ក្រុមបាល់ទាត់វិសាខា បានយកលើម្ចាស់ផ្ទះក្រុមអគ្គីសនីកម្ពុជា ដោយលទ្ធផល ៤ទល់០ ប្រចាំសប្ដាហ៍ទី៤នៃពានរង្វាន់លីគកំពូលកម្ពុជា (Metfone Cambodian League 2019) ឆ្នាំ២០១៩ លើទីលានកីឡដ្ឋានវិសាខា ក្នុងរាជធានីភ្នំពេញ ស្របពេលដែរគ្រូបង្គោលលោក ហុក សុជីវ័ន បានសម្លឹងឃើញពីការមានប្រៀបលើគូប្រកួតត្រង់កីឡាករបរទេស។
លោក ហុក សុជីវ័ន ដែលដឹកនាំក្រុមវិសាខា ឈរចំណាត់ថ្នាក់លេខ៣ បណ្តោះអាសន្នក្នុងតារាងរួមបានលើកឡើងថា «តង់ទី១ យើងបង្កើតឱកាសបានច្រើន តែអត់សូវសម្រេចផល ដោយសារទម្រង់លេងគេចុះស្ទើរទាំងអស់ គេទុកតែម្នាក់ សម្រាប់វាយបក ចឹងយើងពិបាកលេង ពេលគេលេងបែបនេះ។ ម្យ៉ាងការរៀបចំរបស់យើង អត់តាមអ្វីដែលយើងចង់បាន ១០០% ទៀត...។ ដូចខ្ញុំនិយាយពីមុនចឹង ប្រកួតក្រោយចូលឆ្នាំថ្មី សំខាន់លើក្រុមណា ដែលថែរក្សាកម្លាំងបានល្អជាង គឺក្រុមនោះមានលទ្ធភាពជាង»។
តែយ៉ាងណាលោក ហុក សុជីវ័ន មិនអាចប្រៀបធៀបការប្រកួតនេះ ទៅនឹងប្រកួតមុនៗបានទេ ព្រោះក្រុមអគ្គិសនីកម្ពុជា គឺជាក្រុមប្រើប្រាស់កីឡាករខ្មែរសុទ្ធ ។ លោកថា «ប្រកួតមុនៗ យើងជួបក្រុមមួយ ដែលមានការរៀបចំច្បាស់លាស់ដូចគ្នា តែពួកគេមានកីឡាករបរទេសជួយ ផ្ទុយពី EDC ពួកគាត់មានកីឡាករខ្មែរសុទ្ធ ធ្វើឲ្យយើងងាយស្រួលនឹងលេងជាងអ្វី ដែលក្រុមយើងត្រូវជួបក្រុមមានកីឡាករបរទេស ។ អញ្ចឹងយើងមិនអាចប្រៀបធៀបប្រកួតនេះ ទៅនឹងប្រកួតមុនៗបានទេ»។
ក្លិបកីឡាបាល់ទាត់ វិសាខា មាន ១០ពិន្ទុក្នុងដៃ បន្ទាប់ពីប្រកួត៤លើកមកនេះរកបានជ័យជម្នះ៣ លើកនិងស្មើគ្នា១ លើក រួមមានឈ្នះក្លិបគិរីវង់សុខសែនជ័យ ២-០(ក្នុងដី), ឈ្នះក្លិបភ្នំពេញក្រោន ៣-១(ក្រៅដី), ឈ្នះក្លិបអគ្គិសនីកម្ពុជា ៤-០(ក្នុងដី) និងស្មើក្លិបសូលទីឡូអង្គរ ០-០(ក្នុងដី)។ ចំពោះប្រកួតបន្ទាប់ ក្លិបកីឡាបាល់ទាត់ វិសាខា នឹងត្រូវធ្វើដំណើរទៅប្រកួតលើទឹកដីខេត្តសៀមរាប ជាមួយក្លិបអង្គរថាយហ្គីរ នាថ្ងៃទី២៨ ខែមេសា ខាងមុខ៕
Source: Kampuchea Thmey Daily
0 Comments