ភ្នំពេញ ៖ ប្រធានបេសកកម្មគណៈប្រតិភូសហភាពអឺរ៉ុប លោកស្រី Paola Pampaloni បានអះអាងថា គណៈប្រតិភូរបស់សហភាពអឺរ៉ុបមកកម្ពុជានៅពេលនេះ មិនមែនមកដក EBA ពីកម្ពុជានោះទេ ប៉ុន្តែដើម្បីធ្វើការជាមួយគ្នា បើកកិច្ចសន្ទនាជាមួយគ្នា ស្វែងរកចំណុចរួម ដើម្បីស្វែងរកដំណោះស្រាយ ដើម្បីបង្កើនកិច្ចសហប្រតិបត្តិការភាគីទាំងពីរ ដើម្បីបម្រើដល់ផលប្រយោជន៍រួម ហើយសហគមន៍អឺរ៉ុប ចង់បង្កើនភាពជាដៃគូឱ្យកាន់តែខ្លាំងក្លាថែមទៀតជាមួយប្រទេសកម្ពុជា និងបន្តនូវអ្វីដែលអីយូរបានចូលកន្លងមកនៅកម្ពុជា។
ប្រធានគណៈប្រតិភូសហភាពអឺរ៉ុបលើកឡើងបែបនេះ ខណៈចូលជួបពិភាក្សាជាមួយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីព្រឹកថ្ងៃទី២០ ខែមីនា ឆ្នាំ២០១៩។
លោក ផាត សុផានិត ប្រធានទំនាក់ទំនងកិច្ចការអន្តរជាតិ និងជាអ្នកនាំពាក្យរងបានថ្លែងប្រាប់អ្នកសារព័ត៌មានក្រោយជំនួបនោះថា នៅក្នុងជំនួបនោះគណៈប្រតិភូសហភាពអឺរ៉ុប បានលើកឡើងពីសារសំខាន់ចំនួនពីរ គឺទី១, បញ្ហាលំហនយោបាយនៅកម្ពុជា និងទី២, ការចូលរួមនៅក្នុងសកម្មភាពនយោបាយ ក្នុងក្របខណ្ឌសង្គមប្រជាធិបតេយ្យ ហើយបញ្ហានេះ លោកស្រី Paola Pampaloni ដែលប្រធានគណៈប្រតិភូបានបញ្ជាក់ថា ដំណើរទស្សនកិច្ចរបស់គណៈប្រតិភូសហភាពអឺរ៉ុបនៅពេលនេះ មិនមានអ្វីប្លែកនោះទេ គឺធ្វើឡើងទៅតាមកាលបរិច្ឆេទ និងកម្មវិធីដែលបានដាក់ចេញរបស់សហភាពអឺរ៉ុប ដែលមានចែងនៅក្នុងសេចក្តីប្រកាសព័ត៌មានរបស់ EU នាពេលកន្លងមក ហើយដំណើរទស្សនកិច្ចនេះ គឺដើម្បីបង្កើតនូវការសន្ទនារវាងភាគីទាំងពីរ ដោយត្រង់ទៅត្រង់មក លើបញ្ហាប្រព័ន្ធអនុគ្រោះពន្ធ EBA ។
ជាការឆ្លើយតប សម្ដេចក្រឡាហោម ស ខេង បានស្វាគមន៍ចំពោះដំណើរទស្សនកិច្ចរបស់គណៈប្រតិភូសហភាពអឺរ៉ុប ហើយសម្តេចបានលើកឡើងនូវបញ្ហាមួយចំនួន គឺទាក់ទងលំហនយោបាយនៅកម្ពុជា ការចូលរួមរបស់ NGO ក៏ដូចជាសង្គមស៊ីវិល នៅក្នុងដំណើរការអភិវឌ្ឍន៏របស់ប្រទេសកម្ពុជា។ ចំណុចនេះសម្តេចក្រឡាហោមបានបញ្ជាក់ថា កម្ពុជាតែងចាត់ទុក NGO និងសង្គមស៊ីវិល គឺជាដៃគូអភិវឌ្ឍ ហើយតែងតែខិតខំលើកកម្ពស់ នូវភាពជាដៃគូរវាងភាគីទាំងពីរ គឺរវាងរដ្ឋាភិបាល និងសង្គមស៊ីវិល ហើយបានបង្កើតឡើងជាវេទិកាពិភាក្សា ហើយជាក់ស្ដែងបានរៀបចំចំនួន២លើករួចមកហើយ ដោយក្រសួងមហាផ្ទៃ និងក្រសួងការបរទេស និងក្រសួងការបរទេស។
