ភ្នំពេញ ៖ រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន ផ្តោតការយកចិត្តទុកដាក់ខ្ពស់បំផុត ក្នុងការលើកស្ទួយតួនាទីស្ត្រី។ នេះជាប្រសាសន៍លើកឡើងរបស់លោកជំទាវ ឃួន សុដារី អនុប្រធានទី២រដ្ឋសភា នៃព្រះរាជាណាចក្រកម្ពុជា នៅក្នុងពិធីសំណេះសំណាលជាមួយប្រជាពលរដ្ឋ ជាពិសេសបងប្អូននារីក្នុងស្រុកលើកដែកប្រមាណជាង៣០០នាក់ ក្នុងពិធីអបអរសាទរខួបលើកទី ១០៨ ទិវាអន្តរជាតិ ៨មីនា ក្រោមប្រធានបទ “ការលើកកម្ពស់សមភាពយេនឌ័រ និងការគាំពារសង្គមដើម្បីអភិវឌ្ឍន៍ធនធានមនុស្ស” កាលពីថ្ងៃទី០៦ ខែមីនា ឆ្នាំ២០១៩ នៅស្រុកលើកដែក ខេត្តកណ្តាល។
លោកជំទាវអនុប្រធានបានបញ្ជាក់ថា យុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា គឺការពង្រឹងសមភាពយេនឌ័រ និងការគាំពារសង្គម ពិតជាមានសារៈសំខាន់ខ្លាំងណាស់ដើម្បីលើកស្ទួយតួនាទីស្ត្រី ដែលជាឆ្អឹងខ្នងនៃគ្រួសារ សេដ្ឋកិច្ច និងសង្គមជាតិ។ ការលើកកម្ពស់សមភាពយេនឌ័រ គឺដើម្បីពង្រឹងភាពអង់អាចដល់ស្ត្រី និងក្មេងស្រីកម្ពុជា ជាកិច្ចការអាទិភាពមួយដែលរាជរដ្ឋាភិបាលកម្ពុជាបាន និងកំពុងផ្តោតការយកចិត្តទុកដាក់ខ្ពស់ ក្នុងពេលកន្លងមក ក៏ដូចជាក្នុងពេលបច្ចុប្បន្ន និងសម្រាប់អនាគត ដើម្បីស្រី្តមានសិទ្ធិស្មើភាពជាមួយបុរស ក្នុងការរួមចំណែកអភិវឌ្ឍគ្រួសារ សេដ្ឋកិច្ច និងសង្គមជាតិ។ លោកជំទាវអនុប្រធានទី ២ នៃរដ្ឋសភា ពន្យលថា ការអបអរសាទរទិវាអន្តរជាតិនារី ៨ មីនា ត្រូវបានពិភពលោកប្រារព្ធធ្វើឡើងជារៀងរាល់ឆ្នាំ ដើម្បីរំលឹកនូវការតស៊ូ និងគំរូវីរភាពរបស់នារីៗក្នុងការទាមទារសិទ្ធិសេរីភាព និងគេចផុតពីទង្វើជិះជាន់នានា។ ឆ្នាំនេះរាជរដ្ឋាភិបាលកម្ពុជាបានប្រារព្ធពីធីអបអរសាទរទិវាអន្តរជាតិនារី ៨ មីនា ឆ្នាំ២០១៩ ក្រោមប្រធានបទ “ការលើកកម្ពស់សមភាពយេនឌ័រ និងការគាំពារសង្គមដើម្បីអភិវឌ្ឍន៍ធនធានមនុស្ស” ពិតជាមានសារៈសំខាន់ ក្នុងការលើកកម្ពស់ស្ថានភាពស្ត្រីកម្ពុជា ក្នុងការរួមចំណែកកសាងគ្រួសារ កសាងសេដ្ឋកិច្ចនិងសង្គមប្រកប ដោយជោគជ័យក្នុងនាមជាពលរដ្ឋដ៏ល្អ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។ រាជរដ្ឋាភិបាលបានកំពុងអនុវត្តគោលនយោបាយ គាំពារសង្គម ដែលបានចាប់ផ្តើមអនុវត្តមុនគេចំពោះស្ត្រី ដែលជាកម្មការិនីមានផ្ទៃពោះ។ ជាពិសេសទៀតនោះគឺក្នុងពេលសម្រាលកូនស្ត្រីបានឈប់សម្រាករយៈពេល ៣ខែ និងទទួលបានប្រាក់ខែ១២០% បូកជាមួយនឹងការជួយឧបត្ថម្ភរបស់រាជរដ្ឋាភិបាល ចំនួន ៤០ ម៉ឺនរៀល សម្រាប់កូនម្នាក់ និងការកើតកូនភ្លោះបាន ២ នាក់ ចំនួន ៨០ ម៉ឺនរៀលនិង ៣ នាក់ចំនួន ១ លាន ២០ ម៉ឺនរៀល បូកនឹងជំនួយឧបត្ថម្ភរបស់ខ្ញុំ ៥ លាន រៀលថែមទៀត។
