ភ្នំពេញ ៖ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈបានស្នើឲ្យធនាគារអភិវឌ្ឍន៍អាស៊ីដែលហៅកាត់ថា ABDជួយរៀបចំប្រព័ន្ធទំនើបកម្មនៃសេវាសាធារណៈនៅក្រសួងដើម្បីបម្រើសេវាដល់ប្រជាពលរដ្ឋប្រកបដោយប្រសិទ្ធភាពខ្ពស់។
លោក បណ្ឌិត អ៊ិតសំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈមានប្រសាសន៍ថា ការរៀបចំប្រព័ន្ធទំនើបកម្មនៃសេវាសាធារណៈនៅក្រសួងតាមរយៈប្រព័ន្ធអនឡាញដែលប្រើប្រាស់តាមបច្ចេកវិទ្យាទំនើបនេះ គឺដើម្បីបង្កលក្ខណៈងាយស្រួលដល់ប្រជាពលរដ្ឋក្នុងការមកទទួលសេវាផ្សេងៗនៅក្រសួងប្រកបដោយតម្លាភាព រហ័សទាន់ចិត្តនិងទាន់ពេលវេលាដោយមិនចាំបាច់រង់ចាំយូរឡើយ។
ថ្លែងក្រោយជំនួបពិភាក្សាការងាររវាងលោក បណ្ឌិត អ៊ិតសំហេង ជាមួយលោកស្រី អាយ៉ាគុ អ៊ីណាហ្គាគិ នាយកផ្នែកអភិវឌ្ឍន៍សង្គមនិងមនុស្សនៃធនាគារអភិវឌ្ឍន៍អាស៊ីកាលពីព្រឹកថ្ងៃទី១មីនានៅទីស្តីការក្រសួង លោក ងុយ រិទ្ធ នាយករងខុទ្ទកាល័យ លោករដ្ឋមន្ត្រីក្រសួងការងារបានឲ្យដឹងថា នៅក្នុងជំនួបនោះ លោករដ្ឋមន្ត្រីក៏បានស្នើឲ្យតំណាងធនាគារអភិវឌ្ឍន៍អាស៊ីយកចិត្តទុកដាក់គាំពារនិងជួយបណ្តុះបណ្តាលជំនាញបន្ថែមដែលឆ្លើយតបទៅនឹងទីផ្សារការងារដល់ពលករទេសន្តរប្រវេសន៍ដែលត្រឡប់មកពីធ្វើការនៅក្រៅប្រទេសដើម្បីឲ្យពួកគេទទួលបានការងារធ្វើសម្រាប់ចិញ្ចឹមជីវិត។
ជាមួយគ្នានេះដែរ លោករដ្ឋមន្ត្រីបានស្នើឲ្យABDជួយពង្រឹងលក្ខខណ្ឌការងារនៅកន្លែងធ្វើការតាមរោងចក្រសហគ្រាសដើម្បីធានាឲ្យបងប្អូនកម្មករនិយោជិតទទួលបាននូវសិទ្ធការងារកាន់តែល្អប្រសើរថែមទៀតនិងជួយផ្តល់ការគាំទ្រលើសកម្មភាពរបស់ទីភ្នាក់ងារជាតិមុខរបរនិងការងារក្នុងការចូលរួមបង្កើនការផ្សព្វផ្សាយស្តីពីការងារផ្សេងៗដល់ប្រជាពលរដ្ឋឲ្យកាន់តែទូលំទូលាយថែមទៀតនៅទូទាំងប្រទេសដើម្បីទទួលបានព័ត៌មានគ្រប់ជ្រុងជ្រោយនិងទទួលបានការងារធ្វើគ្រប់ៗគ្នា។
លោក ងុយ រិទ្ធ បានបន្តថា ជាការឆ្លើយតបតំណាងធនាគារពិភពលោក លោកស្រី អាយ៉ាគុ អ៊ីណាហ្គាគិ បានគាំទ្រចំពោះសំណើរបស់លោករដ្ឋមន្ត្រី ព្រោះវាឆ្លើយតបទៅនឹងផែនការយុទ្ធសាស្ត្ររបស់ABDឆ្នាំ២០៣០ខាងមុខនេះហើយ លោកស្រីបានសន្យាថា នឹងយកសំណើទាំងនេះ ទៅពិចារណានិងរៀបចំជាយុទ្ធសាស្ត្រដើម្បីអនុវត្តការងារទាំងនេះប្រកបដោយរលូននិងជោគជ័យសំដៅលើកកម្ពស់វិស័យការងារនៅប្រទេសកម្ពុជាកាន់តែប្រសើរឡើងថែមទៀត។