ចំណែកការបង្កើតច្បាប់សង្គមស៊ីវិល ដែលបានចេញជារូបរាងហើយនោះ សម្ដេចក្រឡាហោម ស ខេង បានបញ្ជាក់ថា បានឆ្លងកាត់នូវវេទិកាពិគ្រោះយោបល់រវាងដៃគូពិគ្រោះយោបល់ ជាមួយមិត្តភ័ក្ត្របរទេសមួយចំនួន មុននឹងសម្រេចបានច្បាប់មួយនេះ។ សម្តេចបានបន្តថា រាជរដ្ឋាភិបាលតែងចាត់ទុកសង្គមស៊ីវិលជាដៃគូ បើទោះបីជាមានពេលខ្លះយើងមានទស្សនៈផ្ទុយគ្នាក៏ដោយ ប៉ុន្តែទស្សនៈផ្ទុយគ្នានេះ មិនបានធ្វើឲ្យភាគីទាំងពីរក្លាយជាសត្រូវនឹងគ្នានោះទេ។ ចំណុចនេះ លោកស្រីប្រធានប្រតិភូសភាអឺរ៉ុបបានឯកភាព ដោយសារតែបានមើលឃើញនូវវឌ្ឍនភាពនាពេលកន្លងមកក្នុងការលើកកម្ពស់ការចូលរួមរបស់ NGO ក៏ដូចជាសង្គមស៊ីវិល តាមរយៈការបង្កើតនូវយន្តការថ្មីៗ ដូចដែលសម្តេចបានលើកឡើង។
ចំពោះបញ្ហាចូលរួមក្នុងក្របខ័ណ្ឌនយោបាយក្នុងសង្គមប្រជាធិបតេយ្យ លោកស្រី Paola Pampaloni ដែលជាប្រធានគណៈប្រតិភូបានបញ្ជាក់ថា សហភាពអឺរ៉ុបមិនគាំទ្រទៅលើបុគ្គលណាមួយ ឬគណបក្សនយោបាយណាមួយនោះទេ តែអ្វីដែលសហភាពអឺរ៉ុបចង់បាន គឺសហភាពអឺរ៉ុបគាំទ្រនូវគោលការណ៍រួម ដើម្បីឲ្យមានគ្រប់សមាសធាតុនៅក្នុងសង្គម បានចូលរួមចំណែកទាំងអស់គ្នានៅក្នុងដំណើរការអភិវឌ្ឍន៍ប្រទេសកម្ពុជា។ ពាក់ព័ន្ធចំណុចនេះសម្ដេចក្រឡាហោមបានបញ្ជាក់ថា ទោះបីដំណើរការប្រជាធិបតេយ្យនៅកម្ពុជាពុំទាន់មានភាពល្អឥតខ្ចោះយ៉ាងណាក៏ដោយ ប៉ុន្តែគោលការណ៍គ្រឹះរបស់លទ្ធិប្រជាធិបតេយ្យនៅកម្ពុជាបានចាក់ឫស យ៉ាងរឹងមាំរួចទៅហើយ។ ជាមួយគ្នានេះ កម្ពុជាមិនអាចបោះបង់ផ្លូវប្រជាធិបតេយ្យនេះបានទេ ហើយអ្វីដែលសំខាន់គោលការណ៍លទ្ធិប្រជាធិបតេយ្យ គឺបានចែងយ៉ាងច្បាស់នៅក្នុងរដ្ឋធម្មនុញ្ញរបស់កម្ពុជារួចទៅហើយ។ សម្ដេចបានបញ្ជាក់ដែរថា ពីរចំណុចនៅក្នុងរដ្ឋធម្មនុញ្ញ ដែលមិនអាចប៉ះពាល់បាននោះ គឺរបបរាជានិយមអាស្រ័យរដ្ឋធម្មនុញ្ញ និងគោលការណ៍លទ្ធិប្រជាធិបតេយ្យសេរីពហុបក្ស ដែលគោលការណ៍ទាំងពីរនេះ គ្មាននរណាអាចប៉ះពាល់បានទេ។
ពាក់ព័ន្ធទៅនឹងការលើកកម្ពស់ការចូលរួមពីគ្រប់សមាសធាតុនៅក្នុងការអភិវឌ្ឍសង្គម សម្ដេចក្រឡាហោម ស ខេង បានបញ្ជាក់ថា បច្ចុប្បន្នរាជរដ្ឋាភិបាលកម្ពុជា កំពុងខិតខំអនុវត្តនូវកំណែទម្រង់វិមជ្ឈការ វិសហមជ្ឈការ ដែលចំណុចនេះ គឺជាផ្នែកមួយនៃការពង្រឹងលទ្ធិប្រជាធិបតេយ្យផងដែរ ដែលរាជរដ្ឋាភិបាលបានបែងចែកអំណាច ទៅដល់ថ្នាក់ក្រោមជាតិ ដើម្បីធ្វើជាម្ចាស់អំណាចផ្ទាល់ធ្វើការជាមួយប្រជាពលរដ្ឋ ដោះស្រាយបញ្ហាជូនប្រជាពលរដ្ឋ។
