ភ្នំពេញ ៖ ក្រសួងមហាផ្ទៃ បានឲ្យរដ្ឋបាលរាជធានី-ខេត្ត ជួយសម្របសម្រួល និងបង្កលក្ខណៈងាយស្រួលក្នុងការចេញលិខិតបញ្ជាក់ផ្សេងៗជូនដល់បេក្ខជនឈរឈ្មោះបោះឆ្នោតរបស់គណបក្សនយោបាយ សម្រាប់យកទៅប្រើប្រាស់ក្នុងការចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សា នេះបើយោងតាមលិខិតរបស់ក្រសួងមហាផ្ទៃ ចុះថ្ងៃទី០៤ ខែមីនា ឆ្នាំ២០១៩។
លិខិតរបស់ក្រសួងមហាផ្ទៃ ដែលចុះហត្ថលេខាដោយសម្តេចក្រឡាហោម ស ខេង បានបញ្ជាក់ថា គណៈកម្មការរាជធានី ខេត្ត រៀបចំការបោះឆ្នោត នឹងចាប់ផ្ដើមចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៣ ឆ្នាំ២០១៩ ចាប់ពីថ្ងៃទី០៧ ដល់ថ្ងៃទី១១ ខែមីនា ឆ្នាំ២០១៩។ ដើម្បីធានាឲ្យដំណើរការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សារាជធានី ខេត្ត ប្រព្រឹត្តទៅដោយរលូនស្របតាមប្រតិទិនរបស់ គ.ជ.ប ក្រសួងមហាផ្ទៃបានស្នើឲ្យរដ្ឋបាលរាជធានី ខេត្ត ណែនាំដល់អាជ្ញាធរ ឃុំ សង្កាត់ ជួយសម្របសម្រួល និងបង្កលក្ខណៈងាយស្រួលក្នុងការចេញលិខិតបញ្ជាក់ផ្សេងៗជូនដល់បេក្ខជនឈរឈ្មោះបោះឆ្នោត របស់គណបក្សនយោបាយ ដែលបានចុះបញ្ជីត្រឹមត្រូវតាមច្បាប់ស្តីពីគណបក្សនយោបាយសម្រាប់យកទៅប្រើប្រាស់ក្នុងការចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សា តាមច្បាប់ស្ដីពីការបោះឆ្នោត បទបញ្ជា និងនីតិវិធី សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត អាណត្តិទី៣ ឆ្នាំ២១០៩ខាងមុខ។
សូមបញ្ជាក់ថា ការបោះឆ្នោតជ្រើសរើសក្រុមប្រឹក្សា អាណត្តិទី៣ នឹងប្រព្រឹត្តទៅនៅថ្ងៃទៅ២៦ ខែឧសភា ឆ្នាំ២០១៩ ហើយការចុះឈ្មោះអ្នកបោះឆ្នោត បានចាប់ផ្តើមដំណើរ កាលពីថ្ងៃទី០៤ ដល់ថ្ងៃទី១៩ ខែមីនា ឆ្នាំ២០១៩ មានរយៈពេល១៣ថ្ងៃ ដោយមិនរាប់ថ្ងៃអាទិត្យ និងថ្ងៃបុណ្យផ្លូវការ។ ក្នុងនោះការិយាល័យចុះឈ្មោះបោះឆ្នោតចំនួន១,៦៤៦ នៅទូទាំងប្រទេសត្រូវបានបើកព្រមៗគ្នាក្នុងថ្ងៃតែមួយ។ អ្នកបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សា គឺជាសមាជិកក្រុមប្រឹក្សាឃុំ សង្កាត់ នៅក្នុងមុខតំណែង ដែលមានសមាជិកសរុបចំនួន១១,៥៧២ នាក់ ទូទាំងប្រទេស។
លោក មាន សទិ សមាជិក គ.ជ.ប បានបញ្ជាក់នៅក្នុងកិច្ចប្រជុំកាលពីថ្ងៃទី០៥ ខែមីនា ឆ្នាំ២០១៩ ថា គណបក្សនយោបាយដែលមានបំណងចូលរួមប្រកូតប្រជែងក្នុងការបោះឆ្នោតជ្រើសរើសក្រុមប្រឹក្សា ត្រូវចាប់ផ្តើមដាក់ពាក្យសុំចុះបញ្ជីគណបក្សនយោបាយឈរឈ្មោះ បោះឆ្នោតនៅគណៈកម្មការរាធានី ខេត្តរៀបចំការបោះឆ្នោត (គធ.ខប) យ៉ាងតិច៨០ ថ្ងៃ មុនកាលបរិច្ឆេទនៃការបោះឆ្នោត មានន័យថា ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ មានរយៈពេលតែ ៥ ថ្ងៃ ប៉ុណ្ណោះ ចាប់ផ្តើមពីថ្ងៃទី៧ ដល់ថ្ងៃទី១១ ខែមីនា ឆ្នាំ២០១៩។
ចំណែក កែវ ផល្លា ទីប្រឹក្សា គ.ជ.ប និងជាប្រធាននាយកដ្ឋានសេវាកម្មច្បាប់ និងវិវាទកម្ម បានអះអាងថា រហូតមកដល់ពេលនេះ គ.ជ.ប មិនអាចសន្និដ្ឋានបានថា មានគណបក្សនយោបាយចំនួនប៉ុន្មាន នឹងដាក់ពាក្យចូលរួមប្រកួតប្រជែងទេ ប៉ុន្តែមានគណបក្សនយោបាយចំនួន ៤ តែងតែទាក់ទងមកមន្ត្រីជំនាញ ដើម្បីសួរព័ត៌មាន ហើយគណបក្សនយោបាយទាំង៤ នោះ រួមមាន គណបក្សប្រជាជនកម្ពុជា, គណបក្សហ៊្វុនស៊ិនប៉ិច, គណបក្សខ្មែររួបរួមជាតិ និងគណបក្សយុវជនកម្ពុជា៕
Source: Kampuchea Thmey Daily
0 Comments