លោកស្រីបានបន្តថា ផែនការយុទ្ធសាស្ត្រ៥ឆ្នាំបន្ទាប់របស់ខ្លួន ដើម្បីផ្តល់ការជួយគាំទ្រដល់វិស័យការងារ ដែលស្របតាមអតិភាពទាំង៥របស់ផែនការយុទ្ធសាស្ត្ររបស់ក្រសួងការងារ និងបណ្តុះបណ្តាលវិជ្ជាជីវៈ ដូចជា បន្តពង្រឹងវិស័យបណ្តុះបណ្តាល ក្នុងការបណ្តុះបណ្តាលធនធានមនុស្ស , ប្រាក់ឈ្នួលអប្បបរមា, សុខភាព និងសុវត្ថិភាពការងារ ,ទីភ្នាក់ងារជាតិមុខរបរ និងការងារ, ទេសន្តប្រវេសន៍ការងារ, បេឡាជាតិរបបសន្តិសុខសង្គម និងការធ្វើប្រព័ន្ធទំនើបកម្មនៃសេវាសាធារណៈ ,ស្វែងរកមូលនិធិជួយធានាដល់និរន្តភាព និងឯករាជ្យភាពរបស់ក្រុមប្រឹក្សាអាជ្ញាកណ្តាល។
គួរបញ្ជាក់ថា ធនាគារអភិវឌ្ឍន៍អាស៊ីនិងក្រសួងការងារនិងបណ្តុះបណ្តាលវិជ្ជាជីវៈនឹងចាប់ផ្តើមអនុវត្តគម្រោងកិច្ចសហប្រតិបត្តិការរួមគ្នាមួយដែលមានឈ្មោះថា ជំនាញដើម្បីប្រកួតប្រជែងនៅខែតុលាឆ្នាំ២០១៩ខាងមុខនេះមានរយៈពេល៥ចាប់ពីឆ្នាំ២០១៩-២០២៣ដោយចំណាយថវិកាចំនួន៨៧លានដុល្លារអាមេរិកដើម្បីធ្វើការបណ្តុះបណ្តាលជំនាញជាន់ខ្ពស់ដល់យុវជនកម្ពុជាឆ្លើយតបតាមទីផ្សារក្នុងស្រុកនិងតំបន់។
លោករដ្ឋមន្ត្រីបានថ្លែងអំណរគុណដល់ ADB ដែលបានចូលរួមចំណែកក្នុងការជួយដល់វិស័យសេដ្ឋកិច្ច-សង្គម តាមរយៈការគាំទ្រនេះ ក៏ជាផ្នែកមួយធ្វើឲ្យកម្ពុជាទទួលបានវឌ្ឍនភាពកំណើនសេដ្ឋកិច្ចជាមធ្យម៧ភាគរយប្រចាំឆ្នាំ ហើយ និងអាចសម្រេចតាមគោលដៅរបស់ខ្លួននៅក្នុងការក្លាយជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០។
នៅក្នុងជំនួបនោះលោករដ្ឋមន្ត្រីបានលើកឡើងបន្តថា សេដ្ឋកិច្ចកម្ពុជា នឹងនៅតែអាចរក្សានូវនិរន្តភាពនៃកំណើនរបស់ខ្លួនបើទោះបីជាមានបញ្ហាប្រឈមជា ដោយសារតែកត្តាខាងក្រៅ ច្រើនដូចជា សង្គ្រាមពាណិជ្ជកម្ម ការប្រកួតប្រជែងកាន់តែតឹងតែង បដិវត្តឧស្សាហកម្ម៤.០ ប៉ុន្តែកម្ពុជាក៏អាចមានលទ្ធភាពក្នុងការក្សាភាពប្រកួតប្រជែង តាមរយៈការដាក់ចេញនូវកំណែទម្រង់នានា រួមទាំងការធ្វើពិពិធកម្មសេដ្ឋកិច្ចទៅវិស័យឧស្សាហកម្មផ្សេងទៀត ដែលមានវិស័យសក្តានុពលជាច្រើនក្នុងការស្របទាញកម្លាំងពលកម្មអតិពលកម្មជាច្រើនវិស័យទៀតក្រៅពីឧស្សាហកម្មកាត់ដេរ ដូចជាអេឡិចត្រូនិច កែច្នៃម្ហូបអាហារ សំណង់ និងអចលនទ្រព្យ កសិឧស្សាហកម្ម ទេសចរណ៍ ជាដើម។
លោកស្រីតំណាង ADB បានសំដែងនូវការអបអរសាទរ និងវាយតម្លៃខ្ពស់ចំពោះ រាជរដ្ឋាភិបាលកម្ពុជាក្នុងការកសាងមូលធនមនុស្សតាមរយៈការដាក់ចេញនៅក្នុងយុទ្ធសាស្ត្រចតុកោណ គោលនយោបាយជាតិអភិវឌ្ឍន៍ឧស្សាហកម្ម ជាពិសេសពាក់ព័ន្ធនឹងការបណ្តុះបណ្តាលវិជ្ជាជីវៈ ដូចមានចែងនៅក្នុងគោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ៕
Source: Kampuchea Thmey Daily
0 Comments