ព្រះសីហនុ ៖ រថយន្ត Nissan Diesel ប្រភេទបែនចង្កូតស្ដាំមួយគ្រឿង មិនដឹងជាមានបញ្ហាអ្វីឡើយខណៈកំពុងបើកបរសុខៗ ស្រាប់តែរេចង្កូតមកខាងឆ្វេងដៃ ហើយទៅបុកអ្នកជិះម៉ូតូក្នុងទិសដៅបញ្ច្រាសគ្នា បណ្ដាលឲ្យបុរសម្នាក់ស្លាប់ភ្លាមៗនៅកន្លែងកើតហេតុ។
ករណីគ្រោះថ្នាក់ចរាចរណ៍ខាងលើនេះ បានកើតមានឡើងនៅម៉ោងប្រមាណ៥ព្រឹក ថ្ងៃទី១២ ខែកុម្ភៈ ឆ្នាំ២០១៩ នៅលើផ្លូវជាតិលេខ៤ ចន្លោះបង្គោលគីឡូម៉ែត្រលេខ១៨៧/១៨៨ ស្ថិតនៅភូមិអណ្ដូងថ្ម ឃុំអណ្ដូងថ្ម ស្រុកព្រៃនប់ ខេត្តព្រះសីហនុ។ ក្រោយបង្កហេតុ អ្នកបើកបររថយន្ត បានរត់គេចខ្លួនបាត់ស្រមោល។
សមត្ថកិច្ចមូលដ្ឋាន ដែលចុះទៅដល់កន្លែងកើតហេតុបានឲ្យដឹងថា រថយន្តបង្កហេតុ ម៉ាក Nissan Diesel ពណ៌ខៀវ ពាក់ស្លាកលេខ ចង្កូតស្តាំ ព្រះសីហនុ ៣-០៣៥៤ ទិសដៅ ពីភ្នំពេញ ឆ្ពោះទៅខេត្តព្រះសីហនុ។ លុះមកដល់ចំណុចកើតហេតុ រថយន្តបានរេចង្កូត មកខាងឆ្វេងដៃរបស់ខ្លួន ចូលទៅបុកម៉ូតូ០១គ្រឿង ម៉ាក Honda-Dream ពណ៌ខៀវខ្មៅ ពាក់ស្លាកលេខ ភ្នំពេញ ១FQ-២៧២២ ដែល មានទិសដៅផ្ទុយគ្នា បើកបរដោយ ឈ្មោះ ហ៊ុំ រដ្ឋា ភេទប្រុស អាយុ៣៥ឆ្នាំ មានទីលំនៅផ្ទះ៧០ ភូមិការធំ ឃុំចាម ស្រុកកំពង់ត្របែក ខេត្តព្រៃវែង។ សមត្ថកិច្ចបាននិយាយទៀតថា ជនរងគ្រោះដែលរងរបួស ហើយស្លាប់នេះមាន ឈ្មោះ ហ៊ុំ រដ្ឋា អ្នកបើកបរម៉ូតូ។
បច្ចុប្បន្ន សាកសព កំពុងរង់ចាំក្រុមគ្រួសារយកទៅធ្វើបុណ្យតាមប្រពៃណី រីឯវត្ថុតាងទាំងពីរយកទៅរក្សាទុកនៅអធិដ្ឋាននគរបាលស្រុកព្រៃនប់៕
Source: Kampuchea Thmey Daily
0 Comments