ភ្នំពេញ ៖ លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា (ស៊ីម៉ាក់)បានឲ្យដឹងថា នៅក្នុងឆ្នាំ២០១៩នេះ ស៊ីម៉ាក់ មានផែនការបោសសំអាតដី ដែលមានបញ្ហាមីន ឲ្យបានចំនួន១០២គីឡូម៉ែត្រការ៉េ។
ថ្លែងនៅក្នុងកិច្ចប្រជុំក្រុមការងារ ស្តីពីការពង្រឹងការងារប្រតិបត្តិការ តាមបណ្តាលកងឯកភាពកំចាត់មីន និងលើកទិសដៅ សម្រាប់ត្រីមាសទី១ ឆ្នាំ២០១៩ ដែលរៀបចំធ្វើឡើងនៅទីបញ្ជាការ ស៊ីម៉ាក់ រាជធានីភ្នំពេញកាលពីថ្ងៃទី២៨ ខែកុម្ភៈ ឆ្នាំ២០១៩លោក ហេង រតនា បានឲ្យដឹងថា ខែមករា ឆ្នាំ២០១៩ កន្លងទៅនេះ អង្គភាពស៊ីម៉ាក់ បានធ្វើការបោសសម្អាតផ្ទៃដី បានចំនួន៦.៩៥គីឡូម៉ែត្រការ៉េ ស្មើនិង៨៦% នៃផែនការប្រចាំខែ និងរកឃើញ និងកម្ទេចចោលគ្រាប់មីន និងគ្រាប់យុទ្ធភណ្ឌមិនទាន់ផ្ទុះ គ្រប់ប្រភេទ សរុបចំនួន៣,៣៩៦គ្រាប់។
អគ្គនាយកស៊ីម៉ាក់រូបនេះ បានបន្ដទៀតថា ក្នុងនោះផងដែរ ក៏បានបោះស្លាកសញ្ញាព្រំចំការមីន បានប្រវែង ៧,៨៧០ម៉ែត្រ ក្នុងគោលបំណងឆ្លើយតប តាមសំណើអន្តរាគមន៍ បានចំនួន៣៥៧សំណើ។
ឆ្នាំ២០១៨កន្លងទៅនេះ ស៊ីម៉ាក់រកឃើញ និងកំទេចគ្រាប់មីន និងយុទ្ធភណ្ឌមិនទាន់ផ្ទុះចំនួន៤៥,៤៩៣គ្រាប់ បោះស្លាកសញ្ញាព្រំចំការមីន បានប្រវែង៣៤៦,៧៥៧ម៉ែត្រ ឆ្លើយតបតាមសំណើ (EOD Calls) ៣,៦៨១សំណើនិងបោសសំអាតផ្ទៃដីបានទំហំ ៨៨,៦៦៦,៥៤៦ម៉ែត្រការ៉េ។
ជាមួយគ្នានេះដែរ ស៊ីម៉ាក់បានធ្វើការអប់រំដល់ប្រជាពលរដ្ឋបានចំនួន៦៦១,៩២៤នាក់ ក្នុងនោះបុរសចំនួន២២៦,៦៤២នាក់, ស្ត្រីចំនួន២៤០,២៧៦នាក់, កុមារចំនួន១៩៤,៨០៦នាក់ និងខ្នងផ្ទះចំនួន១០៨,៦១២ផ្ទះ។ អប់រំប្រជាពលរដ្ឋ ដែលប្រើប្រាស់គ្រឿងចក្រធុនធ្ងន់ បានចំនួន៥,២២៤នាក់, អ្នកពង្រីកដីកសិកម្ម ក្នុងតំបន់មីនចំនួន៣,១០០នាក់, អ្នកក្រីក្រប្រឈមនឹងគ្រោះថ្នាក់មីនចំនួន៤,១៣០នាក់, អប់រំជនអ្នកប្រព្រឹត្តិផ្ទាល់ចំនួន ២១១នាក់។
