ប្រធានាធិបតីទួរគីលោក Recep Tayyip Erdogan កាលពីថ្ងៃអាទិត្យបានចោទប្រកាន់សហរដ្ឋអាមេរិកថា បានរក្សាភាពស្ងៀមស្ងាត់លើករណីឃាតកម្មអ្នកកាសែតអារ៉ាប៊ីសាអ៊ូឌីតលោក Jamal Khashoggi ដែលត្រូវបានសម្លាប់ដោយក្រុមពិឃាតរបស់អារ៉ាប៊ីសាអ៊ូឌីតនៅក្នុងស្ថានកុងស៊ុលទីក្រុងអ៊ីស្តង់ប៊ុល។
លោក Erdogan បានប្រាប់បទសម្ភាសន៍មួយជាមួយស្ថានីយទូរទស្សន៍ TRT ដែលគ្រប់គ្រងដោយរដ្ឋថា “ខ្ញុំមិនអាចយល់ពីភាពស្ងប់ស្ងាត់របស់អាមេរិកបានទេ។ យើងចង់ឲ្យអ្វីៗទាំងអស់ត្រូវបានបញ្ជាក់ឲ្យច្បាស់ព្រោះមានអំពើឃោរឃៅនិងមានឃាតកម្ម។ ករណីឃាតកម្មរបស់លោក Khashoggi មិនមែនជារឿងធម្មតាទេ”។
លោក Khashoggi ដែលជាអ្នកកាសែត Washington Post និងជាអ្នករិះគន់របបអារ៉ាប៊ីសាអ៊ូឌីតគឺត្រូវបានគេសម្លាប់នៅឯស្ថានកុងស៊ុលរបស់ប្រទេសអារ៉ាប៊ីសាអ៊ូឌីតក្នុងទីក្រុងអ៊ីស្តង់ប៊ុលកាលពីថ្ងៃទី២ខែតុលា។
គាត់បានទៅស្ថានកុងស៊ុលដើម្បីទទួលយកឯកសារសម្រាប់អាពាហ៍ពិពាហ៍របស់គាត់ជាមួយស្ត្រីជនជាតិទួរគី។
ប្រទេសទួរគីបាននិយាយថា លោក Khashoggi ត្រូវបានសម្លាប់ដោយជនជាតិអារ៉ាប៊ីសាអ៊ូឌីតមួយក្រុមមានគ្នា១៥នាក់ដែលរឹត.កគាត់នៅឯបេសកកម្មការទូតរបស់អារ៉ាប៊ីសាអ៊ូឌីត។
បន្ទាប់ពីបដិសេធការសម្លាប់នេះរយៈពេលពីរសប្តាហ៍ រដ្ឋាភិបាលក្រុងរីយ៉ាដបានពិពណ៌នាថាវាជា “ប្រតិបត្តិការដ៏សាហាវឃោរឃៅ” ប៉ុន្តែបានបដិសេធការជាប់ពាក់ព័ន្ធណាមួយដោយរាជទាយាទ Mohammed bin Salman ។
រឿងក្តីនេះបានបណ្តាលឲ្យមានភាពតានតឹងនៅក្នុងទំនាក់ទំនងរបស់អារ៉ាប៊ីសាអ៊ូឌីតជាមួយទីក្រុងវ៉ាស៊ីនតោន។
មន្ត្រីទួរគីកំពុងស្វែងរកចម្លើយពីអារ៉ាប៊ីសាអ៊ូឌីតចំពោះសំណួរមួយចំនួនដូចជាអ្នកណាដែលបញ្ជាឲ្យវាយប្រហារនិងអំពីកន្លែងលាក់សាកសពរបស់លោក Khashoggi ជាដើម៕ AFP
Source: Kampuchea Thmey Daily
0 Comments