នគរបាល​សេដ្ឋកិច្ច​ រឹបអូស​កាបូប​ស្រី​ក្លែងក្លាយ​បាន​២៥៤​កាបូប

ភ្នំពេញ ៖ កាបូប​ពេញនិយម​របស់​ស្ត្រី​ម៉ាក CHARLES & KEITH ជា​ផលិតផល​របស់​ក្រុមហ៊ុន​មួយ កាលពី​រសៀល​ថ្ងៃទី​៥ មិនា ត្រូវ​បាន​កម្លាំង​សម​ត្ថ​កិច្ច​នាយកដ្ឋាន​នគរបាល​ប្រ​ឆាំ​ងបទល្មើស​សេដ្ឋកិច្ច​ក្រសួងមហាផ្ទៃ សហការ​ជាមួយ​កម្លាំង​ជំនាញ នៃ​ការិយាល័យ​នគរបាល​ប្រឆាំង​បទល្មើស​សេដ្ឋកិច្ច​រាជធានី​ភ្នំពេញ ចុះ​ដកហូត​បាន​ចំនួន​ប្រមាណ​២៥៤​កាបូប ដែល​ឈ្មួញ​នាំ​ចូល​មក​លក់ សុទ្ធតែ​ជា​របស់​ក្លែង​ម៉ាក​សញ្ញា។



កិច្ច​ចុះ​បង្ក្រាប​ផលិតផល​(​កាបូប​)​ក្លែងក្លាយ​នោះ គឺ ដឹកនាំ​កម្លាំង​ដោយ​លោក​ឧត្តមសេនីយ៍​ទោ ឡុង ស្រេង ក្រោម​ការ​ចង្អុលបង្ហាញ​ដោយ​លោក​ឧ​ត្ត​ម​សេនីយ៍​ឯក ចាន់ វ៉ាន់​ធឿន ប្រធាន​នាយកដ្ឋាន​នគរបាល​ប្រឆាំង​បទល្មើស​សេដ្ឋកិច្ច ដោយមាន​ការ​សម្របសម្រួល​ពី​លោក វង្ស ប៊ុន​វិសុទ្ធ ព្រះរាជអាជ្ញា​រង នៃ​អយ្យការ​អម​សាលាដំបូង​រាជធានី​ភ្នំពេញ និង​អាជ្ញាធរ​មូលដ្ឋាន ដែល​បាន​ធ្វើឡើង​នៅផ្ទះ​លេខ​៣៦០ ផ្លូវ​១៩៣ សង្កាត់​អូឡាំពិក ខណ្ឌចំការមន។



ការចុះ​បង្ក្រាប​នោះ​ លោក​ឧ​ត្ត​ម​សេនីយ៍​ទោ ឡុង ស្រេង បាន​បង្ហោះ​ព័ត៌មាន​នៅក្នុង​គេហទំព័រ​ហ្វេ​ស​ប៊ុ​ក​ផ្ទាល់ខ្លួន​របស់​លោក​ថា ផលិតផល​កាបូប​ម៉ាក CHARLES&KEITH និង​Pedro ក្លែងក្លាយ ត្រូវ​បាន​ចាប់​យក​ពី​ឈ្មួញ​រក​ស៊ី​ទុច្ចរិត​ចំនួន​២៥៤​កាបូប​នេះ គឺ​ធ្វើ​ឡើង​តាម​ពាក្យបណ្ដឹង​របស់​ក្រុមហ៊ុន MW.METROPOLITAN INTERNATIONAL BRANDS CO.LTD ។ ក្រោយពី​ដកហូត​កាបូប​២៥៤​នោះ សម​ត្ថ​កិច្ច​បាន​ប្រគល់​ឲ្យទៅ​ក្រុមហ៊ុន​ដើមបណ្តឹង ដើម្បី​បន្ត​នីតិវិធី៕

Source: Kampuchea Thmey Daily