ស្ទឹងត្រែង ៖ ក្នុងសកម្មភាពចុះពិនិត្យតំបន់សត្វក្អែកទឹករស់នៅថ្ងៃទី០៧ ខែមីនា ឆ្នាំ២០១៩នេះ លោកឈួន ឆន ប្រធានការិយាល័យអភិរក្សធនធានធម្មជាតិនៃមន្ទីរបរិស្ថានខេត្តស្ទឹងត្រែង បានបញ្ជាក់ថា ៖ នៅដើមឆ្នាំ២០១៩នេះ នៅទឹកដីកន្ទុយកោះឈើទាលតូច ក្នុងឃុំព្រះរំកិលចន្លោះគ្នាទៅនឹងទឹកដីឃុំអូរស្វាយក្នុងស្រុកថាឡាបរិវ៉ាត់ ខេត្តស្ទឹងត្រែង មានពពួកសត្វក្អែកទឹកមករស់នៅជាច្រើនលានក្បាល នេះជាសញ្ញាមួយបង្ហាញពីការវិវត្តន៍នៃការ កកើតពពួកសត្វស្លាបប្រភេទនេះនៅលើទឹកដីខេត្តស្ទឹងត្រែងនៅឆ្នាំនេះ។
លោកបញ្ជាក់ថា ៖ នេះជាមោទនភាពមួយតម្រូវឱ្យសមត្ថកិច្ចពាក់ព័ន្ធ និងបងប្អូនប្រជាពលរដ្ឋយើងនៅតំបន់នេះរួមគ្នាថែរក្សាកុំឱ្យវាធ្វើបន្លាស់ទីទៅតំបន់ផ្សេងទៀតខ្លាចមានអ្នកប្រមាញ់យកទៅធ្វើជាអាហារ។
លោកថា ៖ កិច្ចការអភិរក្សសត្វស្លាបប្រភេទនេះ មន្ត្រីបរិស្ថានរួមជាមួយមន្ត្រីជំនាញជលផល និងអាជ្ញាធរមូលដ្ឋាន កំណត់តំបន់ហាមឃាត់ចូលទៅធ្វើនេសាទ ការកាប់ព្រៃលិចទឹកនៅតំបន់នេះ ដែលជាករណីមួយធ្វើឱ្យបាត់បង់ទីជម្រក។
លោកសេកម៉ៅមេឃុំអូរស្វាយស្រុកថាឡាបរិវ៉ាត់ខេត្តស្ទឹងត្រែង បានសាទរចំពោះយន្តការនេះព្រោះអាជ្ញាធរឃុំក៏មានគំនិតថែរក្សាវាដែរ តែបានត្រឹមតែប្រកាសណែនាំដល់ប្រជាពលរដ្ឋមិនឱ្យសម្លាប់វានិងទៅនេសាទនៅតំបន់នោះ តែមិនទាន់មានប្រសិទ្ធភាពទេ។
លោកថា ៖ ប្រសិនបានផ្នែកបរិស្ថានរៀបចំកំណត់ព្រំប្រទល់ហាមឃាត់ទុកអភិរក្សនោះ អាជ្ញាធរ នឹងបង្កើនការចូលរួមឱ្យមានប្រសិទ្ធភាព។
លោកយេនមីប្រធានសហគមន៍បុរីអូរស្វាយបានសំដែងការសាទរជាគំនិតដ៏ល្អនេះ ហើយសហគមន៍នឹងជួយផ្សព្វផ្សាយឱ្យប្រជាពលរដ្ឋយើងជួយបង្កើនការថែរក្សា ព្រោះវាមានប្រយោជន៍សម្រាប់ប្រើឲ្យវិស័យទេសចរណ៍។
លោកថា ៖ ពិសេសជាងនេះទៀតវត្តមានសត្វក្អែកទឹកនេះ វាបានបញ្ជាក់ពីតំបន់ ដែលសំបូរត្រីហើយការអភិរក្សសត្វស្លាបនេះ ប្រមុខរាជរដ្ឋាភិបាល ក៏បានចេញអនុក្រឹត្យឱ្យរួមគ្នាថែរក្សាទុកជាសម្បត្តិជាតិរបស់យើងទាំងអស់គ្នាផងដែរ។
សូមបញ្ជាក់ថា ៖ សត្វក្អែកទឹកនេះ ជាច្រើនឆ្នាំកន្លងមក វារស់នៅតំបន់ភូមិសាស្ត្រទឹកដីស្រុកសំបូរខេត្តក្រចេះ លុះមកដល់ឆ្នាំ២០១៧ និង២០១៨ វាបានបន្លាស់ទីខ្លះៗហើយនៅឆ្នាំ២០១៩នេះវាទៅនៅទឹកដីខេត្តស្ទឹងត្រែងតែម្តង៕
Source: Kampuchea Thmey Daily
0 Comments