ភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា នៅឆ្នាំ២០១៩នេះក្រសួងនឹងចាប់ផ្តើមអនុវត្តផ្តល់របបសន្តិសុខសង្គមផ្នែកហានិភ័យការងារដល់មន្ត្រីរាជការនៅទូទាំងប្រទេសដើម្បីលើកកម្ពស់សុវត្ថិភាពនិងសុខភាពនៅកន្លែងការងារឲ្យកាន់តែប្រសើរឡើង។
លោកបណ្ឌិត អ៊ិត សំហេងរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍ថា ការអនុវត្តរបបសន្តិសុខសង្គមផ្នែកហានិភ័យការងារសម្រាប់មន្ត្រីរាជការនេះនឹងជំរុញឲ្យមន្ត្រីរាជការនៅតាមក្រសួងស្ថាប័នទាំងអស់ខិតខំបំពេញការងារកាន់តែសកម្មថែមទៀតដែលជួយធ្វើឲ្យផលិតភាពការងារខ្ពស់សំដៅលើកស្ទួយដល់សេដ្ឋកិច្ចជាតិកាន់តែរីកចំម្រើនថែមទៀត។
លោក រដ្ឋមន្ត្រី បានបន្តថា របបសន្តិសុខសង្គមផ្នែកហានិភ័យការងារនេះមន្ត្រីរាជការទាំងអស់នឹងទទួលបាននូវការធានារ៉ាប់រង់ផ្នែកគ្រោះថ្នាក់ការងារដែលសំដៅទៅលើគ្រោះថ្នាក់លើរាងកាយពេលបំពេញការងារ គ្រោះថ្នាក់ពេលធ្វើដំណើរដែលសំដៅទៅលើពេលធ្វើដំណើរចេញពីលំនៅឋានទៅកន្លែងធ្វើការឬវិលត្រឡប់ទៅលំនៅឋានវិញដោយគ្មានឈប់ឬវាងទៅកន្លែងណាផ្សេងជាប្រយោជន៍ផ្ទាល់ខ្លួននិងជំងឺវិជ្ជាជីវៈដែលទាក់ទងទៅនឹងជំងឺផ្សេងៗដែលមានមូលហេតុមកពីការងារឬពាក់ព័ន្ធនឹងការងារទោះជាជំងឺនេះកើតឡើងក្នុងកំឡុងពេលបំពេញការងារឬពេលណាមួយក្រោយបំពេញការងារក៏ដោយ។
ចំណែក លោក រិន មករា មន្ត្រីក្រសួងព័ត៌មានបានថ្លែងកាលពីព្រឹកថ្ងៃទី០៧ ខែមីនា ឆ្នាំ២០១៩ ដោយបង្ហាញអារម្មណ៍រីករាយយ៉ាងខ្លាំងព្រោះថា របបសន្តិសុខសង្គមផ្នែកហានិភ័យការងារសម្រាប់មន្ត្រីរាជការនេះពិតជាមានសារៈសំខាន់ណាស់ក្នុងការចូលរួមចំណែកដ៏សំខាន់ក្នុងការកាត់បន្ថយការចំណាយនៅពេលដែលមានជួបបញ្ហាគ្រោះថ្នាក់ផ្សេងៗនៅពេលធ្វើដំណើរទៅធ្វើការងារនិងកើតឡើងនៅកន្លែងការងារដោយសាររដ្ឋជាអ្នកជួយចេញថ្លៃសេវាព្យាបាលជំងឺឬរបួស។
យ៉ាងណាក៏ដោយលោកបានស្នើឲ្យបេឡាជាតិរបបសន្តិសុខសង្គមធ្វើយ៉ាងណាជួយពន្លឿនការអនុវត្តរបបសន្តិសុខសង្គមផ្នែកហានិភ័យការងារនេះ ឲ្យបានលឿនដើម្បីឲ្យមន្ត្រីរាជការទទួលបាននូវអត្ថប្រយោជន៍បានពេញលេញខណៈបច្ចុប្បន្ននេះ លោកទទួលបានប័ណ្ណថែទាំសុខភាពពីបេឡាជាតិរបបសន្តិសុខសង្គមដែលហៅកាត់ថាប.ស.ស សម្រាប់ទៅពិនិត្យនិងព្យាបាលជំងឺនៅតាមមូលដ្ឋានសុខាភិបាលនានាដែលជាដៃគូរបស់ ប.ស.សដោយឥតបង់ប្រាក់។
លោកបណ្ឌិត អ៊ិតសំហេង បានលើកឡើងតាមរបាយការណ៍ឲ្យដឹងថា នៅឆ្នាំ២០១៨កន្លងទៅនេះក្រសួងបានចុះបញ្ជីរបបថែទាំសុខភាពមន្ត្រីសាធារណៈ អតីតមន្ត្រីរាជការ និងអតីតយុទ្ធជនបានចំនួន ៣២ ក្រសួង ស្ថាប័ន មានសមាជិកសរុបចំនួន ៣១២ ៣០៦នាក់ និងមានអ្នកទៅប្រើសេវាចំនួន ២៥ ៨៥១ ដង/នាក់ និងចំណាយថវិកាសរុបចំនួន ២,៤៨ប៊ីលានរៀល។ បានផ្តល់របបសន្តិសុខសង្គមផ្នែកថែទាំសុខភាពសម្រាប់មន្ត្រីសាធារណៈបានចំនួន ២៥.៨៥១ ដងនាក់ ក្នុងនោះ សម្រាលកូនបានចំនួន ៩០៥នាក់។
គួរបញ្ជាក់ថា ការត្រៀមអនុវត្តរបបសន្តិសុខសង្គមផ្នែកហានិភ័យការងារទៅលើមន្ត្រីរាជការនេះបន្ទាប់ពីក្រសួងការងារនិងបណ្តុះបណ្តាវិជ្ជាជីវៈបានដាក់ឲ្យអនុវត្តដល់កម្មករនិយោជិតនៅតាមរោងចក្រសហគ្រាសនានាតាំង ពីខែវិច្ឆិកាឆ្នាំ២០០៨កន្លងទៅនេះ ដើម្បីជួយថែទាំជំងឺ ឬ គ្រោះថ្នាក់ផ្សេងៗដែលបណ្តាលមកពីការងារដោយ ប.ស.ស ជាអ្នកចេញថ្លៃព្យាបាលជំនួស៕
Source: Kampuchea Thmey Daily
0 Comments