទឹកទី៣ ដោយត្រូវថៃវាយកែងបែកលើចិញ្ចើមស្តាំរយះធំចេញឈាមច្រើនពេក រំខានដល់ការប្រកួត ទើបគ្រូពេទ្យប្រចាំសង្វៀនប្រដាល់ បញ្ឈប់លែងឲ្យប្រកួតក្នុងទឹកទី៣នោះ។
នេះជាការប្រកួតជម្រុះលើកទី២ របស់ពួកគេទាំង៤ ក្នុងការប្រកួតជម្រុះដណ្ដើមខ្សែក្រវាត់ Wurkz រដូវកាលទី៣ ទម្ងន់៦០គីឡូក្រាម។ ឆ្លងកាត់លទ្ធផលនេះ លន បញ្ញា ក្នុងពីរប្រកួតទទួលបាន៤ពិន្ទុ គឺឈ្នះ១ចាញ់១ប្រកួត ឯ Super Man បាន៦ពិន្ទុដោយឈ្នះទាំងពីរប្រកួត ហើយ ធឿន ធី គេបាន២ពិន្ទុ ដោយសារគេចាញ់ទាំង២ប្រកួត និងChhai Yo គេបាន៤ពិន្ទុ ដោយចាញ់១ឈ្នះ១ប្រកួត។
សូមបញ្ជាក់ថា ព្រឹត្តិការណ៍ប្រដាល់ដណ្តើមខ្សែក្រវាត់Wurkz រដូវកាលទី៣ ទម្ងន់៦០គីឡូក្រាមនេះ មានអ្នកប្រដាល់ជើងខ្លាំងកម្ពុជា៤រូប និង អ្នកប្រដាល់ជើងខ្លាំងថៃ៤រូប។ ការប្រកួត គឺពុំមានវគ្គពាក់កណ្ដាលផ្ដាច់ព្រ័ត្រទេ។ ដូច្នេះហើយ ទើបទាំងប្រដាល់ខ្មែរ ទាំងអ្នកប្រដាល់ថៃ គឺត្រូវការឈ្នះដូចគ្នា ត្បិតគេជ្រើសរើសយកតែអ្នកលេខ១ និង លេខ១ក្នុងជុំ នៃពូលខ្មែរ និងពូលថៃ តែប៉ុណ្ណោះ។
ចំពោះការប្រកួតក្រៅពីគូខ្សែក្រវាត់នេះ ឆាយ មាស អ្នកប្រដាល់ក្លិបសំរោងកោងខេត្តបាត់ដំបង បានវាយស្មើពិន្ទុជាមួយលន់ សៀកឡេង អ្នកប្រដាល់ក្លិបថ្នល់ទទឹងគុនខ្មែរ ហើយអេរ៉ាវ៉ាន់ ចាន់រាជ អ្នកប្រដាល់ក្លិបកុសលកីឡា បានផ្ដួល អេលីត ពន្លក អ្នកប្រដាល់ក្លិបឆ្មាសសែនសុខគុនខ្មែរ នៅក្នុងទឹកទី១៕
Source: Kampuchea Thmey Daily
0 Comments