ម្ដាយនិងកូនបានសន្លប់ស្ដូកស្ដឹង ក្នុងហេតុការណ៍អគ្គីភ័យឆាបឆេះ ធនាគារ អេស៊ា ផេស៊ីហ្វិក ហ្វាយនែន ភិអិលស៊ី និងហាង Domino’s Pizza យ៉ាងសន្ធរសន្ធៅ

Cambodia News April 22, 2019

ភ្នំពេញ ៖ យ៉ាងហោចណាស់ក៏មានម្តាយនិងកូនប្រុសម្នាក់បានរងរបួស ហើយត្រូវបានសមត្ថកិច្ចជួយសង្គ្រោះនិងបញ្ជូនទៅមន្ទីរពេទ្យភ្លាមៗ ក្រោយពីមានអគ្គិភ័យបានឆាបឆេះ ធនាគារ អេស៊ា ផេស៊ីហ្វិក ហ្វាយនែន ភិអិលស៊ី និងហាង Domino’s Pizza យ៉ាងសន្ធរសន្ធៅនោះ ហើយ ក្នុងហេតុការណ៍នេះសមត្ថកិច្ចក៏បានចេញរថយន្តពន្លត់អគ្គីភ័យជាច្រើនគ្រឿងអន្តរាគមន៍ពន្លត់ផងដែរ។

ហេតុការណ៍នេះ បានកើតឡើងនៅវេលាម៉ោង១និង១៥នាទីរសៀល ថ្ងៃទី២២ ខែមេសា ឆ្នាំ២០១៩ ដែលស្ថិតនៅចំណុចជិតនិងផ្សារTK ស្ថិតនៅផ្លូវ៥១៦ កែង៣១៥ ក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ។

សមត្ថកិច្ចបានឲ្យដឹងថា ជនរងគ្រោះទី១ ជាម្តាយ មានឈ្មោះ ស៊ុយ ថាវី អាយុ២៩ឆ្នាំ ត្រូវបានបញ្ជូនទៅសង្គ្រោះនៅមន្ទីរពេទ្យលោកសង្ឃ រីឯទី២ត្រូវជាកូនប្រុស អាយុ៦ឆ្នាំ ត្រូវបានបញ្ជូនទៅសង្គ្រោះនៅមន្ទីរពេទ្យកុមារជាតិ។

តាមប្រភពព័ត៌មាននៅកន្លែងកើតហេតុបានប្រាប់ឲ្យដឹងថា នៅមុនពេលកើតហេតុ គេបានឃើញផ្សែង និងអណ្ដាតភ្លើង បានចេញពីខាងក្រោយធនាគារខាងលើ ហើយបានរាលដាលទៅហាងDomino’s Pizza បណ្តាលឲ្យរងការខូចខាត មួយចំហៀងខាងក្រៅ និងសំភារៈមួយចំនួន ។ ជំហ៊ានដំបូងសមត្ថកិច្ចសន្ថានថា មកករណីឆ្លងចរន្តអគ្គីសនី។