លោកជំទាវ ក៏បានពាំនាំសេចក្តីនឹករលឹក និងប្រសាសន៍ដ៏មានអត្ថន័យរបស់សម្តេចតេជោ ហ៊ុន សែន ធ្វើការអត្ថាធិប្បាយក្នុងពិធីអបអរសាទរទិវាអន្តរជាតិនារី ៨មីនា ខួបលើកទី១០៨ ដែលប្រព្រឹត្តទៅនៅនៅមជ្ឈមណ្ឌលកោះពេជ្រ កាលពីថ្ងៃទី ៥ ខែមីនា ឆ្នាំ២០១៩ ដែលសម្តេចបានបញ្ជាក់ថា ចាប់ពីពេលនេះតទៅកម្ពុជានឹងប្រារព្ធពិធីអបអរសាទរទិវាអន្តរជាតិនារី ៨មីនា ឱ្យបានមុនថ្ងៃ ៨ (មីនា) ដើម្បីទុកថ្ងៃទី ៨ មីនា ជាថ្ងៃឈប់សម្រាក និងកម្សាន្ត ទៅតាមការចង់បានរបស់ស្ត្រីគ្រប់រូប។ បន្ទាប់មកទៀតក្រុមហ៊ុនទាំងឡាយណា ដែលមិនទាន់បានចុះបញ្ជី ត្រូវតែចុះបញ្ជី ដើម្បីធានាថា កម្មករបានទទួលផលប្រយោជន៍ពីគោលនយោបាយគាំពារសង្គម ដោយទទួលបាននូវការពិនិត្យព្យាបាលដោយឥតគិតថ្លៃ ពិសេសកម្មការិនី ដែលធ្វើការនៅកន្លែងទទួលបាននូវអត្ថប្រយោជន៍ពីគោលនយោបាយគាំពារសង្គម របស់រាជរដ្ឋាភិបាលសម្រាប់ស្ត្រីមានផ្ទៃពោះ និងឆ្លងទន្លេ។ សម្តេចតេជោ ហ៊ុន សែន បានជំរុញឲ្យថ្នាក់ដឹកនាំគ្រប់ក្រសួង ស្ថាប័ន គួរគប្បីធ្វើការឲ្យបានញឹកញាប់បន្តិចជាមួយនឹងក្របខណ្ឌជាស្ត្រី ដោយប្រើប្រាស់ក្នុងមួយឆ្នាំ ២-៣ ពេល ដើម្បីជួបស្ត្រី និងស្តាប់មតិរបស់ពួកគាត់។ សម្តេចតេជោ ហ៊ុន សែន បានអំពាវនាវឲ្យមានការយកចិត្តទុកដាក់យោគយល់អធ្យាស្រ័យចំពោះស្ដ្រី ដែលធ្វើការតាមផ្ទះ ហើយថ្មីៗនេះទៀតសម្តេចតេជោ ហ៊ុន សែន បានបង្កើតក្រុមមេធាវី តេជោសែន កំពុងចាប់ផ្ដើមដំណើរការជួយដល់ស្ដ្រីក្រីក្រ និងស្ដ្រីពិរុទ្ធជន ដោយផ្តោតសំខាន់លើទណ្ឌិតជាស្ដ្រីឱ្យទទួលបានការលើកលែងទោស ដោយបានណែនាំទៅក្រសួងយុត្តិធម៌ ក្រសួងកិច្ចការនារី សហការជាមួយផ្នែកពន្ធនាគារ ពិនិត្យមើលអ្នកដែលជាប់ទោសទណ្ឌិតជាស្ដ្រី អ្នកណាខ្លះគប្បីទទួលបានការលើកលែងទោស។ គោលដៅទី ២ សម្រាប់ស្ដ្រីជាពិរុទ្ធជន ដែលមិនទាន់ទទួលបានការកាត់ទោសដោយសារតែខ្វះមេធាវី គឺត្រូវតែជំរុញការប្រើប្រាស់ឲ្យអស់សក្ដានុពល ដែលមួយភាគក្រសួងកិច្ចការនារី ក្រសួងយុត្តិធម៌ តាមរយៈប្រាក់ឧបត្ថម្ភពីរាជរដ្ឋាភិបាល និងបំពេញបន្ថែមដោយក្រុមមេធាវីរបស់សម្តេចតេជោ ដើម្បីទៅជួយការពារក្ដីសម្រាប់ស្ដ្រីក្រីក្រ៕
Source: Kampuchea Thmey Daily
0 Comments