អ្នកប្រដាល់កម្ពុជា អេលីត សាន់ ដែលពីមុនគេមានឈ្មោះថា «លិញ ភារម្យ» ក្លិបឆ្មាសសែនសុខគុនខ្មែរ នឹងជួបប្រកួតសាកណ្ដាប់ដៃជាមួយអ្នកប្រដាល់ថៃចំណូលថ្មី នាយប់ថ្ងៃសៅរ៍ ទី ០៩ ខែមីនា ឆ្នាំ២០១៩នេះ នៅលើសង្វៀនTV5 ព្រែកកំពឹស។
អ្នកប្រដាល់ថៃដែលនឹងត្រូវជួបប្រកួតជាមួយអេលីត សាន់ នោះ មានឈ្មោះថា ហ្វា ម៉ៃ( Far Mai) ដែលជាអ្នកប្រដាល់ថៃចំណូលថ្មី តែគេជាអ្នកប្រដាល់ដែលមានផ្លែល្អ និងរឹងមាំ និងជាជើងខ្លាំងទម្ងន់៦០គីឡូក្រាមនៅស្រុកថៃ ។ នេះបើតាមអ្នកដឹកនាំកីឡាករថៃមកប្រកួតឲ្យដឹង។
ហ្វាម៉ៃ គេមិនធ្លាប់មកប្រកួតនៅភ្នំពេញទេកន្លងមក។ បើមើលពីប្រវត្តិប្រកួតរបស់គេ អ្នកប្រដាល់ថៃរូបនេះ មិនជាខ្លាំងប៉ុន្មាននោះឡើយ ព្រោះគេមានប្រវត្តិប្រកួតចំនួន៥១លើក ឈ្នះ៤០លើក ចាញ់១០លើក និង ស្មើ ០១លើក។ តាម លោក សេង កដិកា ប្រធានគ្រប់គ្រងកម្មវិធីប្រដាល់នៅ TV5 ថា ហ្វាម៉ៃ និងអេលីត សាន់ នេះ ពួកគេមានសមត្ថភាពប្រហាក់ប្រហែលគ្នាទេ ហើយមាឌ ក៏ប្រហែលគ្នាដែរ។
អេលីត សាន់ អ្នកប្រដាល់កម្ពុជាយើងវិញ គេជាជើងខ្លាំងស្រករក្រោយ គេមានកំណត់ត្រាប្រកួត៤៩លើក ឈ្នះ៣០លើក ចាញ់១៧លើក និងស្មើ០២លើក។ ទោះជាយ៉ាងណាក្តី សម្រាប់ការជួបគ្នារវាងអេលីត សាន់ និង ហ្វា ម៉ៃ នេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ?។
អ្នកប្រដាល់រូបនេះ ធ្លាប់ប្រកួតជាមួយថៃច្រើនលើកហើយ ដោយវាយឈ្នះច្រើនជាងចាញ់។ ស្ថានភាពប្រកួតរបស់អេលីត សាន់ នាពេលចុងក្រោយនេះ ឃើញថា មានការវិវត្តន៍ឡើងវិញគួរឲ្យកត់សម្គាល់។ ជាអ្នកប្រដាល់ដែលមានកណ្ដាប់ដៃលឿន រហ័ស និងខ្លាំងនោះ សាន់ វាយសម្រុកមិនបណ្តាក់ដៃនោះទេ ប៉ុន្តែគេឆាប់អស់ស៊ុហ្វ នៅចុងទឹក។
ទោះជាយ៉ាងណា សម្រាប់ការប្រកួតលើកនេះ អេលីត សាន់ គេមានទំនុកចិត្តអាចផ្ដួលអ្នកប្រដាល់ថៃហ្វា ម៉ៃ នេះបានមិនខាន ព្រោះថា សាន់ ឥឡូវនេះ ខ្លាំងជាងមុនដោយមានកម្លាំងសម្រុករឹងមាំ ដែលនេះជាកត្តាកំណត់ជ័យជម្នះរបស់ អេលីត សាន់។ ចាំមើល តើ អេលីត សាន់ អាចយកឈ្នះ ហ្វា ម៉ៃបានឬអត់?៕
Source: Kampuchea Thmey Daily
0 Comments