ក្លិបបាល់ទាត់ភ្នំពេញក្រោន សមាជិកពានរង្វាន់លីគកំពូលកម្ពុជា (Metfone Cambodian League) បានប្រកាសប្រាប់អ្នកគាំទ្រថាក្លិបនឹងរៀបចំពិធីបង្ហាញឯកសណ្ឋានថ្មីប្រចាំរដូវកាលឆ្នាំ២០១៩ ព្រមទាំងប្រកាសជាផ្លូវការឈ្មោះថ្មីនៃកីឡដ្ឋាន RSN ក៏ដូចជាបង្ហាញពីបណ្តាដៃគូសហការឧបត្ថម្ភសម្រាប់រដូវកាលនេះផងដែរ។
យោងតាមសេចក្តីប្រកាសរបស់ក្លិបនៅលើវិបសាយរបស់ខ្លួនបានបញ្ជាក់ថា ពិធីនេះនឹងរៀបចំចាប់ពីវេលាម៉ោង៥និង៣០នាទីតទៅនៅថ្ងៃច័ន្ទ ទី២៥ ខែមីនា ឆ្នាំ២០១៩ខាងមុខនេះនៅកីឡដ្ឋាន RSN ផ្ទាល់ ហើយកម្មវិធីនេះក៏មានការចូលរួមពីសំណាក់ថ្នាក់ដឹកនាំវិស័យកីឡាកម្ពុជា រួមជាមួយថ្នាក់ដឹកនាំក្លិប និងតំណាងស្ថាប័នជាដៃគូក្លិបក៏ដូចជាភ្ញៀវកិត្តិយសជាច្រើនរូបទៀត។
កម្មវិធីនេះផងដែរមានបើកអញ្ជើញអ្នកគាំទ្រដែលជាសមាជិកក្លឹប (ដែលមានកាតសមាជិក ឬ Membership Card ជាសម្គាល់) ព្រមទាំងបើកទទួលចុះឈ្មោះលើអនឡាញចំនួន ៣០០នាក់ (ដែលនឹងមានការរៀបចំអាហារសម្រន់ និងភេសជ្ជៈជូន) ព្រមទាំងសាធារណជនទូទៅផងដែរ។ ក្រៅពីនោះក្នុងកម្មវិធីនេះនឹងមានបន្ថែមការកម្សាន្តជាច្រើនដូចជាការសម្តែងរបស់ក្រុម«ក្មេងខ្មែរ» រួមជាមួយតារាចម្រៀង MC Bull និងទស្សនីយភាពសម្តែងសិល្បៈផ្សេងទៀតដ៏សម្បូរបែប ខណៈដែលអ្នកចូលរួមទាំងអស់ក៏មានឱកាសឈ្នះរង្វាន់ជាច្រើនថែមទៀត។
សូមរំលឹកថា មុនរដូវកាលថ្មីចាប់ផ្តើម ក្រុមភ្នំពេញក្រោន បានតែងតាំងក្បាលម៉ាស៊ីន ថ្មីក្រោយជម្រុះថ្នាក់ដឹកនាំចាស់អស់បន្ទាប់ពីចប់រដូវកាលឆ្នាំ២០១៨។ ចំណែកថ្នាក់ដឹកនាំថ្មីរបស់ក្លិបមានដូចជា លោក លី ហៀង ជាអ្នកចាត់ការទូទៅក្លិប ចំណែក លោក Leonardo Vitorino ជាគ្រូបង្គោលថ្មី ស្របពេលប្អូនប្រុសរបស់ខ្លួន Luis Fernando Vitorino កាន់តំណែងជាគ្រូបង្វឹកអ្នកចាំទីឈុតធំ។ អតីតគ្រូវេស្ទើន លោក ស៊ុំ វណ្ណា បានទទួលតំណែងជាគ្រូជំនួយក្រុមឈុតធំ ខណៈដែលអតីតខ្សែប្រយុទ្ធ កែវ សុខង៉ន ជាអ្នកចាត់ការទូទៅក្រុមឈុតធំ៕
Source: Kampuchea Thmey Daily
0 Comments