ក្រុមបាល់ទាត់នារីក្រោមអាយុ១៩ឆ្នាំរបស់កម្ពុជា (U19) ត្រូវប៉ះក្រុមសឹង្ហបុរី ក្នុងប្រកួតបើកឆាកពូល B ក្នុងកម្មវិធីបាល់ទាត់នារីអាស៊ាន-ជប៉ុន JENESYS 2018 Japan-ASEAN Youth Sports Exchange (Women’s Football U19) នៅប្រទេសជប៉ុន នៅថ្ងៃសៅរ៍ ទី២ ខែមីនា ឆ្នាំ២០១៩ នេះលើទីលានZanpa Point Ball Park/Yomitan Village Athletics Field។
ពានរង្វាន់ JENESYS 2018 Japan-ASEAN Youth Sports Exchange មានក្រុមចូលរួមចំនួន១០ក្រុមដោយបែងចែកជា២ពូលផ្សេងគ្នា ដោយក្នុងនោះពូល A មានOkinawa Prefecture High School Women's Select Team របស់ជប៉ុន,U-19 នារីថៃ,U-19 នារីជប៉ុន,U-19 នារីវៀតណាម,U-19 នារីមីយ៉ាន់ម៉ា។ ចំណែកពូល B មានក្រុមVicsale Okinawa FC Nabiita Youth របស់ជប៉ុន,U-19 នារីឡាវ,U-19 នារីម៉ាឡេស៊ី,U-19 នារីសឹង្ហបុរី,U-19 នារីកម្ពុជា។ កម្មវិធីប្រកួតនេះធ្វើឡើងចាប់ពីថ្ងៃទី២ ដល់ទី៦ ខែមីនា ឆ្នាំ២០១៩ នៅទីក្រុង Okinawa។
សម្រាប់ប្រកួតបើកឆាកក្រុមនៅថ្ងៃសៅរ៍ ទី២ ខែមីនា នេះក្រុម U-19 នារីជប៉ុន ត្រូវប៉ះក្រុមថៃ នៅម៉ោង១០និង៣០នាទីព្រឹក (ម៉ោង១២និង៣០នាទីថ្ងៃត្រង់នៅកម្ពុជា) លើទីលានZanpa Point Ball Park/Yomitan Village Athletics Field ខណៈ១គូទៀតក្រុម U-19នារីមីយ៉ាន់ម៉ា ប៉ះក្រុមវៀតណាម។ ចំណែកពូល B គឺក្រុម U-19ម៉ាឡេស៊ី ប៉ះក្រុមឡាវ នៅម៉ោង២រសៀល (ម៉ោង៤ល្ងាចនៅកម្ពុជា) និងក្រុមកម្ពុជា ប៉ះសឹង្ហបុរី នៅម៉ោងដំណាលគ្នា លើទីលានជាមួយគ្នា។
សហព័ន្ធកីឡាបាល់ទាត់កម្ពុជា (ស.ប.ក) សម្រេចតែងតាំងអ្នកគ្រូ ឈឺន នីផា អ្នកគ្រូបង្វឹកក្រុមកីឡាករអាយុក្រោម១៥ភ្នំពេញក្រោន ឲ្យធ្វើជាគ្រូបង្គោលដឹកនាំក្រុមនារីជម្រើសជាតិអាយុក្រោម១៩ឆ្នាំ ដើម្បីចេញទៅប្រកួតលើឆាកអន្តរជាតិលើកនេះដែលចេញដំណើរទៅតាំងពីយប់ថ្ងៃអង្គារ សប្ដាហ៍នេះម្ល៉េះ៕
Source: Kampuchea Thmey Daily
0 Comments