តាមលោក ផាត សុផានិត ចំណុចមួយទៀត ដែលលោកស្រីប្រធានគណៈប្រតិភូបញ្ជាក់ហើយបញ្ជាក់ទៀតនោះ គឺគណៈប្រតិភូរបស់សហភាពអឺរ៉ុបមកនៅកម្ពុជានៅពេលនេះ មិនមែនមកដក EBA ពីកម្ពុជានោះទេ ប៉ុន្តែមកធ្វើការជាមួយគ្នា មកបើកកិច្ចសន្ទនាជាមួយគ្នា ស្វែងរកចំណុចរួម ដើម្បីស្វែងរកដំណោះស្រាយ ដើម្បីបង្កើនកិច្ចសហប្រតិបត្តិការរវាងកម្ពុជា និងសហភាពអឺរ៉ុប ដើម្បីបម្រើដល់ផលប្រយោជន៍រួមរបស់ប្រទេសទាំងពីរ។ លោកស្រីបានបញ្ជាក់ដែរថា សហគមន៍អឺរ៉ុបចង់បង្កើនភាពជាដៃគូឲ្យកាន់តែខ្លាំងក្លាថែមទៀតជាមួយប្រទេសកម្ពុជា និងបន្តនូវអ្វីដែលអីយូរបានចូលកន្លងមកនៅកម្ពុជា។
ចំណុចនេះសម្ដេចក្រឡាហោម ស ខេង បានបញ្ជាក់ថា អ្វីៗទាំងអស់រាជរដ្ឋាភិបាលកំពុងតែខិតខំអនុវត្តតាមសេចក្តីថ្លែងការណ៍របស់រាជរដ្ឋាភិបាល ដែលបានចេញកាលពីថ្ងៃទី៣ ខែធ្នូ ឆ្នាំ២០១៨ កន្លងមក ដែលក្នុងនោះមាននិយាយទាំងអស់ តាំងពីអង្គការក្រៅរដ្ឋាភិបាល និងសង្គមស៊ីវិល គណបក្សនយោបាយ បញ្ហាសិទ្ធិការងារ បញ្ហាដីធ្លី ដែលនេះជាអ្វីដែលរាជរដ្ឋាភិបាលកំពុងខិតខំអនុវត្តន៍ ហើយនេះក៏ជាគោលការណ៍រួម ដែលរាជរដ្ឋាភិបាលកម្ពុជា បានដាក់ចេញ និងបន្តធ្វើការជាដំណាក់កាលៗជាបន្តបន្ទាប់។ សម្ដេចបានបញ្ជាក់ដែរថា កម្ពុជាត្រូវការមិត្តមកពីគ្រប់ទិសទី មិនថាសហភាពអឺរ៉ុប សហរដ្ឋអាមេរិក ចិន ឬប្រទេសណាមួយនោះទេ នៅក្នុងតំបន់អាស៊ាន គឺយើងត្រូវការមិត្តទាំងអស់ ហើយសម្ដេចសង្ឃឹមថា តាមរយៈដំណើរទស្សនកិច្ចរបស់គណៈប្រតិភូសហភាពអឺរ៉ុបនៅកម្ពុជានាពេលនេះ នឹងអាចស្វែងរកដំណោះស្រាយរួមមួយ និងសម្រេចបាននូវគោលបំណងរួមមួយសម្រាប់ប្រជាពលរដ្ឋកម្ពុជា និងប្រជាពលរដ្ឋរបស់សហភាពអឺរ៉ុប។
សូមបញ្ជាក់ថា គណៈប្រតិភូសហភាពអឺរ៉ុប ដែលមកបំពេញទស្សនកិច្ចនៅកម្ពុជា និងចូលជួបពិភាក្សាការងារជាមួយសម្តេចក្រឡាហោម ស ខេង នេះ ដឹកនាំដោយលោកស្រី Paola Pampaloni នាយករងផ្នែកគ្រប់គ្រងប្រចាំតំបន់អាស៊ី និងប៉ាស៊ីហ្វិក អមដំណើដោយលោក George Edgar ឯកអគ្គរដ្ឋទូតសហភាពអឺរ៉ុប, លោក Peter Berz អគ្គនាយកស្តីទីប្រចាំតំបន់អាស៊ី និងអាមេរិកឡាទីន, លោកស្រី Stavros Petropoulos មន្ត្រីជាន់ខ្ពស់ទទួលបន្ទុកទំនាក់ទំនងសហភាពអឺរ៉ុបជាមួយកម្ពុជា និងថៃ និងលោក Simone Pieri អនុប្រធានបេសកកម្ម។
