ជិះ​ម៉ូតូ​មិន​ប្រយ័ត្ន​ ជ្រុល​ចង្កូត​បុក​រថយន្ត​ពីមុខ ​របួសធ្ងន់​២​នាក់ នៅ​ស្រុក​លំផាត់​

​រតនគិរី​ ៖ ករណី​គ្រោះថ្នាក់​ចរាចរណ៍​បុរស​២​នាក់​ ជិះ​ម៉ូតូ​ទៅបុក​រថយន្ត​មួយគ្រឿង​ ខណៈ​បើកបរ​ក្នុង​ទិសដៅ​បញ្ច្រាស​គ្នា​ ពី​ជើង​ទៅ​ត្បូង យ៉ាង​ពេញទំហឹង ​បណ្តាល​ឲ្យ​ដួល​រដូករណែល​ពេញ​ផ្លូវ ​រង​របួស​ធ្ងន់ធ្ងរ​។​

​ករណី​គ្រោះថ្នាក់​ចរាចរណ៍​បាន​កើតឡើង ​កាលពី​វេលា​ម៉ោង​១១​និង​០០​នាទី​ព្រឹក ថ្ងៃ​ពុធ ៨​កើត ខែ​ផល្គុន ឆ្នាំច សំរឹទ្ធិស័ក ព​.​ស​២៥៦២ ត្រូវ​នឹង​ថ្ងៃទី​១៣ ខែមីនា ឆ្នាំ​២០១៩ តាម​បណ្ដោយ​ផ្លូវជាតិ​លេខ​៧៦ នៅ​ចំណុច​ផ្លូវបំបែក​ផ្ទះ​ ឈ្មោះ ហួ ត្រង់​បង្គោល​គីឡូម៉ែត្រ​លេខ​២៨២-២៨៣ ស្ថិត​ក្នុង​ភូមិ​ព្រួក ឃុំ​បា​តាង ស្រុក​លំផាត់​។​

​សមត្ថកិច្ច​នគរបាល​ស្រុក​លំផាត់​បាន​ឲ្យ​ដឹងថា អ្នក​ជិះ​ម៉ូតូ​ ឈ្មោះ វ​រះ ភេទ​ប្រុស អាយុ​២១​ឆ្នាំ ជន​ជាតិ​ខ្មែរ មុខរបរ​កសិករ មាន​ទីលំនៅ​ភូមិ​កា​ទៀង ឃុំ​ល្បាំ​ង​១ ស្រុក​លំផាត់ ខេត្ត​រតនគិរី រង​របួស​ធ្ងន់ បើកបរ​ម៉ូតូ​មួយគ្រឿង​ម៉ាក​ហុងដា​ឌ្រី​ម សេ​១២៥ ស៊េរី​ឆ្នាំ​២០១៤ ពណ៌​ខ្មៅ ពាក់​ស្លាក​លេខ​1B-2011​។​
​
អ្នករួមដំណើរ​ ឈ្មោះ លី រិទ្ធី ភេទ​ប្រុស អាយុ​៥៥​ឆ្នាំ ជនជាតិ​ខ្មែរ មុខរបរ​កសិករ រង​របួស​ធ្ងន់ មាន​ទីលំនៅ​ភូមិ​បា​តាង ស្រុក​លំផាត់​។​

​សមត្ថកិច្ច​នគរបាល​បាន​បន្តថា រថយន្ត​មួយគ្រឿង​ម៉ាក​តូ​យូ​តា​ហ្វ័​រ​ណ័​រ ពណ៌​ខ្មៅ ពាក់​ស្លាក​លេខ​ភ្នំពេញ​2J-5065 អ្នកបើកបរ​មិនត្រូវ​បាន​ស្គាល់​អត្តសញ្ញាណ ក្រោយ​កើតហេតុ​រត់គេចខ្លួន​បាត់ បន្សល់​ទុក​រថយន្ត​នៅ​កន្លែងកើតហេតុ​។​

បើកបរ​ពី​ជើង​ទៅ​ត្បូង​ លុះ​ដល់​ត្រង់​ចំណុច​កើតហេតុ​ខាងលើ​ ស្រាប់តែ​ម៉ូតូ​បាន​ជ្រុល​ចង្កូត​ទៅបុក​រថយន្ត​ពីមុខ​តែម្ដង​។​ ហើយ​រថយន្ត​ បាន​រេ​ចង្កូត​ទៅបុក​នឹង​ដើម​ខុប​ នៅ​ចិញ្ចើម​ផ្លូវ​ទៅមុខ​លែងរួច​។​

​ក្រោយពេល​កើតហេតុ​ កម្លាំង​ប៉ុស្តិ៍​រដ្ឋបាល​ឃុំ​បា​តាង និង​ជំនាញ​ ចុះមក​កន្លែងកើតហេតុ ធ្វើការ​វាស់​វែង​រឹបអូស​យក​មធ្យោបាយ​ទាំង​២​គ្រឿង​ ទៅ​រក្សាទុក​នៅ​អធិការ​នគរបាល​ស្រុក​លំផាត់​ ដើម្បី​រង់ចាំ​ធ្វើការ​ដោះស្រាយ​នៅ​ពេល​ក្រោយ​។​

​ដោយឡែក ​អ្នករងរបួស​ធ្ងន់​ ត្រូវបាន​សាច់ញាតិ​ដឹក​បញ្ជូន​ទៅ​ព្យាបាល​នៅ​មន្ទីរពេទ្យ​បង្អែក​ខេត្ត​ភ្លាមៗ​ផង​ដែរ​៕

 



Source: Kampuchea Thmey Daily