មិនតែប៉ុណ្ណោះបានធ្វើការអប់រំនិងបណ្តុះបណ្តាលវគ្គរំលឹកដល់បណ្តាញមីន/គ្រាប់ចំនួន១៥០នាក់ និងបានបើកយុទ្ធនាការអប់រំប្រជាពលរដ្ឋនៅតំបន់ងាយរងគ្រោះ បានចំនួន៦៤,៣៨០នាក់ ស្ត្រីចំនួន២៥,៥៥៦នាក់ និងកុមារចំនួន ១២,៤២៩នាក់។
ចំពោះការងារអភិវឌ្ឍជួយជនរងគ្រោះដោយសារមីនវិញក្នុងឆ្នាំ២០១៨កន្លងមក គម្រោងអភិវឌ្ឍន៍ជំនួយពីរដ្ឋាភិបាលជប៉ុន បាននឹងកំពុងកសាងផ្លូវលំជនបទ ចំនួន៤ខ្សែ សរុបប្រវែង១៥,១៧០ម៉ែត្រ និងស្ពានបេតុង១កន្លែង ប្រវែង១១ម៉ែត្រ។ជួយសាងសង់អគារសាលាបឋមសិក្សា១ខ្នង និងស្រះទឹកចំនួន៣កន្លែង សង់សំណង់បង្ហៀរទឹកចំនួន៣ លូប្រអប់ចំនួន៤ លូទោលចំនួន៥ និងលូភ្លោះចំនួន៤។
ជាមួយគ្នានេះដែរ ជួយបណ្តុះបណ្តាលជំនាញកសិកម្ម ដល់ប្រជាពលរដ្ឋមានស្តីពីរបៀបដាំដំណាំស្រូវ ដំណាំកាហ្វេ ការចិញ្ចឹមមាន់ការបណ្តុះផ្សិត និងការធ្វើសួនបន្លែ តាមផ្ទះ-ល-បានចំនួន១០វគ្គ ស្មើនឹងចំនួន៦៣០គ្រួសារ។
នៅឆ្នាំ២០១៨មានជនរងគ្រោះដោយសារគ្រាប់មីននិងយុទ្ធភណ្ឌមិនទាន់ផ្ទុះចំនួន៥៨នាក់ដែលចំនួននេះមានចំនួនប្រហាក់ប្រហែលទៅនឹងឆ្នាំ២០១៧កន្លងទៅដែរ។ប៉ុន្តែគ្រោះថ្នាក់ដោយសារមីន មានការកើនឡើងលើសពីឆ្នាំចាស់ចំនួន៦ករណី។
យោងតាមផែនការយុទ្ធសាស្ត្រជាតិសកម្មភាពមីន ឆ្នាំ២០១៨-២០២៥បានឲ្យដឹងថា នៅកម្ពុជាមានផ្ទៃដីសង្ស័យមានផលប៉ះពាល់ដោយសារមីន គ្រាប់បែកចង្កោម និងសំណល់ជាតិផ្ទុះពីសង្គ្រាមប្រមាណជាង ១៩៧០គីឡូម៉ែត្រការ៉េ ក្នុងនោះប្រមាណ ៨៧៧គីឡូម៉ែត្រការ៉េ ជាដីមានផលប៉ះពាល់ខ្ពស់ដោយសារមីន ៤៩៩គីឡូម៉ែត្រការ៉េ ជាដីប៉ះពាល់ដោយគ្រាប់បែកចង្កោម និង ៣៣៣គីឡូម៉ែត្រការ៉េ ជាដីមានផលប៉ះពាល់ដោយសារសំណល់ជាតិផ្ទុះពីសង្គ្រាម។
ផ្ទៃដីមានគ្រាប់មីននិងយុទ្ធភណ្ឌមិនទាន់ផ្ទុះជិត២ពាន់គីឡូម៉ែត្រការ៉េនេះកម្ពុជាត្រូវការថវិកាប្រមាណ ៤០៦លានដុល្លារ សម្រាប់បោះសំអាតរយៈពេលពីឆ្នាំ ២០១៨ ដល់ឆ្នាំ២០២៥ខាងមុខ៕
Source: Kampuchea Thmey Daily
0 Comments