ដំណោះទស្សនកិច្ចនៅប្រទេសកម្ពុជានេះ ស្ថិតក្នុងក្របខណ្ឌ នៃការត្រួតពិនិត្យមើលឡើងវិញ អំពីការអនុវត្តនូវកិច្ចការទាំងឡាយ ទាក់ទងទៅនឹងការបំពេញឲ្យលក្ខខណ្ឌ EBA ដែលជំនួបនេះធ្វើឡើងនៅក្រសួងមហាផ្ទៃ នេះបើតាមការបញ្ជាក់របស់រដ្ឋមន្ត្រីការបរទេសកម្ពុជា ហើយលោកឧបនាយករដ្ឋមន្ត្រីធ្លាប់បានបញ្ជាក់ថា ពាក់ព័ន្ធនឹងបញ្ហាប្រព័ន្ធអនុគ្រោះពន្ធ EBA នេះ យើងនៅតែប្ដេជ្ញាអនុវត្តឲ្យបានល្អ ហើយ EBA នេះ គង់តែនឹងបាត់ដោយស្វ័យប្រវត្ត នៅពេលប្រទេសកម្ពុជា ក្លាយទៅជាប្រទេសមួយ ដែលមានចំណូលខ្ពស់ តែជំហររបស់កម្ពុជា គឺមិនដោះដូរ មិនលក់អធិបតេយ្យភាពជាតិ ទោះស្ថិតក្នុងតំលៃណាក៏ដោយ។
ជាមួយគ្នានោះ លោកឧបនាយករដ្ឋមន្ត្រី ប្រាក់ សុខុន បានអរគុណចំពោះរបបអនុគ្រោះពន្ធរបស់សហភាពអឺរ៉ុប ដែលធ្វើឲ្យកម្ពុជាមានកំណើនសេដ្ឋកិច្ច ហើយក្នុងនោះក៏បានធ្វើឲ្យប្រជាពលរដ្ឋកម្ពុជា មានការងារធ្វើច្រើនផងដែរ។ បើតាមលោកឧបនាយករដ្ឋមន្ត្រី ប្រាក់ សុខុន ប្រព័ន្ធអនុគ្រោះពន្ធនេះមានតម្លៃអ្វី ប្រសិនបើកម្ពុជាបាត់បង់ឯករាជ្យភាព របស់ប្រទេស ។ ពីព្រោះលក្ខខណ្ឌផ្សារភ្ជាប់ជាមួយ EBA នេះ មានលក្ខខណ្ឌការងារ ហើយក៏មានលក្ខខណ្ឌអធិបតេយ្យ និងការគោរពសិទ្ធិមនុស្សផងដែរ ដូច្នេះមានន័យថា ការចាត់ការរបស់រាជរដ្ឋាភិបាល ដើម្បីរក្សាអធិបតេយ្យភាព និងឯករាជ្យភាពរបស់ខ្លួន សហភាពអឺរ៉ុបមិនទទួលយក។ មានន័យថា សហភាពអឺរ៉ុបមិនទទួលយកការអនុវត្តច្បាប់នៅកម្ពុជា។
លោកឧបនាយករដ្ឋមន្ត្រី ប្រាក់ សុខុន អះអាងថា “បើយើងមិនអាចអនុវត្តច្បាប់ស្រុកយើងបាន តើយើងធ្វើអ្វីទៀត ហើយច្បាប់មួយចំនួនរបស់កម្ពុជា សហភាពអឺរ៉ុបអ្នកជួយឲ្យយោបល់ និងតាក់តែងថែមទៀត។ ការអនុវត្តច្បាប់ ការការពារអធិបតេយ្យភាព ការការពារសន្តិភាព ពង្រឹងការឯកភាពជាតិ ក្នុងឋានៈជារដ្ឋាភិបាល ដែលទទួលខុសត្រូវមួយ ហើយបើធ្វើអ្វីតាមគេប្រាប់រហូតនោះ គឺបាត់បង់អធិបតេយ្យភាព ហើយវាមានអធិបតេយ្យភាពមកពីណា វាទៅជាខ្ញុំគេហើយ។ ឆ្នាំ១៩៧០ គឺជាមេរៀនសម្រាប់កម្ពុជា”៕
Source: Kampuchea Thmey Daily
0 Comments