កណ្តាល ៖ ដោយសារអំណាចភ្លើងប្រចណ្ឌ និងមានជាតិសុរាចូលខ្លួនផងនោះ ធ្វើអោយបុរសពីរនាក់ បានបើកឆាកប្រយុទ្ធស្លាប់រស់ លទ្ធផលចុងក្រោយម្នាក់ស្លាប់ និងម្នាក់ទៀត ត្រូវនគរបាលចាប់ខ្លួន។
ហេតុការណ៍នេះ បានកើតឡើងនៅថ្ងៃចន្ទ ១៣រោច ខែមាឃ ឆ្នាំច សំរឹទ្ធស័ក ពុទ្ធសករាជ ២៥៦២ ត្រូវនឹងថ្ងៃទី០៤ ខែមីនា ឆ្នាំ២០១៩ វេលាម៉ោង ២០និង០០នាទី នៅចំណុចភូមិក្នុង ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។
ជនរងគ្រោះឈ្មោះ ស៊ុំ វឿន ហៅ ប៉ាវ ចិន ភេទប្រុស អាយុ ៣៨ឆ្នាំ ជនជាតិខ្មែរ មុខរបរកម្មករឡឥដ្ឋ មានទីលំនៅភូមិព្រែកតាបែន ឃុំព្រះប្រសប់ ស្រុកខ្សាច់កណ្តាល ខេត្តកណ្តាល។
ជនសង្ស័យឈ្មោះ សំ សុង ភេទប្រុស អាយុ២៤ឆ្នាំ ជនជាតិខ្មែរ មុខរបរកម្មករឡឥដ្ឋ មានទីលំនៅភូមិកោះត្រាច ឃុំថ្មី ស្រុកកំពង់រោទិ៍ ខេត្តស្វាយរៀង (ឃាត់ខ្លួន)។
សាក្សីនៅក្បែរកន្លែងកើតហេតុបានអោយដឹងថា នៅមុនពេលកើតហេតុ ជនសង្ស័យ និងជនរងគ្រោះ មានសភាពស្រវឹងស្រាដូចគ្នា ហើយជនរងគ្រោះប្រចណ្ឌប្រពន្ធជាមួយនឹងជនសង្ស័យ ទើបបង្កឲ្យមានទំនាស់ពាក្យសម្តី រហូតវាយតបគ្នា។ ពេលនោះជនរងគ្រោះបានយកដំបងឫស្សីវាយ ជនសង្ស័យត្រូវចំក្បាល០៣ដំបង ចំណែកជនសង្ស័យបានទាញយកស្នមុខប្រាំមកចាក់ត្រូវជនរងគ្រោះ។ ភ្លាមនោះ ជនរងគ្រោះ បានរត់ចេញពីកន្លែងកើតហេតុពុំដឹងទៅណាទេ។ លុះដល់វេលាម៉ោង ៦និង៣០នាទី ថ្ងៃទី០៥ ខែមីនា ឆ្នាំ២០១៩ ប្រជាពលរដ្ឋបានឃើញ ជនរងគ្រោះដេកស្លាប់ផ្ទាល់ដីនៅជាប់ផ្ទះឈ្មោះ វ៉ៃ ស្រីលក្ខ័ បានរាយការណ៍ ជូនសមត្ថកិច្ចនគរបាលប៉ុស្តិ៍ព្រែកតាមាក់ បន្ទាប់មកកម្លាំងនគរបាលផ្នែកយុត្តិធម៌ស្រុកសហការជាមួយកម្លាំងនគរបាលប៉ុស្តិ៍ ចុះដល់កន្លែងកើតហេតុស្រាវជ្រាវ និងឃាត់ខ្លួនជនសង្ស័យបញ្ជូនមក អធិការដ្ឋាននគរបាលស្រុកខ្សាច់កណ្តាល ដើម្បីចាត់ការតាមនីតិវិធី៕
Source: Kampuchea Thmey Daily
0 Comments