ភ្នំពេញ ៖ ក្រសួងអប់រំ យុវជន និងកីឡា បានសម្រេចកាត់បន្ថយម៉ោងសិក្សាចំនួនកន្លះម៉ោង ដើម្បីការពារសុខភាពដល់សិស្សនៅពេលអាកាសធាតុក្តៅខ្លាំង ដែលកម្ដៅអាចមានសីតុណ្ហភាពលើសពី៤០អង្សា រហូតដល់ចុងខែមេសានេះ។
លោកបណ្ឌិត សភាចារ្យ ហង់ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានស្នើទៅគ្រប់គ្រឹះស្ថានសិក្សារដ្ឋ និងឯកជន ចាប់ពីកម្រិតមតេយ្យសិក្សា រហូតដល់កម្រិតវិទ្យាល័យទាំងអស់ ត្រូវបង្រួមម៉ោងសិក្សាចំនួនកន្លះម៉ោង គឺពេលព្រឹកចូលរៀនម៉ោង៧ ចេញម៉ោង១០កន្លះ និងពេលរសៀល ត្រូវពន្យារដល់ម៉ោង១កន្លះ និងចេញនៅម៉ោង៥ល្ងាច។
នៅក្នុងសារលិខិតរបស់ក្រសួងអប់រំ យុវជន និងកីឡាដែលបានចេញផ្សាយកាលពីល្ងាចថ្ងៃទី២៥ខែមេសា ឆ្នាំ២០១៩ កន្លងទៅនេះ លោក បណ្ឌិត សភាចារ្យ ហង់ជួនណារ៉ុន បានមានប្រសាសន៍ថាការបង្រួមម៉ោងសិក្សាចំនួនកន្លះនៅតាមគ្រឹះស្ថានសិក្សារដ្ឋនិងឯកជននេះ គឺដើម្បីបង្ការទប់ស្កាត់រាល់ហានិភ័យ និងជៀសវាងពីជំងឺផ្សេងៗដែលអាចប៉ះពាល់ដល់សុខភាព ការរៀនសូត្រ និងការបំពេញការងាររបស់សិស្សានុសិស្ស លោកគ្រូ អ្នកគ្រូក៏ដូចជាកុមារតូចៗ ព្រោះ រដូវប្រាំងឆ្នាំនេះអាកាសធាតុមានកម្ដៅក្ដៅខ្លាំង ពិសេសក្នុងចន្លោះពីម៉ោង១០ព្រឹក រហូតដល់ម៉ោង២រសៀល។
យ៉ាងណាក៏ដោយ លោករដ្ឋមន្ត្រីបានអះអាងថា នៅពេលផុតរដូវក្ដៅ ក្រសួង នឹងអនុវត្តតាមគោលការណ៍ដូចធម្មតាឡើងវិញ គឺចូលរៀននៅម៉ោង៧ព្រឹកចេញម៉ោង១១និងពេលរសៀលចូលនៅម៉ោង១រសៀល និងចេញនៅម៉ោង៥ដដែល។
កន្លងមក ក្រសួងអប់រំ បានណែនាំដល់សិស្សានុសិស្ស ត្រូវយកទឹកដាំពុះ ទឹកចម្រោះ និងទឹកសុទ្ធពីផ្ទះសម្រាប់បរិភោគនៅសាលាដោយទទួលទានទឹកឲ្យបានញឹកញាប់ និងច្រើនជាងមុន និងត្រូវប្រកាន់ខ្ជាប់នូវក្បួនអនាម័យល្អ គឺហូបស្អាត ផឹកស្អាត និងរស់នៅស្អាត។
ជាមួយគ្នានេះ ត្រូវស្លៀកសំលៀកបំពាក់សមរម្យ ស្តើង រលុង ស្រាល ពណ៌ភ្លឺស បៃតងខ្ចី ឬលឿង ជៀសវាងការធ្វើលំហាត់ប្រាណនៅក្រោមកម្ដៅខ្លាំង ត្រូវពាក់មួកការពារ ឬប្រើឆ័ត្រនៅពេលធ្វើដំណើរ ត្រូវបើកទ្វារបង្អួច នៃបន្ទប់រៀនឲ្យបានស្រឡះល្អ ត្រូវជៀសវាងការពិសាកាហ្វេ ឬគ្រឿងស្រវឹង។
ទន្ទឹមនឹងនេះ ណែនាំឲ្យសិស្សលេងនៅក្នុងម្លប់ ឬក្នុងបន្ទប់រៀននៅពេលចេញលេង ត្រូវបន្តដាំ និងថែរក្សាដើម ដែលមានស្រាប់នៅក្នុងបរិវេណសាលាដើម្បីយកម្លប់ និងកាត់បន្ថយកម្ដៅ។
វិធានការទាំងនេះ គឺដើម្បីការពារកុំឲ្យសិស្សានុសិស្សកើតជំងឺបេះដូង ជំងឺសួត រលាកស្បែកឡើងក្រហម ជំងឺកង្វះអាហារូបត្ថម្ភ ជំងឺរាក និង បញ្ហាសុខភាពផ្លូវចិត្តជាដើម នៅពេលអាកាសធាតុក្តៅខ្លាំង ហើយក្នុងករណីមានការរាតត្បាត ឬហានិភ័យសុខភាព ត្រូវរាយការណ៍ និងស្វែងរកសេវាសុខភាពដែលនៅជិតបំផុតតាមរយៈសមត្ថកិច្ចពាក់ព័ន្ធនៅតាមមូលដ្ឋានរបស់ខ្លួន ឬទំនាក់ទំនងលេខ១១៥ជាបន្ទាន់។
យោងតាមក្រសួងធនធានទឹក និងឧតុនិយមបានឲ្យដឹងថា កម្ពុជានៅតែមានកម្ដៅកើនឡើងត្រឹម៤០-៤១ អង្សា ចាប់ពីថ្ងៃទី២២ រហូតដល់ថ្ងៃទី៣០មេសា ដោយសារតែទទួលរងឥទ្ធិពលបាតុភូតអ៊ែលនីណូ ដែលធ្វើឲ្យកម្ពុជាមានភ្លៀងខ្សោយ និងមានខ្យល់កន្ត្រាក់កើតឡើងជាញឹកញាប់៕
Source: Kampuchea Thmey Daily
0 Comments