ភ្នំពេញ ៖ ចៅក្រមសាលាដំបូងរាជធានីភ្នំពេញ លោករស់ ពិសិដ្ឋ នារសៀលថ្ងៃទី ២២មេសា ឆ្នាំ២០១៩នេះ បានលើកយកសំណុំរឿងញុះញង់កងទ័ពមិនឲ្យស្ដាប់បង្គាប់របស់ទណ្ឌិត សម រង្ស៊ី មកបើកសវនាការជាសាធារណៈ នៅចំពោះមុខមេធាវីការពារក្ដីឲ្យជនជាប់ចោទ គឺមេធាវី សំ សុគង់។
សវនាការនេះបានធ្វើឡើងនៅចំពោះមុខមេធាវីគូរភាគី និងកំបាំងមុខជនត្រូវចោទ សម រង្ស៊ី។
តុលាការបានផ្ដើមចោទប្រកាន់លោកសម រង្ស៊ីពីបទ ញុះញង់កងទ័ពកុំឲ្យស្ដាប់បង្គាប់រាជរដ្ឋាភិបាល បទធ្វើឲ្យខូចទឹកចិត្តកងទ័ព និងបទប្រមាថថ្នាក់ដឹកនាំកងយោធពលខេមរភូមិន្ទ កាលពីថ្ងៃទី ០៥ធ្នូ ឆ្នាំ២០១៧។
កាលពីព្រឹកថ្ងៃទី០៧ ខែធ្នូ ឆ្នាំ២០១៧ លោកមេធាវី វង្ស ភក្ដី មេធាវីតំណាងដោយអាណត្តរបស់ក្រសួងការពារជាតិ បានដាក់ពាក្យប្តឹងទណ្ឌិត សម រង្ស៊ី មកសាលាដំបូងរាជធានីភ្នំពេញ ពាក់ព័ន្ធនឹងករណីញុះញង់កុំឲ្យយោធិនស្តាប់បង្គាប់រាជរដ្ឋាភិបាល ស្របច្បាប់ បទធ្វើឲ្យខូចទឹកចិត្តកងទ័ព និងបទប្រមាថថ្នាក់ដឹកនាំកងយោធពលខេមរភូមិន្ទ។
ពាក្យបណ្តឹងរបស់មេធាវីតំណាងក្រសួងការពារជាតិបានបញ្ជាក់ថា ការអំពាវនាវរបស់លោក សម រង្ស៉ី នៅលើបណ្ដាញសង្គម ធ្វើឲ្យប៉ះពាល់ដល់សន្តិសុខជាតិ ដែលជាបទល្មើសចែងនៅក្នុងក្រមព្រហ្មទណ្ឌ នៃព្រះរាជាណាចក្រកម្ពុជាកំពុងអនុវត្ត។
នៅលើបណ្ដាញសង្គមកាលពីថ្ងៃទី ០៥ធ្នូ ឆ្នាំ២០១៧ លោក សម រង្ស៉ី អតីតប្រធានគណបក្សសង្គ្រោះជាតិ បានអំពាវនាវឲ្យកងទ័ពបង្វែរកាណុងកាំភ្លើងមកលើរាជរដ្ឋាភិបាល ហើយបង្គាប់ឲ្យកងទ័ពឈប់គាំទ្រសម្តេចតេជោ ហ៊ុន សែន តទៅទៀត។
ក្រោយពីដាក់ពាក្យបណ្ដឹងរួច លោកសៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចចោទប្រកាន់លោកសម រង្ស៊ី ជាផ្លូវការ ហើយបញ្ជូនឲ្យចៅក្រមសម្រេចតាមនីតិវិធី ក្រោមរូបភាពជនជាប់ចោទនៅក្រៅឃុំ៕
Source: Kampuchea Thmey Daily
0 Comments