កណ្តាល ៖ សាកសពមនុស្សប្រុសម្នាក់ អាយុស្របាល២០ឆ្នាំ ត្រូវបានគេឃើញអណ្តែតទន្លេក្រោយរកឃើញម៉ូតូ១គ្រឿង នៅលើស្ពានព្រែកតាមាក់ នៅថ្ងៃទី២២ ខែមេសា ឆ្នាំ២០១៩ វេលាម៉ោង៦និង០០នាទី ចំណុចមាត់ច្រាំងទន្លេភូមិកោះរកា ឃុំព្រែកអញ្ចាញ ស្រុកមុខកំពូល ខេត្តកណ្តាល។
នគរបាលស្រុកមុខកំពូលបានឲ្យដឹងថា ជនរងគ្រោះ មិនស្គាល់អត្តសញ្ញាណ ភេទប្រុស អាយុប្រហែល២០ឆ្នាំជាង ស្លៀកពាក់ ពាក់អាវដៃវែងពណ៌ខ្មៅ ផ្កាពណ៌លឿង ស្លៀកខោខូវប៊យជើងវែង ពណ៌ទឹកប៊ិក ម៉ាកLEISTRASS&COខោលីអូពណ៌ខ្មៅម៉ាកPOWER។
សាក្សីនិយាយថា នៅថ្ងៃទី២០ ខែមេសា ឆ្នាំ២០១៩ វេលាម៉ោង២២និង០០នាទី សមត្ថកិច្ចនគរបាលប៉ុស្តិ៍ព្រែកអញ្ចាញបានទទួលព័ត៌មានពីប្រជាពលរដ្ឋថា មានម៉ូតូ០១គ្រឿងម៉ាកស៊ីរូសចាស់ពណ៌ក្រហម ខ្មៅ គ្មានស្លាកលេខ និងស្បែកជើងជ័រផ្ទាត់០១គូ លេខ៤៣ ទុកចោលនៅលើស្ពានព្រែកតាមាក់ភូមិកោះរកា ឃុំព្រែក អញ្ចាញ។
ក្រោយពីទទួលបានព័ត៌មានរួច កម្លាំងប៉ុស្តិ៍ព្រែកអញ្ចាញបានទៅដល់កន្លែងកើតហេតុរួចយកម៉ូតូនិងស្បែកជើងនោះមករក្សាទុកនៅអធិការដ្ឋាន នគរបាលស្រុកមុខកំពូល ដោយនៅក្រោមកែបម៉ូតូឃើញមានសំបកកញ្ចប់បារីម៉ាក I.z.aចំនួន ០២កញ្ចប់,មួកប៉ារ៉េពណ៌ខ្លាញ់ក្ដាមម៉ាកnike០១, អាវដៃខ្លីកូនក្មេងតូច ពណ៌ទឹកក្រូច ស្ព័រលេខ១០ មានឆ្នូតៗខ្មៅ ចំនួន០១។
លុះដល់ថ្ងៃទី២២ ខែមេសា ឆ្នាំ២០១៩ វេលាម៉ោង០៦និង០០នាទី ប៉ុស្តិ៍នគរបាលរដ្ឋបាលព្រែកអញ្ចាញបានទទួលព័ត៌មាន ពីលោក ឆឺត ហាក់ អនុប្រធានភូមិកោះរកា បានរាយការណ៍មកថា មានសាកសពមនុស្សម្នាក់ ទើរនៅច្រាំងទន្លេស្ថិតក្នុងភូមិ កោះរកា ឃុំព្រែកអញ្ចាញ។
ក្រោយពីទទួលបានព័ត៌មាន នគរបាលប៉ុស្តិ៍ព្រែកអញ្ចាញសហការជាមួយផ្នែកជំនាញនគរបាលយុត្តិធម៌និងអាជ្ញាធរមូលដ្ឋាន បានចុះទៅកន្លែងកើតហេតុ ហើយបានធ្វើការ ពិនិត្យសាកសព ឃើញដេកផ្ងារក្បាលទៅត្បូង ជើងសណ្ដូកទៅទិសខាងជើង កំពស់១,៦៥ម៉ែត្រ នៅក្នុងហោប៉ៅខោខូវប៊យមាន ទូរស័ព្ទម៉ាកណូគា អិនចុចពិល ០១គ្រឿង កាបូបដៃពណ៌សូកូឡា ០១មានលុយខ្មែរ ១០០.០០០៛(ដប់ម៉ឺន) សាកសពមានសភាពហើម លៀនភ្នែកនិងអណ្តាត មានរលាត់ស្បែកលើដងខ្លួននិងផ្ទៃមុខ មានវត្ថុរាវហូរចេញតាមមាត់និងច្រមុះពេលជំនាញធ្វើការត្រួតពិនិត្យ ក្រៅពីស្លាកស្នាមខាងលើពុំមានស្លាកស្នាម អ្វីផ្សេងគួរឲ្យកត់សម្គាល់ឡើយ។
តាមសន្និដ្ឋាន និងវាយតម្លៃរបស់ផ្នែកជំនាញ ១.ផ្អែកតាមការបំភ្លឺពីឈ្មោះហ៊ាង ចន្ថា ភេទប្រុស អាយុ៣២ឆ្នាំ ជាជាងផ្សារសាឡង់នៅក្បែរកន្លែងកើតហេតុបានបញ្ជាក់ថា ថ្ងៃទី២០ ខែមេសា ឆ្នាំ២០១៩ វេលាម៉ោង២២និង១០នាទី បានឃើញមនុស្សប្រុសកំពុងតែលង់ទឹក នៅខាងកើតសាឡង់របស់ខ្លួន ហើយគាត់និងកម្មករផ្សេងទៀតបានបោះពីដុងចំណុះ៣០ លីត្រដើម្បីជួយសង្គ្រោះជនរងគ្រោះ តែជនរងគ្រោះចាប់ពីដុងមិនបាន ជនរងគ្រោះក៏លិចក្នុងទឹកបាត់ទៅ។
២.ផ្អែកតាមការបំភ្លឺពីឈ្មោះ គង់ ភក្ដី ភេទប្រុស អាយុ២៦ឆ្នាំ មុខរបរលក់ដូរ នៅភូមិកោះរកា បានបញ្ជាក់ថា ថ្ងៃទី២០ ខែមេសា ឆ្នាំ២០១៩ វេលាម៉ោង២១និង៣០នាទី មានរថយន្តស្ទូច០១ គ្រឿងបានមកឈប់ទិញឥវ៉ាន់ របស់គាត់និងបានប្រាប់គាត់ថា មានម៉ូតូ០១ គ្រឿងទុកចោលនៅលើស្ពានព្រែកតាមាក់ ពុំឃើញមានម្ចាស់ទេ គាត់ក៏ជិះម៉ូតូមកមើល ឃើញម៉ូតូម៉ាកស៊ីរូស០១ គ្រឿងពណ៌ខ្មៅលាយក្រហម និងមានស្បែកជើងផ្ទាត់០១គូរ នៅជិតម៉ូតូតែមិនមានឃើញមនុស្សទេ បានរាយការណ៍ជូនសមត្ថកិច្ច បានយកម៉ូតូនោះទៅរក្សាទុកនៅកន្លែងសមត្ថកិច្ចទៅ។ ចំពោះករណីខាងលើនេះជនរងគ្រោះ គឺបានលោតពីលើស្ពានព្រែកតាមាក់លង់ទឹកស្លាប់៕
Source: Kampuchea Thmey Daily
0 Comments