ភ្នំពេញ ៖ ជនសង្ស័យជួញដូរគ្រឿងញៀនម្នាក់ ត្រូវបានកម្លាំងនគរបាលខណ្ឌដូនពេញ បង្ក្រាប ខណៈពេលជនសង្ស័យកំពុងសម្ងំលក់ថ្នាំជាក់ស្តែង។ កម្លាំងផ្នែកគ្រឿងញៀន នៃអធិការនគរបាលខណ្ឌដូនពេញបានឲ្យដឹងថា លទ្ធផល នៃការស្រាវជ្រាវឈានដល់បើកកិច្ចប្រតិបត្តិការបង្ក្រាបករណីជួញដូរគ្រឿងញៀននេះ គឺ ដោយអនុវត្តតាមការណែនាំរបស់ លោក សុខ ពេញវុធ អភិបាល នៃគណៈអភិបាលខណ្ឌដូនពេញ ដែលកម្លាំងជំនាញខណ្ឌប៉ុស្តិ៍ បានបើកការស្រាវជ្រាវជាប់ជាប្រចាំចំពោះមុខសញ្ញាប្រព្រឹត្តបទល្មើសគ្រប់ប្រភេទ ជាក់ស្ដែងនៅថ្ងៃទី២០ ខែមេសា ឆ្នាំ២០១៩ វេលាម៉ោង២១និង៤០នាទី ក្រោយពីកំណត់បានមុខសញ្ញា និងទីតាំងប្រព្រឹត្តសកម្មភាពរួចមក សមត្ថកិច្ចបានបើកកិច្ចប្រតិបត្តិការបង្ក្រាបចំពោះមុខសញ្ញាជួញដូរគ្រឿងញៀនយ៉ាងសកម្មប្រចាំតំបន់ ដែលកំពុងធ្វើសកម្មភាពចរាចរណ៍គ្រឿងញៀន ស្ថិតនៅចំណុចលើផ្លូវរថភ្លើង ក្រុម៣៩ ភូមិ៣ សង្កាត់ស្រះចក ដោយបានធ្វើការឃាត់ខ្លួនជនសង្ស័យចំនួន០១នាក់ ឈ្មោះ ចាន់ ថុល ហៅរស់ភេទប្រុស អាយុ៤៥ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅភូមិព្រែកសំរោង ឃុំសេរីភាព ស្រុកតាខ្មៅ ខេត្តកណ្តាល។
សមត្ថកិច្ចបានបន្តទៀតថា ក្នុងការឃាត់ខ្លួនជនសង្ស័យរូបនោះ គឺកម្លាំងបានរឹបអូសវត្ថុតាងរួមមានក្រាមពណ៌សថ្លា សង្ស័យជាគ្រឿងញៀនចំនួន១០កញ្ចប់តូច (ដប់កញ្ចប់តូច) លុយខ្មែរចំនួនបីម៉ឺនរៀល។
ចំពោះមុខ កម្លាំងជំនាញខណ្ឌប៉ុស្តិ៍ កំពុងបន្តការស្រាវជ្រាវរកបក្ខពួក និងកសាងសំណុំរឿង ដើម្បីបញ្ជូនទៅសាលាដំបូងរាជធានីភ្នំពេញ អនុវត្តតាមនីតិវិធី និងទិសដៅបន្ត អធិការដ្ឋាននគរបាលខណ្ឌដូនពេញ និងប៉ុស្តិ៍រដ្ឋបាលទាំង១១ ជំរុញការស្រាវជ្រាវ និងបន្តបើកការបង្ក្រាបជាប់ជាប្រចាំ៕
Source: Kampuchea Thmey Daily
0 Comments