បាត់ដំបង ៖ គោលដៅដែលមានសិស្សសាលាឆ្លងកាត់ផ្លូវជាតិជាច្រើនកន្លែង កណ្តាលក្រុងបាត់ដំបង ត្រូវបានកម្លាំងសមត្ថកិច្ចចរាចរណ៍ ដាក់ពង្រាយដើម្បីពង្រឹងសណ្ដាប់ធ្នាប់ជូនពួកគាត់ បន្ទាប់ពីនាយការិយាល័យ ចរាចរណ៍ផ្លូវគោកថ្មីឡើងកាន់តំណែង។
គួរបញ្ជាក់ដែរថា បច្ចុប្បន្ននេះអត្រាគ្រោះថ្នាក់ចរាចរណ៍ គឺមានការកើនឡើងយ៉ាងខ្ពស់នៅទូទាំងប្រទេស ពិសេសគឺនៅក្នុងខេត្តបាត់ដំបងតែម្តង ដែលបញ្ហានេះគឺជាបន្ទុកដ៏ធ្ងន់ធ្ងរមួយរបស់រាជរដ្ឋាភិបាល ក្នុងការរិះរកនូវយុទ្ធសាស្ត្រដើម្បីកាត់បន្ថយអត្រាទាំងនេះ។
ទន្ទឹមគ្នានេះដែរ កម្លាំងការិយាល័យចរាចរណ៍ផ្លូវគោក ខេត្តបាត់ដំបង ក្រោមការដឹកនាំរបស់ លោក វរសេនីយ៍ទោ ឆៃ ច័ន្ទតារា ដែលទើបប្រកាសឡើងកាន់តំណែងថ្មី បានដាក់ផែនការដើម្បីចូលរួមចំណែកការងារសង្គម ក្នុងគោលបំណងកាត់បន្ថយនូវករណីគ្រោះថ្នាក់ចរាចរណ៍នេះដែរ។
ជាក់ស្តែងនៅប៉ុន្មានថ្ងៃនេះ លោកនាយការិយាល័យ បានប្រើប្រាស់កម្លាំងឲ្យធ្វើចរាចរណ៍ ដើម្បីសម្រួលសណ្ដាប់ធ្នាប់នៅតាមសាលាមួយចំនួន ក្នុងក្រុងបាត់ដំបង ដែលសាលាទាំងនេះ ស្ថិតនៅជាប់នឹងផ្លូវជាតិ ព្រោះវាអាចបង្កឲ្យមានករណីគ្រោះថ្នាក់ចរាចរណ៍បានយ៉ាងងាយ ប្រសិនបើខ្វះការប្រុងប្រយ័ត្ន។
លោកនាយការិយាល័យ ឆៃ ច័ន្ទតារា បានសង្កត់ធ្ងន់ថា លោកនឹងបន្ថែមកម្លាំងទៅគោលដៅចំនួន ២ទៀត ដែលសព្វថ្ងៃកំពុងប្រឈមតៅនឹងការកកស្ទះ គឺត្រង់ចំណុចខាងលិចផ្សារណាត់ ( ម្តុំផ្ទះល្វែងដូរលុយ ) និង មួយកន្លែងទៀត គឺនៅខាងកើតស្តុបមុនីវង្ស ត្រង់ចំណុចផ្លូវបែកជា៤ នៅពេលដែលសិស្សចេញពីរៀនម្តងៗ។
ជាចុងក្រោយ លោកនាយការិយាល័យ បានបន្ថែមផងដែរ ទៅលើប្រភេទរថយន្តធំ ដែលតែងតែលបលួចបើកបរចូលទៅក្នុងក្រុង ដោយគ្មានការអនុញ្ញាតពិសេស គឺបំពាននឹងច្បាប់ដែលបានចែងតែម្តង៕
Source: Kampuchea Thmey Daily
0 Comments