ភ្នំពេញ ៖ អង្គភាពប្រឆាំងអំពើពុករលួយបានអះអាងថា ករណីលោកឧត្ដមសេនីយ៍ត្រី ស្រេង សុខា ស្នងការរងខេត្តកណ្តាល និងលោកឧត្តមសេនីយ៍ត្រី គឹម រស្មី អតីតមេបញ្ជាការប៉េអិមខេត្តរតនគិរី នឹងបញ្ចប់ការស៊ើបអង្កេតនៅដំណាច់ខែមេសា ឆ្នាំ២០១៩នេះ ក្រោយពីបានចាប់ផ្តើមការងាររបស់ខ្លួនកាលពីខែកុម្ភៈ។
លោកឧត្តមសេនីយ៍ត្រី គឹម រស្មី ត្រូវបានអង្គភាពប្រឆាំងអំពើពុករលួយ បានប្រកាសបើកការស៊ើបអង្កេត ស្របពេលដែលមហាជនមួយចំនួនចោទប្រកាន់ថា អតីតមេអាវុធហត្ថលោកនេះ អាចមានការពាក់ព័ន្ធនឹងអំពើពុករលួយ បន្ទាប់ពីធ្លាយវីដេអូមួយបង្ហាញថា លោកបានសម្ញែងលុយរបស់ខ្លួន ដោយចែកប្រាក់ដល់កូនៗចំនួន៥នាក់ ដោយម្នាក់ៗ ទទួលបាន១០ម៉ឺនដុល្លារ កាលពីយប់ថ្ងៃទី០៥ ខែកុម្ភៈ ឆ្នាំ២០១៩។ ចំណែកលោកឧត្ដមសេនីយ៍ត្រី ស្រេង សុខា ត្រូវបានមហាជនតាមបណ្តាញសង្គមចែកចាយបន្តគ្នាថា លោកបានអួតសម្ញែងខ្សែក្រវាត់ពេជ្រ ខុសឆ្គងទៅនឹងលក្ខន្តិកៈរបស់កងកម្លាំងនគរបាលជាតិ និងបានអួតសម្ញែងលុយមហាសាល ដែលបង្គាប់ជូនខាងស្រី ក្នុងពិធីភ្ជាប់ពាក្យចំនួន១០ម៉ឺនដុល្លារ និងរថយន្តឡិចស៊ីស៥៧០។
សេចក្តីប្រកាសព័ត៌មានពីកិច្ចប្រជុំនៃក្រុមប្រឹក្សាជាតិប្រឆាំងអំពើពុករលួយ ដែលការិយាល័យរបស់យើងទើបទទួលបាននៅថ្ងៃទី២២ មេសា បញ្ជាក់ថា នៅក្នុងកិច្ចប្រជុំនោះ អង្គប្រជុំបានស្តាប់របាយការណ៍របស់លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ អំពីសកម្មភាពនានារបស់អង្គភាពប្រឆាំងអំពើពុករលួយ នៅអំឡុងខែមីនា ឆ្នាំ២០១៩ ហើយនៅចំណុច “ង” បានបញ្ជាក់ថា ករណីលោក គឹម រស្មី លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ និងលោកស្រីប្រធាននាយកដ្ឋានស៊ើបអង្កេត និងចារកម្ម បានលើកឡើងពីលទ្ធផល ដែលក្រុមស៊ើបអង្កេតចំនួន៣ក្រុមបានបំពេញ ហើយនៅតែក្រុមទី៤ និងក្រុមទី៥ ប៉ុណ្ណោះ ដែលអាចបញ្ចប់ការស៊ើបអង្កេតនេះ នៅដំណាច់ខែមេសា ឆ្នាំ ២០១៩ នេះ។
ចំណែកនៅត្រង់ចំណុច “ច” បានបញ្ជាក់ថា ករណីលោកស្នងការរង ស្រេង សុខា ក្រុមការងារស៊ើបអង្កេត និងអាចធ្វើការសន្និដ្ឋាននៅដំណាច់ខែមេសា ឆ្នាំ២០១៩នេះ។ ជាមួយគ្នានោះក្រុមប្រឹក្សាជាតិប្រឆាំងអំពើពុករលួយ ក៏បានប្រកាសគាំទ្រដល់ចំណាត់ការរបស់អង្គភាពប្រឆាំងអំពើពុករលួយនៅក្នុងការពង្រឹងការអនុវត្តច្បាប់ការបង្ការ និងទប់ស្កាត់ និងបោសសំអាតអំពើពុករលួយ ដើម្បីពង្រឹងអភិបាលកិច្ចល្អ ហើយក្រុមប្រឹក្សាជាតិប្រឆាំងអំពើពុករលួយ ក៏បានគាំទ្រពេញទំហឹងនៅការជំរុញការងាររបស់អង្គភាពប្រឆាំងអំពើពុករលួយ តាមចំណុចដែលត្រូវខិតខំប្រឹងប្រែងថែមទៀត នៃការអនុវត្តផែនការសកម្មភាពរបស់ជាតិ ក្នុងយុទ្ធសាស្ត្រប្រឆាំងការសំអាតប្រាក់ និងហិរញ្ញប្បទានភេរវកម្ម ឆ្នាំ២០១៩-២០២៣ ដែលបានដាក់សម្ពោធកាលពីថ្ងៃទី១៤ ខែមីនា ឆ្នាំ២០១៩៕
Source: Kampuchea Thmey Daily
0 Comments